ಒಂದು ಸಣ್ಣ ಗ್ರಾಮದ ಮಣ್ಣಿನ ಮೈದಾನದಲ್ಲಿ ಚೆಂಡು ತಂದುಕೊಡುತ್ತಿದ್ದ ಹುಡುಗಿ, ಇಂದು ವಿಶ್ವದ ಅತಿದೊಡ್ಡ ಕ್ರಿಕೆಟ್ ಕ್ರೀಡಾಂಗಣಗಳಲ್ಲಿ ಭಾರತದ ಗೆಲುವಿಗೆ ಬೌಲಿಂಗ್ ಬಾಣಗಳನ್ನು ಬೀಸಿದ್ದಾಳೆ. ಆ ಹುಡುಗಿ ಕ್ರಾಂತಿ ಗೌಡ – ಬಡತನದ ಕಂದರದಿಂದ ಉದಯಿಸಿದ ಬುಡಕಟ್ಟು ಬಾಲಕಿ, 2025ರ ವಿಶ್ವಕಪ್ ಚಾಂಪಿಯನ್ ತಂಡದ ಒಂದು ರೀತಿಯ ನಕ್ಷತ್ರ. ತಂದೆಯ ಕಣ್ಣೀರನ್ನು ಗೌರವದ ಕಿರೀಟವಾಗಿ ಬದಲಾಯಿಸಿದ ಈ 22 ವರ್ಷದ ಯುವತಿಯ ಕಥೆ, ಕೇವಲ ಕ್ರಿಕೆಟ್ನದಲ್ಲ, ಜೀವನದ ಪ್ರತಿ ಹೋರಾಟದಲ್ಲಿ ಪ್ರತಿಯೊಬ್ಬರಿಗೂ ಸ್ಫೂರ್ತಿ.
ಬಾಲ್ಯದ ಕಷ್ಟಕಾಲ
ಮಧ್ಯಪ್ರದೇಶದ ಛತ್ತರ್ಪುರ್ ಜಿಲ್ಲೆಯ ಗುಹಾರ ಗ್ರಾಮದಲ್ಲಿ 2003ರ ಆಗಸ್ಟ್ 11ರಂದು ಜನಿಸಿದ ಕ್ರಾಂತಿ ಗೌಡ್, ಬುಡಕಟ್ಟು ಸಮುದಾಯದ ಕುಟುಂಬದಲ್ಲಿ ಬೆಳೆದರು. ತಂದೆ ಮುನ್ನಾ ಸಿಂಗ್ ಗೌಡ ಮಧ್ಯಪ್ರದೇಶ ಪೊಲೀಸ್ ಇಲಾಖೆಯಲ್ಲಿ ಕಾನ್ಸ್ಟೇಬಲ್ ಆಗಿದ್ದರು. ಆದರೆ 2012ರಲ್ಲಿ ಚುನಾವಣಾ ಕರ್ತವ್ಯದಲ್ಲಿ ಸಣ್ಣ ತಪ್ಪಿನಿಂದಾಗಿ ಸೇವೆಯಿಂದ ವಜಾ ಆದರು. ಅಲ್ಲಿಗೆ ಕುಟುಂಬದ ಆದಾಯ ಮೂಲ ಕಡಿತಗೊಂಡಿತು. ಕ್ರಾಂತಿ ಆರನೇ ಮಗು, 9 ವರ್ಷದ ಹುಡುಗಿ. ಆಗ ಆಹಾರಕ್ಕೂ ಹಣವಿಲ್ಲ ಎನ್ನುವ ದಿನಗಳು ಬಂದವು. ನೆರೆಹೊರೆಯವರ ಸಹಾಯದಿಂದ ಬದುಕು ನಡೆಯಿತು. ತಾಯಿ ನೀಲಂ ಸಿಂಗ್ ಗೌಡ ಕೂಲಿ ಕೆಲಸ ಮಾಡಿ ಮಕ್ಕಳನ್ನು ಸಾಕಿದರು. ಕ್ರಾಂತಿ 8ನೇ ತರಗತಿಯ ನಂತರ ಶಿಕ್ಷಣ ನಿಂತಿತು. ಆದರೆ ತಂದೆಯ ಗೌರವ ಮರಳಿ ಬರಬೇಕೆಂಬ ಕನಸು ಅವಳ ಹೃದಯದಲ್ಲಿ ಬೇರೂರಿತು.
ಕ್ರಿಕೆಟ್ಗೆ ಮೊದಲ ಹೆಜ್ಜೆ
ಗುಹಾರದಲ್ಲಿ ಟೆನಿಸ್ ಬಾಲ್ ಕ್ರಿಕೆಟ್ ಪಂದ್ಯಗಳು ನಡೆಯುತ್ತಿದ್ದವು. ಕ್ರಾಂತಿ ಚೆಂಡು ತಂದುಕೊಡುವ ‘ಬಾಲ್ ಬಾಯ್’ ಆಗಿ ಕೆಲಸ ಮಾಡುತ್ತಿದ್ದಳು. ಆಟಗಾರ್ತಿಯರ ಬೌಲಿಂಗ್ ನೋಡಿ ಆಕರ್ಷಿತಳಾದಳು. ಒಂದು ದಿನ ತಂಡದ ಆಟಗಾರ್ತಿಯೊಬ್ಬಳು ಗಾಯಗೊಂಡಾಗ, ಅವಳಿಗೆ ಬೌಲಿಂಗ್ ಮಾಡಲು ಅವಕಾಶ ಸಿಕ್ಕಿತು. ಅವಳ ವೇಗ, ಸ್ವಿಂಗ್ ಎಲ್ಲರನ್ನೂ ಆಶ್ಚರ್ಯಗೊಳಿಸಿತು.
ಬೆಳಗ್ಗೆ 5 ಗಂಟೆಗೆ ಎದ್ದು ಓಡಾಡುತ್ತಿದ್ದಳು, ಮೈದಾನದಲ್ಲಿ ಏಕಾಂಗಿಯಾಗಿ ಪ್ರ್ಯಾಕ್ಟೀಸ್ ಮಾಡುತ್ತಿದ್ದಳು. 2017ರಲ್ಲಿ ತಂದೆಯು ಅವಳನ್ನು ಛತ್ತರ್ಪುರ್ನ ರಾಜೀವ್ ಬಿಲ್ಥಾರೆ ಅಕಾಡೆಮಿಗೆ ಕರೆತಂದರು. ಅಲ್ಲಿ ಲೆದರ್ ಬಾಲ್ ತರಬೇತಿ ಆರಂಭವಾಯಿತು. ಕೋಚ್ ಬಿಲ್ಥಾರೆ ಅವರು ಉಚಿತವಾಗಿ ಕಿಟ್, ಶೂಗಳು ನೀಡಿದರು.
2023-24ರಲ್ಲಿ ಮಧ್ಯಪ್ರದೇಶ ಮಹಿಳಾ ತಂಡದ ಟ್ರಯಲ್ಗಳಲ್ಲಿ ಆಯ್ಕೆಯಾದಳು. 2024-25ರ ದೇಶೀಯ ಮಧ್ಯಪ್ರದೇಶ ಏಕದಿನ ಪ್ರಶಸ್ತಿ ಗೆದ್ದಿರು. ಕ್ರಾಂತಿ ತಂಡದ ಪ್ರಮುಖ ಬೌಲರ್ ಆಗಿ ಹೊರಹೊಮ್ಮಿದರು. ಅವರ ಬೌಲಿಂಗ್ ಸರಾಸರಿ, ಎಕಾನಮಿ ರೇಟ್ ರಾಷ್ಟ್ರೀಯ ಆಯ್ಕೆಗಾರರ ಗಮನ ಸೆಳೆಯಿತು.
WPL 2025: ವೃತ್ತಿಪರ ಒಪ್ಪಂದ
2025ರ ವುಮನ್ಸ್ ಪ್ರೀಮಿಯರ್ ಲೀಗ್ ಹರಾಜಿನಲ್ಲಿ UP Warriorz ತಂಡ ಅವರನ್ನು 10 ಲಕ್ಷ ರೂಪಾಯಿಗಳಿಗೆ ಖರೀದಿಸಿತು. WPLನಲ್ಲಿ ಉತ್ತಮ ಪ್ರದರ್ಶನ ನೀಡಿದರು. ವಿಕೆಟ್ಗಳು ಪಡೆದರು, ರನ್ಗಳನ್ನು ತಡೆದರು. ಇದು ರಾಷ್ಟ್ರೀಯ ತಂಡಕ್ಕೆ ಬಾಗಿಲು ತೆರೆಯಿತು.
ಅಂತರರಾಷ್ಟ್ರೀಯ ಪಾದಾರ್ಪಣೆ
2025ರ ಮಾರ್ಚ್ನಲ್ಲಿ ಶ್ರೀಲಂಕಾದಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ODIಗೆ ಪಾದಾರ್ಪಣೆ ಮಾಡಿದರು. ಜುಲೈ 2025ರಲ್ಲಿ ಇಂಗ್ಲೆಂಡ್ ಪ್ರವಾಸದಲ್ಲಿ T20Iಗೆ ಆಯ್ಕೆಯಾದರು. ಚೆಸ್ಟರ್-ಲೆ-ಸ್ಟ್ರೀಟ್ನಲ್ಲಿ ಇಂಗ್ಲೆಂಡ್ ವಿರುದ್ಧ 6 ರನ್ಗಳಿಗೆ 5 ವಿಕೆಟ್ ಪಡೆದರು. ಅಲ್ಲದೇ ಭಾರತೀಯ ಮಹಿಳಾ ಕ್ರಿಕೆಟ್ನಲ್ಲಿ ಯುವ ವೇಗದ ಬೌಲರ್ ಆಗಿ 5 ವಿಕೆಟ್ ಪಡೆದ ಮೊದಲ ಆಟಗಾರ್ತಿಯಾದರು. ಇಂಗ್ಲೆಂಡ್ ವಿರುದ್ಧ 3 ODIಗಳಲ್ಲಿ 9 ವಿಕೆಟ್ (ಸರಾಸರಿ 15.11) ತೆಗೆದರು.
2025 ವಿಶ್ವಕಪ್ ಗೆಲುವು
2025ರ ICC ಮಹಿಳಾ ODI ವಿಶ್ವಕಪ್ ಭಾರತದಲ್ಲಿ ನಡೆಯಿತು. ಭಾರತ 47 ವರ್ಷಗಳ ನಂತರ ಚಾಂಪಿಯನ್ ಆಯಿತು. ಕ್ರಾಂತಿ 9 ವಿಕೆಟ್ ಪಡೆದಳು (ಸರಾಸರಿ 18.55). ಪಾಕಿಸ್ತಾನ ವಿರುದ್ಧ 3/28, ಪಂದ್ಯಶ್ರೇಷ್ಠ. ಆಸ್ಟ್ರೇಲಿಯಾ ವಿರುದ್ಧ ಸೆಮಿಫೈನಲ್ನಲ್ಲಿ 2 ವಿಕೆಟ್. ಫೈನಲ್ನಲ್ಲಿ 1 ವಿಕೆಟ್ – ಒತ್ತಡದಲ್ಲಿ ಶಿಸ್ತಿನ ಬೌಲಿಂಗ್ ಮಾಡಿ ಮುಗಿಸಿದರು.
ತಂದೆಗೆ ಮರಳಿದ ಗೌರವ
ವಿಶ್ವಕಪ್ ಗೆಲುವಿನ ನಂತರ ಮಧ್ಯಪ್ರದೇಶ ಸರ್ಕಾರ ಮುನ್ನಾ ಸಿಂಗ್ ಗೌಡ್ ಅವರನ್ನು ಪೊಲೀಸ್ ಕಾನ್ಸ್ಟೇಬಲ್ ಆಗಿ ಮರು ನೇಮಿಸಿತು. ಛತ್ತರ್ಪುರ್ನಲ್ಲಿ ಅಂತರರಾಷ್ಟ್ರೀಯ ಮಾನದಂಡದ ಕ್ರೀಡಾ ಕ್ಷೇತ್ರ ನಿರ್ಮಾಣ ಘೋಷಣೆ. ನವೆಂಬರ್ 15, 2025ನ್ನು “ಬುಡಕಟ್ಟು ಗೌರವ ದಿನ” ಎಂದು ಘೋಷಿಸಲಾಯಿತು.
ಇದನ್ನೂ ಓದಿ | ರೇಣುಕಾ ಸಿಂಗ್ ಠಾಕೂರ್ : ತಾಯಿ-ಮಗಳ ಸಾಹಸದ ಕಥೆ
ಕ್ರಾಂತಿ ಗುಹಾರಕ್ಕೆ ಮರಳಿದಾಗ ಸಾವಿರಾರು ಜನ ಸ್ವಾಗತಿಸಿದರು. ಅವರು ಮಕ್ಕಳಿಗೆ ಕ್ರಿಕೆಟ್ ತರಬೇತಿ ನೀಡುತ್ತಾರೆ. “ಕಷ್ಟಪಟ್ಟರೆ ಯಶಸ್ಸು ಸಿಗುತ್ತದೆ” – ಎನ್ನುವುದು ಕ್ರಾಂತಿ ಗೌಡ ಅವರ ಸಂದೇಶ
