ರಾಮೇಶ್ವರಂನಿಂದ ರಾಷ್ಟ್ರಪತಿ ಭವನದವರೆಗೆ: ಕಲಾಂ ಕನಸಿನ ಪಯಣ

ಇಂದು ಭಾರತವು ಡಾ. ಎಪಿಜೆ ಅಬ್ದುಲ್ ಕಲಾಂರ 10ನೇ ಪುಣ್ಯತಿಥಿಯನ್ನು ಆಚರಿಸುತ್ತಿದೆ. “ಕ್ಷಿಪಣಿ ಮಾನವ” ಮತ್ತು “ಜನರ ರಾಷ್ಟ್ರಪತಿ” ಎಂದು ಪ್ರೀತಿಯಿಂದ ಕರೆಯಲ್ಪಟ್ಟ ಕಲಾಂ, ತಮಿಳುನಾಡಿನ ರಾಮೇಶ್ವರಂನ ಸಾಮಾನ್ಯ ಕುಟುಂಬದಿಂದ ಬಂದು ಭಾರತದ ರಾಷ್ಟ್ರಪತಿಯಾಗಿ ಏರಿದ ಅಸಾಧಾರಣ ವ್ಯಕ್ತಿಯಾಗಿದ್ದರು. ಅವರ ಜೀವನವು ಸರಳತೆ, ಶಿಸ್ತು, ವಿಜ್ಞಾನದ ಸಾಧನೆ ಮತ್ತು ಯುವಕರಿಗೆ ಕನಸು ಕಾಣುವ ಸ್ಪೂರ್ತಿಯ ಸಂಕೇತವಾಗಿದೆ. ಅವರು ಧರ್ಮದಲ್ಲಿ ಮುಸ್ಲಿಂ ಆಗಿದ್ದರೂ ಕೂಡಾ ಎಲ್ಲಾ ಧರ್ಮದವರಿಗೂ ಇವರು ಆದರ್ಶಪ್ರಿಯರಾಗಿದ್ದಾರೆ.

ವಿಜ್ಞಾನಿಯಾಗಿ, ಶಿಕ್ಷಕರಾಗಿ ಮತ್ತು ದೇಶಭಕ್ತರಾಗಿ, ಕಲಾಂ ಭಾರತದ ಇತಿಹಾಸದಲ್ಲಿ ಶಾಶ್ವತ ಛಾಪನ್ನು ಮೂಡಿಸಿದ್ದಾರೆ. ಅವರ ಕೊಡುಗೆಯು ಭಾರತವನ್ನು ಬಾಹ್ಯಾಕಾಶ ಮತ್ತು ರಕ್ಷಣಾ ಕ್ಷೇತ್ರದಲ್ಲಿ ಜಾಗತಿಕ ಶಕ್ತಿಯಾಗಿ ರೂಪಿಸಿತು, ಜೊತೆಗೆ ಲಕ್ಷಾಂತರ ಯುವ ಮನಸ್ಸುಗಳಿಗೆ ದೊಡ್ಡ ಗುರಿಗಳನ್ನು ಕಾಣುವ ಧೈರ್ಯವನ್ನು ತುಂಬಿತು.

ಬಾಲ್ಯದಿಂದ ವಿಜ್ಞಾನದ ಶಿಖರದವರೆಗೆ

ಡಾ. ಅವುಲ್ ಪಕೀರ್ ಜೈನುಲಾಬ್ದೀನ್ ಅಬ್ದುಲ್ ಕಲಾಂ 1931 ರ ಅಕ್ಟೋಬರ್ 15 ರಂದು ರಾಮೇಶ್ವರಂನ ಸಾಮಾನ್ಯ ಮೀನುಗಾರ ಕುಟುಂಬದಲ್ಲಿ ಜನಿಸಿದ ಅವರು, ಬಡತನದ ಮಧ್ಯೆಯೆ ಬೆಳೆದರು. ಅವರ ತಂದೆಯ ಶಿಕ್ಷಣದ ಬಗೆಗಿನ ಒಲವು ಮತ್ತು ತಾಯಿಯ ಪ್ರೀತಿಯಿಂದ ಕಲಾಂಗೆ ಜ್ಞಾನದ ದಾಹ ಬೆಳೆಯಿತು. ಬಾಲ್ಯದಲ್ಲಿ ಪತ್ರಿಕೆ ವಿತರಣೆ ಮಾಡುತ್ತಿದ್ದ ಕಲಾಂ, ತಿರುಚಿರಾಪಳ್ಳಿಯ ಸೇಂಟ್ ಜೋಸೆಫ್ ಕಾಲೇಜಿನಲ್ಲಿ ಭೌತಶಾಸ್ತ್ರದಲ್ಲಿ ಪದವಿ ಪಡೆದರು. ನಂತರ, ಮದ್ರಾಸ್ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿಯಲ್ಲಿ ಏರೋಸ್ಪೇಸ್ ಎಂಜಿನಿಯರಿಂಗ್‌ನಲ್ಲಿ ತರಬೇತಿ ಪಡೆದರು, ಇದು ಅವರ ವಿಜ್ಞಾನದ ಜಗತ್ತಿನ ಪಯಣಕ್ಕೆ ದಾರಿಯಾಯಿತು.

1960 ರ ದಶಕದಲ್ಲಿ ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (ಡಿಆರ್ ಡಿಒ) ನಲ್ಲಿ ತಮ್ಮ ವೃತ್ತಿಜೀವನವನ್ನು ಆರಂಭಿಸಿದ ಕಲಾಂ, ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೊ) ನಲ್ಲಿ ತಮ್ಮ ಅತ್ಯಂತ ಗಮನಾರ್ಹ ಕೊಡುಗೆಯನ್ನು ನೀಡಿದರು.

1980 ರಲ್ಲಿ ರೋಹಿಣಿ ಉಪಗ್ರಹವನ್ನು ಯಶಸ್ವಿಯಾಗಿ ಕಕ್ಷೆಗೆ ಸೇರಿಸಿದ SLV-III ಯೋಜನೆಯ ನೇತೃತ್ವವನ್ನು ವಹಿಸಿದ್ದರು, ಇದು ಭಾರತವನ್ನು ಬಾಹ್ಯಾಕಾಶ ಶಕ್ತಿಯಾಗಿ ಎತ್ತರಕ್ಕೆ ಕೊಂಡೊಯ್ಯಿತು. ಕಲಾಂರನ್ನು “ಕ್ಷಿಪಣಿ ಮಾನವ” ಎಂದು ಕರೆಯಲು ಕಾರಣವಾದದ್ದು ಏಕೀಕೃತ ಕ್ಷಿಪಣಿ ಅಭಿವೃದ್ಧಿ ಕಾರ್ಯಕ್ರಮ (IGMDP). ಅಗ್ನಿ, ಪೃಥ್ವಿ, ಆಕಾಶ್, ತ್ರಿಶೂಲ್ ಮತ್ತು ನಾಗ್ ಕ್ಷಿಪಣಿಗಳ ಅಭಿವೃದ್ಧಿಯು ಭಾರತದ ರಕ್ಷಣಾ ಸಾಮರ್ಥ್ಯವನ್ನು ಬಲಪಡಿಸಿತು.

1998 ರ ಪೊಖ್ರಾನ್-II ಪರಮಾಣು ಪರೀಕ್ಷೆಯಲ್ಲಿ ಅವರ ನಾಯಕತ್ವವು ಭಾರತವನ್ನು ಪರಮಾಣು ಶಕ್ತಿಯಾಗಿ ಸ್ಥಾಪಿಸಿತು. ಗ್ರಾಮೀಣ ಭಾರತಕ್ಕೆ ತಂತ್ರಜ್ಞಾನದ ಲಾಭವನ್ನು ತಲುಪಿಸುವ “PURA” (ಪ್ರೊವಿಷನ್ ಆಫ್ ಅರ್ಬನ್ ಅಮೆನಿಟೀಸ್ ಟು ರೂರಲ್ ಏರಿಯಾಸ್) ಯೋಜನೆಯು ಅವರ ದೂರದೃಷ್ಟಿಯನ್ನು ಪ್ರತಿಬಿಂಬಿಸುತ್ತದೆ.

ಜನರ ರಾಷ್ಟ್ರಪತಿ, ಯುವಕರ ಮಾರ್ಗದರ್ಶಕರು

2002 ರಿಂದ 2007 ರವರೆಗೆ ಭಾರತದ 11ನೇ ರಾಷ್ಟ್ರಪತಿಯಾಗಿ ಸೇವೆ ಸಲ್ಲಿಸಿದ ಕಲಾಂ, “ಜನರ ರಾಷ್ಟ್ರಪತಿ” ಎಂದು ಜನಮಾನಸದಲ್ಲಿ ಸ್ಥಾನ ಪಡೆದರು. ಅವರ ಆಡಳಿತವು ಸರಳತೆ, ಪಾರದರ್ಶಕತೆ ಮತ್ತು ಜನರೊಂದಿಗಿನ ನೇರ ಸಂವಾದಕ್ಕೆ ಹೆಸರಾಗಿತ್ತು. 

ರಾಷ್ಟ್ರಪತಿಯಾಗಿ, ಅವರು ಶಾಲೆಗಳು, ಕಾಲೇಜುಗಳಿಗೆ ಭೇಟಿ ನೀಡಿ, ವಿದ್ಯಾರ್ಥಿಗಳೊಂದಿಗೆ ಸಂವಾದ ನಡೆಸುತ್ತಿದ್ದರು. “ವಿಷನ್ 2020” ಎಂಬ ತಮ್ಮ ದೃಷ್ಟಿಕೋನದ ಮೂಲಕ, ಶಿಕ್ಷಣ, ತಂತ್ರಜ್ಞಾನ ಮತ್ತು ಆರ್ಥಿಕತೆಯನ್ನು ಒಗ್ಗೂಡಿಸಿ ಭಾರತವನ್ನು 2020 ರ ವೇಳೆಗೆ ಅಭಿವೃದ್ಧಿಶೀಲ ರಾಷ್ಟ್ರವನ್ನಾಗಿ ರೂಪಿಸುವ ಕನಸನ್ನು ರೂಪಿಸಿದರು.

ಕಲಾಂರ ವ್ಯಕ್ತಿತ್ವವು ಸರಳತೆ, ಶಿಸ್ತು ಮತ್ತು ಕನಸುಗಳಿಗೆ ಜೀವ ತುಂಬುವ ಛಲದಿಂದ ಕೂಡಿತ್ತು. “ಕನಸು ಕಾಣಿರಿ, ಕನಸುಗಳು ನಿಮ್ಮ ಗುರಿಗಳಾಗುತ್ತವೆ,” ಎಂಬ ಅವರ ಸಂದೇಶವು ಯುವಕರಿಗೆ ದಾರಿದೀಪವಾಯಿತು. ಅವರ ಕೃತಿಗಳಾದ ‘ವಿಂಗ್ಸ್ ಆಫ್ ಫೈರ್, ಇಗ್ನೈಟೆಡ್ ಮೈಂಡ್ಸ್ ಮತ್ತು ಮೈ ಜರ್ನಿ‘ ಯುವಕರಿಗೆ ಸ್ಪೂರ್ತಿಯ ಮೂಲವಾಗಿವೆ.

ಈ ಪುಸ್ತಕಗಳು ಅವರ ಜೀವನದ ಸವಾಲುಗಳನ್ನು, ತತ್ವಗಳನ್ನು ಮತ್ತು ದೇಶಕ್ಕಾಗಿ ಕನಸು ಕಾಣುವ ಉತ್ಸಾಹವನ್ನು ಚಿತ್ರಿಸುತ್ತವೆ. 2015 ರ ಜುಲೈ 27 ರಂದು ಶಿಲಾಂಗ್‌ನ IIM ನಲ್ಲಿ ವಿದ್ಯಾರ್ಥಿಗಳಿಗೆ ಉಪನ್ಯಾಸ ನೀಡುವಾಗ ಹೃದಯಾಘಾತದಿಂದ ಕೊನೆಯುಸಿರೆಳೆದ ಕಲಾಂ, ತಮ್ಮ ಕೊನೆಯ ಕ್ಷಣದವರೆಗೂ ಶಿಕ್ಷಣಕ್ಕೆ ಸಮರ್ಪಿತರಾಗಿದ್ದರು.

ಕಲಾಂಗೆ 1997 ರಲ್ಲಿ ಭಾರತ ರತ್ನ ಸೇರಿದಂತೆ ಹಲವು ಗೌರವಗಳು ಲಭಿಸಿವೆ. ಅವರ ಸ್ಮರಣೆಗಾಗಿ, ಜುಲೈ 27 ರಂದು “ವಿಶ್ವ ಯುವ ಕೌಶಲ್ಯ ದಿನ” ಆಚರಿಸಲಾಗುತ್ತದೆ. ರಾಮೇಶ್ವರಂನಲ್ಲಿ ಸ್ಥಾಪಿತವಾದ ಡಾ. ಎಪಿಜೆ ಅಬ್ದುಲ್ ಕಲಾಂ ಸ್ಮಾರಕವು ಯುವಕರಿಗೆ ವಿಜ್ಞಾನದ ಕಡೆಗೆ ಆಕರ್ಷಣೆಯನ್ನು ತುಂಬುತ್ತದೆ.

“ನಾನು ಶಿಕ್ಷಕನಾಗಿ ನೆನಪಾಗಬೇಕು” ಎಂಬ ಅವರ ಆಶಯ ಇಂದಿಗೂ ಜೀವಂತವಾಗಿದೆ. ಕಲಾಂರ ಪುಣ್ಯತಿಥಿಯಂದು, ಅವರ ದೃಷ್ಟಿಯನ್ನು ಮುಂದುವರಿಸಿ, ಭಾರತವನ್ನು ಜ್ಞಾನ, ಏಕತೆ ಮತ್ತು ಪ್ರಗತಿಯ ದಾರಿಯಲ್ಲಿ ಕೊಂಡೊಯ್ಯುವ ಜವಾಬ್ದಾರಿಯನ್ನು ನಾವು ತೆಗೆದುಕೊಳ್ಳೋಣ.