ಆನ್ಲೈನ್ ಹಗರಣಗಳು ದಿನೇ ದಿನೇ ಭಯಾನಕ ರೂಪ ಪಡೆಯುತ್ತಿರುವ ಈ ಸಮಯದಲ್ಲಿ ಕೇಂದ್ರ ಸರ್ಕಾರ ದೊಡ್ಡ ನಿರ್ಧಾರ ತೆಗೆದುಕೊಂಡಿದೆ. ದೂರಸಂಪರ್ಕ ಇಲಾಖೆ (DoT) ನವೆಂಬರ್ 28, 2025ರಂದು “ದೂರಸಂಪರ್ಕ ಸೈಬರ್ ಸುರಕ್ಷತಾ (ಸಂಶೋಧನೆ) ನಿಯಮಗಳು 2025” ಅಧಿಸೂಚನೆ ಹೊರಡಿಸಿದೆ. ಈ ನಿಯಮದ ಮೂಲಕ ವಾಟ್ಸ್ಆಪ್, ಟೆಲಿಗ್ರಾಮ್, ಸಿಗ್ನಲ್, ಸ್ನ್ಯಾಪ್ಚಾಟ್, ಡಿಸ್ಕಾರ್ಡ್, ಶೇರ್ಚಾಟ್, ಜಿಯೋಚಾಟ್, ಅರಟ್ಟೈ, ಜೋಶ್ನಂತಹ ಎಲ್ಲ OTT ಸಂದೇಶ ಸೇವೆಗಳನ್ನು “ಟೆಲಿಕಾಂ ಐಡೆಂಟಿಫೈಯರ್ ಯೂಸರ್ ಎಂಟಿಟಿ (TIUE)” ವರ್ಗಕ್ಕೆ ಸೇರಿಸಲಾಗಿದೆ. ಇದರಿಂದ ಈ ಆ್ಯಪ್ಗಳ ಮೇಲೆ ಟೆಲಿಕಾಂ ಕಂಪನಿಗಳಂತೆಯೇ ಕಟ್ಟುನಿಟ್ಟಿನ ಸೈಬರ್ ಸುರಕ್ಷತಾ ನಿಯಮಗಳು ಅನ್ವಯವಾಗಲಿವೆ.
ಪ್ರಮುಖ ನಿಯಮಗಳು:
- ಎಲ್ಲ ಸಂದೇಶ ಆ್ಯಪ್ ಖಾತೆಗಳು ಕಡ್ಡಾಯವಾಗಿ ಭಾರತದಲ್ಲಿ ಸಕ್ರಿಯ ಸಿಮ್ ಕಾರ್ಡ್ಗೆ ಲಿಂಕ್ ಆಗಿರಬೇಕು.
- ಸಿಮ್ ತೆಗೆದರೆ, ನಿಷ್ಕ್ರಿಯಗೊಂಡರೆ ಅಥವಾ e-SIM ಆಫ್ಲೈನ್ ಆದರೆ – ಕೇವಲ 6 ಗಂಟೆಗಳ ಒಳಗೆ ಆ್ಯಪ್ ಸಂಪೂರ್ಣ ಲಾಗ್ಔಟ್ ಆಗಬೇಕು.
- ವಾಟ್ಸ್ಆಪ್ ವೆಬ್, ಡೆಸ್ಕ್ಟಾಪ್, ಟೆಲಿಗ್ರಾಮ್ ವೆಬ್ ಮುಂತಾದವು ಪ್ರತಿ 6 ಗಂಟೆಗೊಮ್ಮ್ಮೆ ಸ್ವಯಂಚಾಲಿತ ಲಾಗ್ಔಟ್ ಆಗಲಿವೆ. ಮರು ಲಾಗಿನ್ಗೆ ಮೊಬೈಲ್ನಲ್ಲಿ QR ಕೋಡ್ ಸ್ಕ್ಯಾನ್ ಮಾಡಲೇಬೇಕು.
- ವಿದೇಶಿ ಸಿಮ್ ಅಥವಾ ವರ್ಚುಯಲ್ ನಂಬರ್ಗಳಿಂದ ಭಾರತೀಯ ಖಾತೆ ರನ್ ಮಾಡುವುದು ಅಸಾಧ್ಯವಾಗಲಿದೆ.
ಈ ನಿಯಮಗಳ ಹಿಂದಿನ ಕಾರಣವೇನು?
2024-25ರಲ್ಲಿ ₹1,700 ಕೋಟಿಗಿಂತ ಹೆಚ್ಚು ಸೈಬರ್ ಹಗರಣಗಳು ನಡೆದಿವೆ. ಕಾಂಬೋಡಿಯಾ, ದುಬೈ, ಮ್ಯಾನ್ಮಾರ್ನಲ್ಲಿರುವ ಹಗರಣಗಾರರು ಭಾರತೀಯ ಸಿಮ್ ಖರೀದಿಸಿ, ತೆಗೆದು ವಿದೇಶದಲ್ಲಿ ಬಳಸಿ ಡಿಜಿಟಲ್ ಅರೆಸ್ಟ್, ಸ್ಟಾಕ್ ಮಾರ್ಕೆಟ್ ಮೋಸ, ಸೆಕ್ಸ್ಟಾರ್ಷನ್ ಮಾಡುತ್ತಿದ್ದರು. ಈಗ ಸಿಮ್ ಭಾರತದಲ್ಲೇ ಸಕ್ರಿಯವಿರಬೇಕಾದ ಕಾರಣ ಆ ದಾರಿ ಬಹಳ ಕಷ್ಟವಾಗಲಿದೆ.
ಆ್ಯಪ್ ಕಂಪನಿಗಳಿಗೆ 90 ದಿನಗಳಲ್ಲಿ (ಫೆಬ್ರವರಿ 2026ರೊಳಗೆ) ತಾಂತ್ರಿಕ ಬದಲಾವಣೆ ಮಾಡಬೇಕು ಮತ್ತು 120 ದಿನಗಳಲ್ಲಿ DoTಗೆ ಅನುಷ್ಠಾನ ವರದಿ ಸಲ್ಲಿಸಬೇಕು. ಅನುಸರಿಸದಿದ್ದರೆ ಟೆಲಿಕಾಂ ಕಾಯ್ದೆ 2023ರಡಿ ದೊಡ್ಡ ದಂಡ ಮತ್ತು ಸೇವೆ ರದ್ದತಿ ಸಾಧ್ಯ. ಸೆಲ್ಯುಲಾರ್ ಆಪರೇಟರ್ಸ್ ಅಸೋಸಿಯೇಷನ್ ಆಫ್ ಇಂಡಿಯಾ (COAI) ಈ ನಿರ್ಧಾರವನ್ನು ಶ್ಲಾಘಿಸಿದ್ದು, “ಮೊಬೈಲ್ ನಂಬರ್ ಭಾರತದ ಅತ್ಯಂತ ದೃಢ ಡಿಜಿಟಲ್ ಗುರುತು; ಇದು ಸೈಬರ್ ಅಪರಾಧವನ್ನು ಗಣನೀಯವಾಗಿ ಕಡಿಮೆ ಮಾಡುತ್ತದೆ” ಎಂದಿದೆ.
ಇದನ್ನೂ ಓದಿ | ಭಾರತೀಯ ಬ್ಯಾಂಕಿಂಗ್ನ ವಿದೇಶಿಕರಣ: ರಾಷ್ಟ್ರೀಯ ಹಿತಾಸಕ್ತಿಗೆ ಹಣಕಾಸು ಸಚಿವಾಲಯದ ದ್ರೋಹವೇ?
ಆದರೆ ಕೆಲವು ಆತಂಕಗಳೂ ಇವೆ. ವಿದೇಶ ಪ್ರಯಾಣಿಕರು, NRIs, ಡ್ಯುಯಲ್ ಸಿಮ್ ಬಳಕೆದಾರರಿಗೆ ತೊಂದರೆ ಆಗಬಹುದು. ಹಗರಣಗಾರರು ನಕಲಿ ಐಡಿಯಿಂದ ಹೊಸ ಸಿಮ್ ತೆಗೆದುಕೊಂಡರೆ ಈ ನಿಯಮ ಸೀಮಿತ ಪರಿಣಾಮ ಬೀರಬಹುದು ಎಂಬ ಟೀಕೆಯೂ ಇದೆ. ಒಟ್ಟಾರೆಯಾಗಿ ಹೇಳಬೇಕೆಂದರೆ, ಸಾಮಾನ್ಯ ಬಳಕೆದಾರರಿಗೆ ಸ್ವಲ್ಪ ಅನಾನುಕೂಲ ಆದರೂ ದೊಡ್ಡ ಮಟ್ಟದ ಸೈಬರ್ ರಾಕ್ಷಸನ ಕೊರಳು ಕತ್ತರಿಸುವ ಈ ಕ್ರಮ ಭಾರತದ ಡಿಜಿಟಲ್ ಭವಿಷ್ಯಕ್ಕೆ ಬಹಳ ಮುಖ್ಯವಾದ ಹೆಜ್ಜೆಯಾಗಿದೆ.
