ಕೆಲಸ ಮುಗಿದ ಮೇಲೆ ಬಾಸ್ ಫೋನ್ ರಿಸೀವ್ ಮಾಡಬೇಕಿಲ್ಲ!: ಕಾರಣ ಇಲ್ಲಿದೆ

ಕಚೇರಿ ಸಮಯ ಮುಗಿದ ಮೇಲೂ ಬಾಸ್ ಫೋನ್ ಮಾಡುತ್ತಾರಾ? ರಜಾ ದಿನಗಳಲ್ಲಿ ಇಮೇಲ್ ನೋಡಿಲ್ಲವೆಂದು ಬೈಗುಳ ತಿನ್ನಬೇಕಾಗಿದೆಯೇ? ಇಂತಹ ಕಿರಿಕಿರಿಯಿಂದ ಉದ್ಯೋಗಿಗಳಿಗೆ ಮುಕ್ತಿ ನೀಡುವ ಮಹತ್ವದ ಮಸೂದೆಯೊಂದು ಶುಕ್ರವಾರ (ಡಿ.5) ಲೋಕಸಭೆಯಲ್ಲಿ ಮಂಡನೆಯಾಗಿದೆ. 

ಎನ್‌ಸಿಪಿ (NCP – ಶರದ್ ಪವಾರ್ ಬಣ) ಸಂಸದೆ ಸುಪ್ರಿಯಾ ಸುಳೆ ಅವರು ‘ರೈಟ್ ಟು ಡಿಸ್ಕನೆಕ್ಟ್ ಬಿಲ್-2025’ (Right to Disconnect Bill) ಎಂಬ ಖಾಸಗಿ ಸದಸ್ಯರ ಮಸೂದೆಯನ್ನು ಮಂಡಿಸಿದ್ದು, ಇದು ದೇಶದ ಕಾರ್ಪೊರೇಟ್ ವಲಯ ಮತ್ತು ನೌಕರರ ವರ್ಗದಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ.

ಏನಿದು ‘ರೈಟ್ ಟು ಡಿಸ್ಕನೆಕ್ಟ್’ ಮಸೂದೆ?

ಈ ಮಸೂದೆಯ ಮುಖ್ಯ ಉದ್ದೇಶ ಉದ್ಯೋಗಿಗಳಿಗೆ “ಸಂಪರ್ಕ ಕಡಿತಗೊಳಿಸುವ ಹಕ್ಕನ್ನು” (Right to Disconnect) ನೀಡುವುದು. ಅಂದರೆ, ನಿಗದಿಪಡಿಸಿದ ಕೆಲಸದ ಅವಧಿ ಮುಗಿದ ನಂತರ, ಉದ್ಯೋಗದಾತರ (Employer) ಕರೆಗಳು, ಇಮೇಲ್‌ಗಳು ಅಥವಾ ಯಾವುದೇ ರೀತಿಯ ಡಿಜಿಟಲ್ ಸಂದೇಶಗಳಿಗೆ ಪ್ರತಿಕ್ರಿಯಿಸದಿರುವ ಹಕ್ಕನ್ನು ಇದು ನೌಕರರಿಗೆ ನೀಡುತ್ತದೆ. ಕೆಲಸದ ಸಮಯದ ನಂತರ ಬಾಸ್ ಕರೆ ಮಾಡಿದರೆ, ಅದನ್ನು ಸ್ವೀಕರಿಸದಿದ್ದರೂ ಕಂಪನಿ ಉದ್ಯೋಗಿಯ ವಿರುದ್ಧ ಶಿಸ್ತು ಕ್ರಮ ಜರುಗಿಸುವಂತಿಲ್ಲ ಅಥವಾ ಕೆಲಸದಿಂದ ತೆಗೆಯುವಂತಿಲ್ಲ ಎಂಬ ರಕ್ಷಣೆಯನ್ನು ಈ ಮಸೂದೆ ಪ್ರತಿಪಾದಿಸುತ್ತದೆ.

ಸ್ಮಾರ್ಟ್‌ಫೋನ್‌ಗಳ ಯುಗದಲ್ಲಿ ಮತ್ತು ವರ್ಕ್ ಫ್ರಮ್ ಹೋಮ್ (WFH) ಸಂಸ್ಕೃತಿ ಹೆಚ್ಚಾದ ನಂತರ, ವೈಯಕ್ತಿಕ ಜೀವನ ಮತ್ತು ವೃತ್ತಿ ಜೀವನದ ನಡುವಿನ ಗೆರೆ ಅಳಿಸಿಹೋಗಿದೆ. “ಉದ್ಯೋಗಿಗಳು ದಿನದ 24 ಗಂಟೆಯೂ ಲಭ್ಯವಿರಬೇಕು ಎಂಬ ಅಲಿಖಿತ ನಿಯಮ ಕಾರ್ಪೊರೇಟ್ ವಲಯದಲ್ಲಿ ಬೇರೂರಿದೆ. ಇದರಿಂದ ಉದ್ಯೋಗಿಗಳಲ್ಲಿ ಮಾನಸಿಕ ಒತ್ತಡ, ಆತಂಕ ಮತ್ತು ಕೌಟುಂಬಿಕ ಕಲಹಗಳು ಹೆಚ್ಚಾಗುತ್ತಿವೆ. ನೌಕರರ ಮಾನಸಿಕ ಆರೋಗ್ಯವನ್ನು ಕಾಪಾಡಲು ಮತ್ತು ಅವರಿಗೆ ಗುಣಮಟ್ಟದ ಕೌಟುಂಬಿಕ ಸಮಯವನ್ನು ಒದಗಿಸಲು ಈ ಕಾನೂನು ಅನಿವಾರ್ಯ,” ಎಂದು ಸುಪ್ರಿಯಾ ಸುಳೆ ಮಸೂದೆಯ ಉದ್ದೇಶವನ್ನು ವಿವರಿಸಿದ್ದಾರೆ.

ಜಾಗತಿಕ ಮಟ್ಟದಲ್ಲಿ ವ್ಯವಸ್ಥೆ ಹೇಗಿದೆ?

ಈಗಾಗಲೇ ಫ್ರಾನ್ಸ್, ಆಸ್ಟ್ರೇಲಿಯಾ, ಬೆಲ್ಜಿಯಂ, ಇಟಲಿ ಮತ್ತು ಸ್ಪೇನ್‌ನಂತಹ ದೇಶಗಳಲ್ಲಿ ‘ರೈಟ್ ಟು ಡಿಸ್ಕನೆಕ್ಟ್‘ ಕಾನೂನು ಜಾರಿಯಲ್ಲಿದೆ. ಇತ್ತೀಚೆಗೆ ಆಸ್ಟ್ರೇಲಿಯಾ ಕೂಡ ಕೆಲಸದ ಅವಧಿಯ ನಂತರ ಬಾಸ್ ಕರೆಯನ್ನು ನಿರ್ಲಕ್ಷಿಸುವ ಹಕ್ಕನ್ನು ಉದ್ಯೋಗಿಗಳಿಗೆ ಕಾನೂನುಬದ್ಧವಾಗಿ ನೀಡಿದೆ. ಭಾರತದಲ್ಲೂ ಇಂತಹದ್ದೇ ಕಾನೂನು ತರಬೇಕೆಂಬುದು ಈ ಮಸೂದೆಯ ಆಶಯ.

ಇದನ್ನೂ ಓದಿ | ಋತುಚಕ್ರ ರಜೆ: ಮಹಿಳೆಯರ ದೈಹಿಕ, ಮಾನಸಿಕ ಆರೋಗ್ಯಕ್ಕೆ ರಕ್ಷಣೆ ?

ಸಂಸತ್ತಿನಲ್ಲಿ ಮಂತ್ರಿಗಳಲ್ಲದ ಇತರೆ ಸಂಸದರು (ಆಡಳಿತ ಅಥವಾ ವಿರೋಧ ಪಕ್ಷದವರು) ಮಂಡಿಸುವ ಮಸೂದೆಯನ್ನು ‘ಖಾಸಗಿ ಸದಸ್ಯರ ಮಸೂದೆ’ ಎಂದು ಕರೆಯಲಾಗುತ್ತದೆ. ಸಾಮಾನ್ಯವಾಗಿ ಪ್ರತಿ ಶುಕ್ರವಾರ ಮಧ್ಯಾಹ್ನ ಸಂಸತ್ತಿನಲ್ಲಿ ಇಂತಹ ಮಸೂದೆಗಳನ್ನು ಮಂಡಿಸಲು ಮತ್ತು ಚರ್ಚಿಸಲು ಅವಕಾಶವಿರುತ್ತದೆ. ಇತಿಹಾಸದಲ್ಲಿ ಖಾಸಗಿ ಸದಸ್ಯರ ಮಸೂದೆಗಳು ಕಾನೂನಾಗಿ ಬದಲಾದ ಉದಾಹರಣೆಗಳು ಕಡಿಮೆ ಇದ್ದರೂ, ಇವು ಸರ್ಕಾರದ ಗಮನ ಸೆಳೆಯುವಲ್ಲಿ ಮತ್ತು ಮುಂದೊಂದು ದಿನ ಪೂರ್ಣ ಪ್ರಮಾಣದ ಕಾನೂನಾಗಲು ಬುನಾದಿ ಹಾಕುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ.

ಈ ಮಸೂದೆಯು ಸದ್ಯಕ್ಕೆ ಕಾನೂನಾಗಿ ಮಾರ್ಪಡದಿದ್ದರೂ, ಉದ್ಯೋಗಿಗಳ ಮಾನಸಿಕ ಆರೋಗ್ಯದ ಬಗ್ಗೆ ಸಂಸತ್ತಿನಲ್ಲಿ ಮತ್ತು ಸಾರ್ವಜನಿಕ ವಲಯದಲ್ಲಿ ಗಂಭೀರ ಚರ್ಚೆಯನ್ನು ಹುಟ್ಟುಹಾಕಿದೆ.