ಬಾಲಿವುಡ್‌ನ ಖ್ಯಾತ ನಟಿ ದೀಪಿಕಾ ಪಡುಕೋಣೆ ಭಾರತೀಯ ಚಿತ್ರರಂಗಕ್ಕೆ ಜಾಗತಿಕ ಮಟ್ಟದಲ್ಲಿ ಹೊಸ ಮೈಲಿಗಲ್ಲನ್ನು ಸೃಷ್ಟಿಸಿದ್ದಾರೆ. ಹಾಲಿವುಡ್‌ನ ವಾಕ್ ಆಫ್ ಫೇಮ್‌ನಲ್ಲಿ ಸ್ಥಾನ ಪಡೆದ ಮೊದಲ ಭಾರತೀಯ ನಟಿ ಎಂಬ ಗೌರವಕ್ಕೆ ದೀಪಿಕಾ ಪಾತ್ರರಾಗಿದ್ದಾರೆ. 2026ರ ಸಾಲಿನ ಮೋಷನ್ ಪಿಕ್ಚರ್ ವಿಭಾಗದಲ್ಲಿ ಅವರ ಹೆಸರನ್ನು ಈ ಐತಿಹಾಸಿಕ ರಸ್ತೆಯಲ್ಲಿ ನಕ್ಷತ್ರದಾಕೃತಿಯೊಂದಿಗೆ ಚಿರಸ್ಥಾಯಿಯಾಗಿ ಸೇರಿಸಲಾಗುವುದು. ಈ ಗೌರವವು ಭಾರತೀಯ ಚಿತ್ರರಂಗದ ಜಾಗತಿಕ ಗುರುತನ್ನು ಇನ್ನಷ್ಟು ಬಲಪಡಿಸಿದೆ.
ಹಾಲಿವುಡ್ ಚೇಂಬರ್ ಆಫ್ ಕಾಮರ್ಸ್ ಜುಲೈ 2, 2025ರಂದು ಒವೇಶನ್ ಹಾಲಿವುಡ್‌ನಲ್ಲಿ ನಡೆದ ಲೈವ್ ಪ್ರೆಸ್ ಕಾನ್ಫರೆನ್ಸ್‌ನಲ್ಲಿ 2026ರ ವಾಕ್ ಆಫ್ ಫೇಮ್‌ಗೆ ಆಯ್ಕೆಯಾದ 35 ಕಲಾವಿದರ ಹೆಸರನ್ನು ಘೋಷಿಸಿತು. ಈ ಪಟ್ಟಿಯಲ್ಲಿ ದೀಪಿಕಾ ಪಡುಕೋಣೆ ಜೊತೆಗೆ ಎಮಿಲಿ ಬ್ಲಂಟ್, ಟಿಮೊಥಿ ಚಲಮೆಟ್, ರಾಮಿ ಮಾಲೆಕ್, ರಾಚೆಲ್ ಮೆಕ್‌ಅಡಮ್ಸ್, ಡೆಮಿ ಮೂರ್, ಮತ್ತು ಸ್ಟಾನ್ಲಿ ಟುಸ್ಸಿಯಂತಹ ಜಾಗತಿಕ ತಾರೆಯರ ಹೆಸರುಗಳಿವೆ. ಈ ಗೌರವಕ್ಕಾಗಿ ನೂರಾರು ನಾಮನಿರ್ದೇಶನಗಳಿಂದ ಕೇವಲ 20-24 ಹೆಸರಗಳನ್ನು ಆಯ್ಕೆ ಮಾಡಲಾಗುತ್ತದೆ, ಮತ್ತು ಈ ಬಾರಿ ದೀಪಿಕಾರ ಹೆಸರು ಈ ಗೌರವಕ್ಕೆ ಆಯ್ಕೆಯಾಗಿದೆ.
ದೀಪಿಕಾ 2007ರಲ್ಲಿ ‘ಓಂ ಶಾಂತಿ ಓಂ’ ಚಿತ್ರದ ಮೂಲಕ ಬಾಲಿವುಡ್‌ಗೆ ಪಾದಾರ್ಪಣೆ ಮಾಡಿದರು ಮತ್ತು 2017ರಲ್ಲಿ ‘XXX: ರಿಟರ್ನ್ ಆಫ್ ಝಾಂಡರ್ ಕೇಜ್’ ಚಿತ್ರದ ಮೂಲಕ ಹಾಲಿವುಡ್‌ಗೆ ಕಾಲಿಟ್ಟರು. ಅವರ ಈ ಸಾಧನೆಯು ಕೇವಲ ಚಿತ್ರರಂಗಕ್ಕೆ ಸೀಮಿತವಾಗಿಲ್ಲ; 2018ರಲ್ಲಿ ಟೈಮ್ ಮ್ಯಾಗಜೀನ್‌ನ 100 ಅತ್ಯಂತ ಪ್ರಭಾವೀ ವ್ಯಕ್ತಿಗಳ ಪಟ್ಟಿಯಲ್ಲಿ ಸ್ಥಾನ ಪಡೆದರು ಮತ್ತು 2022ರಲ್ಲಿ ಫಿಫಾ ವಿಶ್ವಕಪ್ ಟ್ರೋಫಿಯನ್ನು ಖತಾರ್‌ನಲ್ಲಿ ಅನಾವರಣಗೊಳಿಸಿದ ಮೊದಲ ಭಾರತೀಯರಾದರು. ಇದರ ಜೊತೆಗೆ, ಕಾರ್ಟಿಯರ್ ಮತ್ತು ಲೂಯಿಸ್ ವಿಟ್ಟನ್‌ನಂತಹ ಜಾಗತಿಕ ಐಷಾರಾಮಿ ಬ್ರಾಂಡ್‌ಗಳ ಮೊದಲ ಭಾರತೀಯ ರಾಯಭಾರಿಯಾಗಿ ದೀಪಿಕಾ ಗುರುತಿಸಿಕೊಂಡಿದ್ದಾರೆ.
ವಾಕ್ ಆಫ್ ಫೇಮ್‌ಗೆ ಆಯ್ಕೆಯಾದ ಕಲಾವಿದರ ಹೆಸರನ್ನು ರಸ್ತೆಯಲ್ಲಿ ನಕ್ಷತ್ರದಾಕೃತಿಯಲ್ಲಿ ಕೆತ್ತಲಾಗುತ್ತದೆ. ಈ ಪ್ರಕ್ರಿಯೆಗೆ $85,000 (ಸುಮಾರು 75 ಲಕ್ಷ ರೂ.) ವೆಚ್ಚವಾಗುತ್ತದೆ, ಇದನ್ನು ನಾಮನಿರ್ದೇಶನ ಮಾಡಿದವರು ಭರಿಸಬೇಕು. ಈ ಶುಲ್ಕವು ಸ್ಟಾರ್‌ನ ತಯಾರಿಕೆ, ಅಳವಡಿಕೆ, ಮತ್ತು ನಿರ್ವಹಣೆಗೆ ಬಳಸಲಾಗುತ್ತದೆ. ದೀಪಿಕಾರ ಹೆಸರನ್ನು ಯಾರು ನಾಮನಿರ್ದೇಶನ ಮಾಡಿದ್ದರೂ, ಈ ಗೌರವವು ಭಾರತೀಯ ಚಿತ್ರರಂಗಕ್ಕೆ ಒಂದು ದೊಡ್ಡ ಸಾಧನೆಯಾಗಿದೆ.
