ನವದೆಹಲಿ: ತಮಿಳುನಾಡು ರಾಜ್ಯ ಮಾರ್ಕೆಟಿಂಗ್ ಕಾರ್ಪೊರೇಷನ್ (TASMAC) ಮೇಲೆ ಜಾರಿ ನಿರ್ದೇಶನಾಲಯ (ಇಡಿ) ನಡೆಸಿದ ದಾಳಿಗೆ ಸಂಬಂಧಿಸಿದಂತೆ ಗುರುವಾರ ಸುಪ್ರೀಂ ಕೋರ್ಟ್ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದೆ. ಇಡಿ ಎಲ್ಲಾ ಮಿತಿಗಳನ್ನು ಮೀರಿದೆ ಎಂದು ಮುಖ್ಯ ನ್ಯಾಯಮೂರ್ತಿ ಬಿ.ಆರ್.ಗವಾಯಿ ಮತ್ತು ನ್ಯಾಯಮೂರ್ತಿ ಎ.ಜಿ.ಮಸಿಹ್ ಅವರನ್ನೊಳಗೊಂಡ ಪೀಠ ಮೂರು ಬಾರಿ ಹೇಳಿತು. ಇಡಿಯ ದಾಳಿಗಳಿಗೆ ಸಂಬಂಧಿಸಿದ ಕಾರ್ಯವಿಧಾನಗಳಿಗೆ ತಡೆಯಾಜ್ಞೆ ನೀಡಿದ ಕೋರ್ಟ್, ಇಡಿಯ ಈ ಕ್ರಮವು ಒಕ್ಕೂಟ ತತ್ವಗಳನ್ನು ಉಲ್ಲಂಘಿಸುತ್ತಿದೆ ಎಂದು ಹೇಳಿದೆ.
“ಇಡಿ ಎಲ್ಲಾ ಮಿತಿಗಳನ್ನು ಮೀರಿದೆ, ಟಾಸ್ಮಾಕ್ ಮೇಲೆ ದಾಳಿ ನಡೆಸಲು ಇದಕ್ಕೆ ಹೇಗೆ ಸಾಧ್ಯ?” ಎಂದು ಸುಪ್ರೀಂ ಕೋರ್ಟ್ ಕೇಳಿತು. ತಮಿಳುನಾಡು ಸರ್ಕಾರವು ಇಡಿಯ ದಾಳಿಗಳನ್ನು ಪ್ರಶ್ನಿಸಿ ಸಲ್ಲಿಸಿದ ಅರ್ಜಿಗೆ ಪ್ರತಿಕ್ರಿಯೆಯಾಗಿ ಈ ತಡೆಯಾಜ್ಞೆ ನೀಡಲಾಯಿತು. ಇಡಿಗೆ ತನ್ನ ಪ್ರತಿಕ್ರಿಯೆ ಸಲ್ಲಿಸಲು ಕೋರ್ಟ್ ಎರಡು ವಾರಗಳ ಕಾಲಾವಕಾಶ ನೀಡಿದೆ.
ಇಡಿಯ ಕಾನೂನು ಅಧಿಕಾರಿಯು ಈ ಆದೇಶವನ್ನು ವಿರೋಧಿಸಿದರು, ಈ ಪ್ರಕರಣವು 1,000 ಕೋಟಿ ರೂಪಾಯಿಗಿಂತ ಹೆಚ್ಚಿನ ಭ್ರಷ್ಟಾಚಾರಕ್ಕೆ ಸಂಬಂಧಿಸಿದೆ ಎಂದು ವಾದಿಸಿದರು. ಆದರೆ, ಹಿರಿಯ ವಕೀಲರಾದ ಕಪಿಲ್ ಸಿಬಲ್ ಮತ್ತು ಅಮಿತ್ ಆನಂದ್ ತಿವಾರಿ ಅವರು, 2014ರಿಂದ ಮದ್ಯದಂಗಡಿ ಪರವಾನಗಿ ಹಂಚಿಕೆಗೆ ಸಂಬಂಧಿಸಿದಂತೆ ತಮಿಳುನಾಡು ಸರ್ಕಾರವೇ 40ಕ್ಕೂ ಹೆಚ್ಚು ಎಫ್‌ಐಆರ್‌ಗಳನ್ನು ದಾಖಲಿಸಿದೆ ಎಂದು ವಾದಿಸಿದರು. “ಈಗ ಇಡಿ ಇದರಲ್ಲಿ ತಲೆ ಹಾಕಿ ಟಾಸ್ಮಾಕ್ ಮೇಲೆ ದಾಳಿ ನಡೆಸುತ್ತಿದೆ,” ಎಂದು ಅವರು ಆಕ್ಷೇಪಿಸಿದರು.
ಡಿಎಂಕೆಯಿಂದ ಬಿಜೆಪಿಗೆ ಟೀಕೆ !
ಈ ಆದೇಶವು ಡಿಎಂಕೆ-ನೇತೃತ್ವದ ತಮಿಳುನಾಡು ಸರ್ಕಾರವನ್ನು ಕೆಡವಲು ಬಿಜೆಪಿಯ ಪ್ರಯತ್ನಕ್ಕೆ “ದೊಡ್ಡ ಹೊಡೆತ” ಎಂದು ಡಿಎಂಕೆಯ ಹಿರಿಯ ನಾಯಕಿ ಆರ್.ಎಸ್.ಭಾರತಿ ಹೇಳಿದರು. “2021ರಲ್ಲಿ ಅಧಿಕಾರಕ್ಕೆ ಬಂದ ಎಂ.ಕೆ.ಸ್ಟಾಲಿನ್ ನೇತೃತ್ವದ ಡಿಎಂಕೆ ಸರ್ಕಾರವು ಜನಪ್ರಿಯತೆ ಗಳಿಸುತ್ತಿದೆ. ಇದನ್ನು ಜೀರ್ಣಿಸಿಕೊಳ್ಳಲಾಗದ ಬಿಜೆಪಿ, ಇಡಿಯನ್ನು ಬಳಸಿಕೊಂಡು ಡಿಎಂಕೆಯನ್ನು ಕೆಡವಲು ಪ್ರಯತ್ನಿಸಿತು,” ಎಂದು ಭಾರತಿ ಆರೋಪಿಸಿದರು. ಇಡಿಯನ್ನು “ಬ್ಲಾಕ್‌ಮೇಲಿಂಗ್ ಸಂಸ್ಥೆ” ಎಂದು ಕರೆದ ಅವರು, ತಮಿಳುನಾಡು ಮತ್ತು ಕೇರಳದ ರಾಜ್ಯ ಪೊಲೀಸರು ಇಡಿ ಅಧಿಕಾರಿಗಳನ್ನು ಲಂಚದ ಆರೋಪದಲ್ಲಿ ಬಂಧಿಸಿದ ಘಟನೆಗಳನ್ನು ಉಲ್ಲೇಖಿಸಿದರು.
ಟಾಸ್ಮಾಕ್ ವಿವಾದ ಏನು?
ಕಳೆದ ವಾರ ಇಡಿ, ಟಾಸ್ಮಾಕ್‌ನ ವ್ಯವಸ್ಥಾಪಕ ನಿರ್ದೇಶಕ, ಐಎಎಸ್ ಅಧಿಕಾರಿ ಎಸ್.ವಿಶಾಕನ್ ಅವರ ಮನೆ ಸೇರಿದಂತೆ ಚೆನ್ನೈನ ಹಲವು ಸ್ಥಳಗಳಲ್ಲಿ ದಾಳಿ ನಡೆಸಿತು. ಬೆಳಗ್ಗೆ 6 ಗಂಟೆಗೆ ಆರಂಭವಾದ ಈ ದಾಳಿಗಳು, ಬೇಸಂತ್ ನಗರ, ಚೂಲೈಮೇಡು, ಅಣ್ಣಾಸಾಲೈ, ತೇಯ್ನಂಪೇಟ್, ಮತ್ತು ಟಿ.ನಗರದ ವಿವಿಧ ಸ್ಥಳಗಳಲ್ಲಿ ನಡೆದವು.
ಎಂಟು ಗಂಟೆಗಳ ದಾಳಿಯ ಬಳಿಕ ವಿಶಾಕನ್ ಮತ್ತು ಅವರ ಪತ್ನಿಯನ್ನು ನುಂಗಂಬಾಕ್ಕಂ ಕಚೇರಿಗೆ ವಿಚಾರಣೆಗೆ ಕರೆದೊಯ್ಯಲಾಯಿತು. ವಿಶಾಕನ್‌ಗೆ ಎರಡು ಬಾರಿ ಸಮನ್ಸ್ ಜಾರಿ ಮಾಡಿದ್ದರೂ ಅವರು ಪಾಲನೆ ಮಾಡಿರಲಿಲ್ಲ ಎಂದು ಇಡಿ ಮೂಲಗಳು ತಿಳಿಸಿವೆ. ಮಾರ್ಚ್‌ನಲ್ಲಿ ಟಾಸ್ಮಾಕ್ ಮುಖ್ಯ ಕಚೇರಿ, ಡಿಸ್ಟಿಲರಿಗಳು ಮತ್ತು ಬ್ರಿವರಿಗಳಲ್ಲಿ ದಾಳಿ ನಡೆಸಿದ ಇಡಿ, 1,000 ಕೋಟಿ ರೂ.ಗಿಂತಲೂ ಹೆಚ್ಚಿನ ಹಗರಣ ನಡೆದಿರುವ ಅನುಮಾನ ವ್ಯಕ್ತಪಡಿಸಿದೆ. ಈ ತನಿಖೆಯು 2016ರಿಂದ 2021ರವರೆಗೆ ದಾಖಲಾದ ಎಫ್‌ಐಆರ್‌ಗಳ ಆಧಾರದ ಮೇಲೆ ಭ್ರಷ್ಟಾಚಾರ ನಿಗ್ರಹ ಕಾಯ್ದೆ (PMLA) ಅಡಿಯಲ್ಲಿ ಆರಂಭವಾಯಿತು.
