ಬೆಂಗಳೂರು : ಇಟಾಲಿಯನ್ ಫ್ಯಾಷನ್ ಬ್ರಾಂಡ್ ಪ್ರಾಡಾದ 2026ರ ʻಸ್ಪ್ರಿಂಗ್-ಸಮ್ಮರ್ ಮೆನ್ಸ್ ಫ್ಯಾಷನ್ ಶೋʼದಲ್ಲಿ ರೂಪದರ್ಶಿಗಳು ಧರಿಸಿದ ಚಪ್ಪಲಿಗಳು ಭಾರತೀಯ ಕೊಲ್ಹಾಪುರಿ ಚಪ್ಪಲಿಗಳಿಗೆ ಹೋಲಿಕೆಯಾಗಿದ್ದು, ಇದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ. ಈ ಕಾರ್ಯಕ್ರಮದ ವಿಡಿಯೋ ವೈರಲ್ ಆದ ಬಳಿಕ, ಭಾರತೀಯ ಉಪಯೋಕ್ತರು ಪ್ರಾಡಾ ತಮ್ಮ ಪಾರಂಪರಿಕ ಉತ್ಪನ್ನವನ್ನು ನಕಲು ಮಾಡಿದೆ ಎಂದು ಆರೋಪಿಸಿ ಟೀಕೆಯ ಸುರಿಮಳೆ ಸುರಿದಿದ್ದಾರೆ. ಈ ಚಪ್ಪಲಿಗಳು ಕೊಲ್ಹಾಪುರಿ ಚಪ್ಪಲಿಗಳ ಸಾಂಪ್ರದಾಯಿಕ ವಿನ್ಯಾಸ ಮತ್ತು ತಯಾರಿಕೆಯ ಶೈಲಿಯನ್ನು ಪ್ರತಿಬಿಂಬಿಸುವಂತೆ ಇರುವುದು ಈ ವಿವಾದಕ್ಕೆ ಕಾರಣವಾಗಿದೆ. ಈ ಸಂದರ್ಭದಲ್ಲಿ, ಮಹಾರಾಷ್ಟ್ರ ವಾಣಿಜ್ಯ, ಕೈಗಾರಿಕೆ ಮತ್ತು ಕೃಷಿ ಮಂಡಳಿಯ ಅಧ್ಯಕ್ಷ ಲಲಿತ್ ಗಾಂಧಿ ಪ್ರಾಡಾದ ನಡೆಯ ಬಗ್ಗೆ ಆಕ್ಷೇಪ ವ್ಯಕ್ತಪಡಿಸಿದ್ದರು, ಇದೀಗ ಪ್ರಾಡಾ ತನ್ನ ತಪ್ಪನ್ನು ಒಪ್ಪಿಕೊಂಡು ಭಾರತೀಯ ಕರಕುಶಲತೆಯಿಂದ ಸ್ಫೂರ್ತಿ ಪಡೆದಿದ್ದೇವೆ ಎಂದು ಪತ್ರ ಬರೆದಿದೆ.
ಪ್ರಾಡಾದ ಈ ಫ್ಯಾಷನ್ ಶೋದಲ್ಲಿ ಪ್ರದರ್ಶಿಸಿದ ಚಪ್ಪಲಿಗಳು, ಚರ್ಮದಿಂದ ತಯಾರಾದ ಗಟ್ಟಿಯಾದ ಅಡಿಭಾಗ ಮತ್ತು ಕೈಯಿಂದ ಹೊಲಿಯಲಾದ ವಿನ್ಯಾಸಗಳು ಕೊಲ್ಹಾಪುರಿ ಚಪ್ಪಲಿಗಳ ಲಕ್ಷಣಗಳನ್ನು ತೋರಿಸುತ್ತವೆ. ಈ ಚಪ್ಪಲಿಗಳು 13ನೇ ಶತಮಾನದಿಂದ ಭಾರತೀಯ ಸಮಾಜದಲ್ಲಿ ಬಳಕೆಯಲ್ಲಿವೆ ಎಂದು ಇತಿಹಾಸಕಾರರು ತಿಳಿಸುತ್ತಾರೆ. ಒಂದು ಜೋಡಿ ಕೊಲ್ಹಾಪುರಿ ಚಪ್ಪಲಿ ತಯಾರಾಗಲು ಸರಾಸರಿ ಆರು ವಾರಗಳ ಅವಧಿ ಬೇಕಾಗುತ್ತದೆ. ಇವುಗಳು ಎಮ್ಮೆ ಚರ್ಮ ಮತ್ತು ದಾರದಿಂದ ತಯಾರಾಗುತ್ತವೆ, ಮತ್ತು ಮಹಾರಾಷ್ಟ್ರ ಹಾಗೂ ಕರ್ನಾಟಕದ ತಾಪಮಾನದಿಂದ ಪಾದ ರಕ್ಷಣೆಗೆ ಉಪಯುಕ್ತವಾಗಿವೆ. ಈ ಚಪ್ಪಲಿಗಳು ಜಿಐ ಟ್ಯಾಗ್ ಹೊಂದಿದ್ದು, ಇಂದಿಗೂ ಕೊಲ್ಹಾಪುರದ ಸುಮಾರು 10,000 ಕರಕುಶಲಕರ್ಮಿಗಳು ಒಂದು ವರ್ಷಕ್ಕೆ 6 ಲಕ್ಷ ಜೋಡಿಗಳನ್ನು ತಯಾರಿಸುತ್ತಾರೆ, ಇದರಲ್ಲಿ 30% ರಫ್ತಾಗುತ್ತದೆ.
ಪ್ರಾಡಾದ ಪತ್ರದಲ್ಲಿ, “ಭಾರತೀಯ ಕರಕುಶಲತೆಯ ಸಾಂಸ್ಕೃತಿಕ ಮಹತ್ವವನ್ನು ಗೌರವಿಸುತ್ತೇವೆ. ನಮ್ಮ ವಿನ್ಯಾಸಗಳು ಭಾರತದಲ್ಲಿ ತಯಾರಾದ ಪಾದರಕ್ಷೆಗಳಿಂದ ಸ್ಫೂರ್ತಿ ಪಡೆದವು” ಎಂದು ಉಲ್ಲೇಖಿಸಲಾಗಿದೆ. ಇತ್ತೀಚಿನ ದಿನಗಳಲ್ಲಿ, ಕೊಲ್ಹಾಪುರಿ ಚಪ್ಪಲಿಗಳು ಸಾಂಪ್ರದಾಯಿಕ ಮಾದರಿಗಳೊಂದಿಗೆ ಆಧುನಿಕ ವಿನ್ಯಾಸಗಳನ್ನು ಸೇರಿಸಿಕೊಂಡು ಜನಪ್ರಿಯತೆಯನ್ನು ಗಳಿಸುತ್ತಿವೆ. ಇವುಗಳ ಬೆಲೆ ಆರು ಸಾವಿರ ರೂಪಾಯಿಗಳವರೆಗೆ ಇದೆ.
ಕೊಲ್ಹಾಪುರಿ ಚಪ್ಪಲಿಗಳ ತಯಾರಿಕೆ ಪ್ರಕ್ರಿಯೆಯು ಕೈಯಿಂದ ಮಾಡಿದ ಒಂದು ಶಿಲ್ಪಕಲೆಯಾಗಿದೆ. ದಪ್ಪ ಚರ್ಮದ ಬೇಸ್ ಸಿದ್ಧಪಡಿಸಿ, ಚರ್ಮದ ಪದರಗಳನ್ನು ಸೇರಿಸಿ, ಸಾಂಪ್ರದಾಯಿಕ ಕಪ್ಪು ಮಣ್ಣಿನ ಜಿಗುಟಾದ ಮೂಲಕ ಗಟ್ಟಿಯಾಗಿಸಲಾಗುತ್ತದೆ. ಆನೆ, ಪಕ್ಷಿ ಚಿತ್ರಗಳ ಸಹಿತ ಮುದ್ರೆ ಒತ್ತಿ, ತೆಳುವಾದ ಚರ್ಮದ ಪಟ್ಟಿಗಳನ್ನು ಅಲಂಕರಿಸಿ, ಉಂಗುಷ್ಟದ ಲೂಪ್ ಸೇರಿಸಿ, ಫೈನಲ್ ಹೊಳಪು ನೀಡುವ ಮೂಲಕ ತಯಾರಿಸಲಾಗುತ್ತದೆ. ಈ ಪ್ರಕ್ರಿಯೆಯಲ್ಲಿ ಬಣ್ಣಗಳು ಮತ್ತು ಮೃದುತ್ವವನ್ನು ಸೇರಿಸಿ, ಗ್ರಾಹಕರ ಆಯ್ಕೆಗೆ ಅನುಗುಣವಾಗಿ ಮಾರಾಟ ಮಾಡಲಾಗುತ್ತದೆ.
