ಮಾಜಿ ಉಪ ಮುಖ್ಯಮಂತ್ರಿ ಕೆ.ಎಸ್. ಈಶ್ವರಪ್ಪ ನೇತೃತ್ವದ ರಾಷ್ಟ್ರಭಕ್ತರ ಬಳಗದ ಧರ್ಮ ರಕ್ಷಾ ಯಾತ್ರೆ ಧರ್ಮಸ್ಥಳದ ವಿರುದ್ಧದ ಅಪಪ್ರಚಾರವನ್ನು ಖಂಡಿಸಿ ಮಂಗಳವಾರ ಶ್ರೀ ಕ್ಷೇತ್ರ ಧರ್ಮಸ್ಥಳವನ್ನು ತಲುಪಿತು. 200ಕ್ಕೂ ಹೆಚ್ಚು ವಾಹನಗಳಲ್ಲಿ 1,500ಕ್ಕೂ ಅಧಿಕ ಭಕ್ತರು ಜಾಥಾದಲ್ಲಿ ಭಾಗವಹಿಸಿದ್ದರು. ಗಂಗಾ, ತುಂಗಾ, ನೇತ್ರಾವತಿ ನದಿಗಳ ಪವಿತ್ರ ಜಲವನ್ನು ಧರ್ಮಸ್ಥಳದ ರಸ್ತೆಗಳಿಗೆ ಸಿಂಪಡಿಸಿ ಶುದ್ಧೀಕರಣ ಮಾಡಲಾಯಿತು. ದೇವಾಲಯ ಆಡಳಿತ ಮಂಡಳಿಯು ಈಶ್ವರಪ್ಪ ಅವರನ್ನು ಸನ್ಮಾನಿಸಿತು.
ಈಶ್ವರಪ್ಪ ಮಾತನಾಡಿ, “ಧರ್ಮಸ್ಥಳದ ವಿರುದ್ಧ ಸಂಚುಕೋರರ ಷಡ್ಯಂತ್ರವನ್ನು ಆರಂಭದಲ್ಲಿಯೇ ತಡೆಯಲಾಗಿದ್ದರೆ ಈ ಪರಿಸ್ಥಿತಿ ಬರುತ್ತಿರಲಿಲ್ಲ. ಇದೀಗ ಸತ್ಯವು ಸಂಚುಕೋರರ ಬಾಯಿಂದಲೇ ಹೊರಬರುತ್ತಿದೆ,” ಎಂದರು. ರಾಜ್ಯ ಸರ್ಕಾರವು ತ್ವರಿತ ಕ್ರಮ ಕೈಗೊಂಡಿಲ್ಲ ಎಂದು ಟೀಕಿಸಿ, ಈ ಪ್ರಕರಣದಲ್ಲಿ ವಿದೇಶಿ ಹಣಕಾಸು ನೆರವು ಮತ್ತು ರಾಷ್ಟ್ರವಿರೋಧಿಗಳ ಒಡನಾಟವಿದೆ ಎಂದು ಆರೋಪಿಸಿದರು. “ವಿಶೇಷ ತನಿಖಾ ದಳ (ಎಸ್ ಐಟಿ) ಸಾಕಷ್ಟು ಮಾಹಿತಿ ಕಲೆಹಾಕಿದೆ, ಆದರೆ ಈ ಪ್ರಕರಣವನ್ನು ರಾಷ್ಟ್ರೀಯ ತನಿಖಾ ಸಂಸ್ಥೆ (ಎನ್ ಐಎ)ಗೆ ವಹಿಸಬೇಕು,” ಎಂದು ಒತ್ತಾಯಿಸಿದರು.
ಇದನ್ನೂ ಓದಿ | ಧರ್ಮಸ್ಥಳ ಪ್ರಕರಣ: ಆರ್ಎಸ್ಎಸ್ ವಿರುದ್ಧ ಆರ್ಎಸ್ಎಸ್ ಹೋರಾಟ: ಖರ್ಗೆ ಟೀಕೆ
ಯೂಟ್ಯೂಬರ್ ಎಂ.ಡಿ. ಸಮೀರ್ಗೆ ಎಸ್ಡಿಪಿಐ ಜೊತೆ ಸಂಪರ್ಕವಿದೆ ಎಂದು ಈಶ್ವರಪ್ಪ ಆರೋಪಿಸಿದರು. ಧರ್ಮಸ್ಥಳದ ಧರ್ಮಾಧಿಕಾರಿ ವೀರೇಂದ್ರ ಹೆಗ್ಗಡೆಯವರಿಗೆ ಬೆಂಬಲ ವ್ಯಕ್ತಪಡಿಸಿದ ಅವರು, “18 ಅಡಿ ಆಳದಲ್ಲಿ ಶವ ಹುಡುಕುವುದು ಸಾಧ್ಯವೇ? ಇದು ಧರ್ಮಸ್ಥಳವನ್ನು ಕೆಡವಲು ರಾಜಕೀಯ ಷಡ್ಯಂತ್ರ,” ಎಂದು ಹೇಳಿದರು. ಈ ಯಾತ್ರೆಯು ರಾಜ್ಯಾದ್ಯಂತ ಭಕ್ತರಿಂದ ಬೆಂಬಲ ಪಡೆದಿದ್ದು, ಧರ್ಮಸ್ಥಳದ ಗೌರವವನ್ನು ರಕ್ಷಿಸುವ ನಿಟ್ಟಿನಲ್ಲಿ ಮಹತ್ವದ ಹೆಜ್ಜೆಯಾಗಿದೆ.
