ವಿಶ್ವದ ಅತಿದೊಡ್ಡ ಪ್ರಜಾಪ್ರಭುತ್ವ ರಾಷ್ಟ್ರವಾದ ಭಾರತ ಮತ್ತು 27 ದೇಶಗಳ ಪ್ರಬಲ ಒಕ್ಕೂಟವಾದ ಯುರೋಪಿಯನ್ ಯೂನಿಯನ್ (EU) ನಡುವೆ ಏರ್ಪಟ್ಟಿರುವ “ಮದರ್ ಆಫ್ ಆಲ್ ಡೀಲ್ಸ್” (Mother of all deals) ಎಂದೇ ಬಣ್ಣಿಸಲಾದ ಮುಕ್ತ ವ್ಯಾಪಾರ ಒಪ್ಪಂದವು ಅಮೆರಿಕದ ಕಣ್ಣು ಕೆಂಪಾಗಿಸಿದೆ. ಈ ಒಪ್ಪಂದದ ಮೂಲಕ ಯುರೋಪ್ ತನಗೆ ತಾನೇ ದೊಡ್ಡ ಹಾನಿ ಮಾಡಿಕೊಳ್ಳುತ್ತಿದೆ ಎಂದು ಅಮೆರಿಕದ ಖಜಾನೆ ಕಾರ್ಯದರ್ಶಿ (US Treasury Secretary) ಸ್ಕಾಟ್ ಬೆಸ್ಸೆಂಟ್ (Scott Bessent) ಪ್ರತಿಕ್ರಿಯಿಸಿದ್ದಾರೆ.
“ನಿಮ್ಮ ಸಮಾಧಿಯನ್ನು ನೀವೇ ತೋಡುತ್ತಿದ್ದೀರಿ”
ಅಮೆರಿಕದ ಪ್ರಮುಖ ಸುದ್ದಿ ವಾಹಿನಿಯೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಮಾತನಾಡಿದ ಸ್ಕಾಟ್ ಬೆಸ್ಸೆಂಟ್, ಯುರೋಪಿಯನ್ ಒಕ್ಕೂಟದ ನಡೆಗೆ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. “ರಷ್ಯಾ-ಉಕ್ರೇನ್ ಯುದ್ಧದಲ್ಲಿ ಯುರೋಪ್ ತನ್ನ ಕಾಲ ಮೇಲೆ ತಾನೇ ಕಲ್ಲು ಹಾಕಿಕೊಳ್ಳುತ್ತಿದೆ. ರಷ್ಯಾದ ತೈಲವನ್ನು ಖರೀದಿಸುವ ಮೂಲಕ ಅವರು ಪರೋಕ್ಷವಾಗಿ ತಮ್ಮ ವಿರುದ್ಧದ ಯುದ್ಧಕ್ಕೆ ತಾವೇ ಹಣಕಾಸು ಒದಗಿಸುತ್ತಿದ್ದಾರೆ (Financing the war against themselves),” ಎಂದು ಅವರು ನೇರವಾಗಿಯೇ ಆರೋಪಿಸಿದ್ದಾರೆ.
ರಷ್ಯನ್ ತೈಲದ ರಹಸ್ಯ ಮಾರ್ಗ
ಬೆಸ್ಸೆಂಟ್ ಅವರ ಕೋಪಕ್ಕೆ ಪ್ರಮುಖ ಕಾರಣ ಭಾರತದ ಮೂಲಕ ಯುರೋಪ್ಗೆ ಹರಿಯುತ್ತಿರುವ ರಷ್ಯಾದ ತೈಲ. ಉಕ್ರೇನ್ ಯುದ್ಧದ ನಂತರ ಅಮೆರಿಕ ಮತ್ತು ಯುರೋಪ್ ದೇಶಗಳು ರಷ್ಯಾದ ಮೇಲೆ ಕಠಿಣ ಆರ್ಥಿಕ ನಿರ್ಬಂಧಗಳನ್ನು ಹೇರಿದ್ದವು. ಆದರೆ, ಭಾರತವು ರಷ್ಯಾದಿಂದ ರಿಯಾಯಿತಿ ದರದಲ್ಲಿ ಕಚ್ಚಾ ತೈಲವನ್ನು (Crude Oil) ಆಮದು ಮಾಡಿಕೊಳ್ಳುವುದನ್ನು ಮುಂದುವರೆಸಿತ್ತು.
“ನಾವು ಭಾರತವು ರಷ್ಯಾದ ತೈಲ ಖರೀದಿಸುವುದನ್ನು ತಡೆಯಲು 25% ಸುಂಕ ವಿಧಿಸಿದ್ದೇವೆ. ನಾವು ತ್ಯಾಗ ಮಾಡಲು ಸಿದ್ಧರಿದ್ದೇವೆ. ಆದರೆ, ಕಳೆದ ವಾರ ಏನಾಯಿತು ನೋಡಿ? ಯುರೋಪಿಯನ್ನರು ಭಾರತದೊಂದಿಗೆ ವ್ಯಾಪಾರ ಒಪ್ಪಂದಕ್ಕೆ ಸಹಿ ಹಾಕಿದ್ದಾರೆ,” ಎಂದು ಬೆಸ್ಸೆಂಟ್ ಅಸಮಾಧಾನ ಹೊರಹಾಕಿದ್ದಾರೆ.
ಭಾರತವು ರಷ್ಯಾದಿಂದ ಕಚ್ಚಾ ತೈಲವನ್ನು ತರಿಸಿಕೊಂಡು, ಅದನ್ನು ತನ್ನ ಸಂಸ್ಕರಣಾಗಾರಗಳಲ್ಲಿ (Refineries) ಪೆಟ್ರೋಲ್, ಡೀಸೆಲ್ ಆಗಿ ಪರಿವರ್ತಿಸಿ, ನಂತರ ಅದೇ ತೈಲವನ್ನು ಯುರೋಪ್ ದೇಶಗಳಿಗೆ ರಫ್ತು ಮಾಡುತ್ತಿದೆ. ಅಂದರೆ, ಯುರೋಪ್ ನೇರವಾಗಿ ರಷ್ಯಾದಿಂದ ತೈಲ ಖರೀದಿಸದಿದ್ದರೂ, ಭಾರತದ ಮೂಲಕ ರಷ್ಯಾದ ತೈಲವನ್ನೇ ಪರೋಕ್ಷವಾಗಿ ಬಳಸುತ್ತಿದೆ ಎಂಬುದು ಅಮೆರಿಕದ ವಾದ.
ಇದನ್ನೂ ಓದಿ | ವಿಶ್ವದ 3ನೇ 1ರಷ್ಟು ವ್ಯಾಪಾರ ವಹಿವಾಟು ಇನ್ಮುಂದೆ ಭಾರತ-ಇಯು ಹಿಡಿತದಲ್ಲಿ!
ಭಾರತ-ಇಯು ಒಪ್ಪಂದದ ಮಹತ್ವ
ಜನವರಿ 27, 2026 ರಂದು ಅಂತಿಮಗೊಂಡ ಭಾರತ-ಇಯು ಮುಕ್ತ ವ್ಯಾಪಾರ ಒಪ್ಪಂದವು ಸುಮಾರು 18 ವರ್ಷಗಳ ಮಾತುಕತೆಯ ಫಲವಾಗಿದೆ. ಇದು ಎರಡೂ ಕಡೆಯ ಆರ್ಥಿಕತೆಗೆ ಟ್ರಿಲಿಯನ್ ಡಾಲರ್ಗಟ್ಟಲೆ ಲಾಭ ತಂದುಕೊಡುವ ನಿರೀಕ್ಷೆಯಿದೆ. ಆದರೆ, ಈ ಒಪ್ಪಂದದಿಂದಾಗಿ ರಷ್ಯಾದ ಮೇಲಿನ ಅಂತಾರಾಷ್ಟ್ರೀಯ ಒತ್ತಡ ಕಡಿಮೆಯಾಗಬಹುದು ಮತ್ತು ಭಾರತದ ರಫ್ತು ವಹಿವಾಟಿಗೆ ಯುರೋಪ್ ದೊಡ್ಡ ಮಾರುಕಟ್ಟೆಯಾಗಿ ಸಿಗಲಿದೆ ಎಂಬುದು ಅಮೆರಿಕದ ಚಿಂತೆಯಾಗಿದೆ.
ವಿಶ್ಲೇಷಕರ ಪ್ರಕಾರ, ಅಮೆರಿಕದ ಈ ಪ್ರತಿಕ್ರಿಯೆಯ ಹಿಂದೆ ಅದರ ಸ್ವಂತ ಹಿತಾಸಕ್ತಿಯೂ ಇದೆ. ಭಾರತ ಮತ್ತು ಯುರೋಪ್ ನಡುವಿನ ಬಾಂಧವ್ಯ ಗಟ್ಟಿಯಾದರೆ, ಜಾಗತಿಕವಾಗಿ ಅಮೆರಿಕದ ಹಿಡಿತ ಸ್ವಲ್ಪಮಟ್ಟಿಗೆ ಸಡಿಲವಾಗಬಹುದು ಎಂಬ ಭಯ ಅಲ್ಲಿನ ಆಡಳಿತಕ್ಕಿರಬಹುದು. “ಒಂದೆಡೆ ರಷ್ಯಾವನ್ನು ಮಟ್ಟಹಾಕಲು ಯುರೋಪ್ ಹೆಣಗಾಡುತ್ತಿದೆ ಎನ್ನುತ್ತದೆ, ಮತ್ತೊಂದೆಡೆ ಅದೇ ಯುರೋಪ್ ರಷ್ಯಾಕ್ಕೆ ಪರೋಕ್ಷವಾಗಿ ನೆರವಾಗುವ ಒಪ್ಪಂದ ಮಾಡಿಕೊಳ್ಳುತ್ತಿದೆ,” ಎಂಬ ಬೆಸ್ಸೆಂಟ್ ಮಾತುಗಳು ಈಗ ಜಾಗತಿಕ ರಾಜಕೀಯದಲ್ಲಿ ಹೊಸ ಚರ್ಚೆಗೆ ನಾಂದಿ ಹಾಡಿವೆ.
