ಟರ್ಕಿ ರಾಜಧಾನಿಯಲ್ಲಿ ಭೀಕರ ಸ್ಫೋಟ: ಲಿಬಿಯಾದ ಉನ್ನತ ಸೇನಾ ದಂಡನಾಯಕರು ಸಜೀವ ದಹನ!

ಉತ್ತರ ಆಫ್ರಿಕಾದ ರಾಷ್ಟ್ರ ಲಿಬಿಯಾದ ಪಾಲಿಗೆ ಈ ಬುಧವಾರ (ಡಿಸೆಂಬರ್ 24) ಕರಾಳ ದಿನವಾಗಿ ಮಾರ್ಪಟ್ಟಿದೆ. ಲಿಬಿಯಾದ ಸೇನಾ ಮುಖ್ಯಸ್ಥ (Chief of General Staff) ಜನರಲ್ ಮೊಹಮ್ಮದ್ ಅಲಿ ಅಹ್ಮದ್ ಅಲ್ ಹದ್ದಾದ್ ಸೇರಿದಂತೆ ದೇಶದ ಅತ್ಯುನ್ನತ ಸೇನಾ ನಾಯಕರು ಪ್ರಯಾಣಿಸುತ್ತಿದ್ದ ಖಾಸಗಿ ಜೆಟ್ ವಿಮಾನವು ಟರ್ಕಿಯ ರಾಜಧಾನಿ ಅಂಕಾರಾದಲ್ಲಿ ಪತನಗೊಂಡಿದ್ದು, ವಿಮಾನದಲ್ಲಿದ್ದ ಎಲ್ಲರೂ ಸಾವನ್ನಪ್ಪಿದ್ದಾರೆ ಎಂದು ಮೂಲಗಳಿಂದ ತಿಳಿದುಬಂದಿದೆ. 

ಟರ್ಕಿಯಲ್ಲಿ ನಡೆದ ಉನ್ನತ ಮಟ್ಟದ ರಕ್ಷಣಾ ಸಭೆಯಲ್ಲಿ ಪಾಲ್ಗೊಂಡಿದ್ದ ಜನರಲ್ ಹದ್ದಾದ್ ಮತ್ತು ಅವರ ತಂಡ, ‘ಡಸಾಲ್ಟ್ ಫಾಲ್ಕನ್ 50’ (Dassault Falcon 50) ಎಂಬ ಬಿಸಿನೆಸ್ ಜೆಟ್ ಮೂಲಕ ಟ್ರಿಪೋಲಿಗೆ ಮರಳುತ್ತಿತ್ತು. ಅಂಕಾರಾದ ಎಸೆನ್ಬೋಗಾ ವಿಮಾನ ನಿಲ್ದಾಣದಿಂದ ಮಂಗಳವಾರ (ಡಿಸೆಂಬರ್ 23) ರಾತ್ರಿ 8:10ರ ಸುಮಾರಿಗೆ (ಸ್ಥಳೀಯ ಕಾಲಮಾನ) ವಿಮಾನ ಟೇಕಾಫ್ ಆಗಿ ನಂತರ ಈ ದುರಂತ ಸಂಭವಿಸಿದೆ. .

ಆದರೆ, ಟೇಕಾಫ್ ಆದ ಸುಮಾರು 40 ನಿಮಿಷಗಳ ನಂತರ ವಿಮಾನದಲ್ಲಿ ತಾಂತ್ರಿಕ ದೋಷ ಕಾಣಿಸಿಕೊಂಡಿದೆ. ಪೈಲಟ್ ತುರ್ತು ಲ್ಯಾಂಡಿಂಗ್‌ಗಾಗಿ ಏರ್ ಟ್ರಾಫಿಕ್ ಕಂಟ್ರೋಲ್ (ATC) ಗೆ ಮನವಿ ಮಾಡಿದ್ದಾರೆ. ವಿದ್ಯುತ್ ವೈಫಲ್ಯದಿಂದ ಸಮಸ್ಯೆ ಉಂಟಾಗಿದೆ ಎಂದು ಸಂದೇಶ ರವಾನಿಸಲಾಗಿತ್ತು. ದುರದೃಷ್ಟವಶಾತ್, ಅಂಕಾರಾದಿಂದ ಸುಮಾರು 70 ಕಿಲೋಮೀಟರ್ ದೂರದಲ್ಲಿರುವ ಹೈಮಾನಾ ಜಿಲ್ಲೆಯ ಕೆಸಿಕ್ಕಾವಾಕ್ ಗ್ರಾಮದ ಬಳಿ ವಿಮಾನವು ಸಂಪರ್ಕ ಕಳೆದುಕೊಂಡಿತು ಮತ್ತು ಕೆಲವೇ ಕ್ಷಣಗಳಲ್ಲಿ ನೆಲಕ್ಕೆ ಅಪ್ಪಳಿಸಿ ಸ್ಫೋಟಗೊಂಡಿತು.

ಇದನ್ನೂ ಓದಿ | ಬಾಹ್ಯಾಕಾಶದಲ್ಲಿ ಭಾರತದ ಮತ್ತೊಂದು ಮೈಲಿಗಲ್ಲು: ಇಸ್ರೋದಿಂದ ‘ಬ್ಲೂಬರ್ಡ್’ ಉಪಗ್ರಹ ಯಶಸ್ವಿ ಉಡಾವಣೆ

ಮೃತರ ಪಟ್ಟಿಯಲ್ಲಿ ಪ್ರಮುಖರು:

ಈ ದುರಂತದಲ್ಲಿ ಕೇವಲ ಸೇನಾ ಮುಖ್ಯಸ್ಥರಷ್ಟೇ ಅಲ್ಲದೆ, ಲಿಬಿಯಾ ಸೇನೆಯ ಬೆನ್ನೆಲುಬಿನಂತಿದ್ದ ಇತರ ಹಿರಿಯ ಅಧಿಕಾರಿಗಳು ಕೂಡ ಮೃತಪಟ್ಟಿದ್ದಾರೆ ಎಂದು ಮೂಲಗಳು ದೃಢಪಡಿಸಿವೆ.

ಜನರಲ್ ಮೊಹಮ್ಮದ್ ಅಲಿ ಅಹ್ಮದ್ ಅಲ್ ಹದ್ದಾದ್ (ಸೇನಾ ಮುಖ್ಯಸ್ಥರು), ಮೇಜರ್ ಜನರಲ್ ಅಲ್-ಫಿತೂರಿ ಗರಿಬಿಲ್ (ಭೂಸೇನಾ ಮುಖ್ಯಸ್ಥರು), ಬ್ರಿಗೇಡಿಯರ್ ಜನರಲ್ ಮಹಮೂದ್ ಅಲ್-ಕತಾವಿ (ನಿರ್ದೇಶಕರು, ಮಿಲಿಟರಿ ಮ್ಯಾನುಫ್ಯಾಕ್ಚರಿಂಗ್ ಅಥಾರಿಟಿ), ಸೇನಾ ಸಲಹೆಗಾರರು ಮತ್ತು ಫೋಟೋಗ್ರಾಫರ್ ಸೇರಿದಂತೆ ಮೂವರು ಸಿಬ್ಬಂದಿ ಕೂಡ ಸಾವನ್ನಪ್ಪಿದ್ದಾರೆ ಎಂದು ಮೂಲಗಳಿಂದ ತಿಳಿದುಬಂದಿದೆ.