ಪದ್ಮಶ್ರೀ ಪುರಸ್ಕೃತ ಸಾಲುಮರದ ತಿಮ್ಮಕ್ಕ (114) ಇಂದು ವಿಧಿವಶರಾಗಿದ್ದಾರೆ. ಉಸಿರಾಟದ ಸಮಸ್ಯೆಯಿಂದ ತೀವ್ರ ತೊಂದರೆ ಅನುಭವಿಸುತ್ತಿದ್ದ ಅವರು ಬೆಂಗಳೂರಿನ ಜಯನಗರದ ಅಪೋಲೋ ಸ್ಪೆಷಲಿಟಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು. ಆದರೆ ಇಂದು ಮಧ್ಯಾಹ್ನ 12 ಗಂಟೆ ಸುಮಾರಿಗೆ ಚಿಕಿತ್ಸೆ ಫಲಿಸದೆ ತಮ್ಮ ಕೊನೆಯುಸಿರೇಳೆದಿದ್ದಾರೆ.
ಇದನ್ನೂ ಓದಿ | ‘ಗಡ್ಡಪ್ಪ’ ಖ್ಯಾತಿಯ ನಟ ಚನ್ನೇಗೌಡ ಇನ್ನಿಲ್ಲ
ಸಾಲುಮರದ ತಿಮ್ಮಕ್ಕ ಅವರು ತುಮಕೂರು ಜಿಲ್ಲೆಯ ಗುಬ್ಬಿ ತಾಲೂಕಿನ ಹುಲಿಕಲ್ ಗ್ರಾಮದಲ್ಲಿ 1911ರ ಜೂನ್ 30ರಂದು ಜನಿಸಿದ್ದರು. ತಿಮ್ಮಕ್ಕ ದಂಪತಿಗಳು ಮಕ್ಕಳಿಲ್ಲದ ದುಃಖವನ್ನು ಮರೆಯಲು ತನ್ನ ಪತಿ ಚಿಕ್ಕಯ್ಯನೊಂದಿಗೆ ರಾಮನಗರ ಜಿಲ್ಲೆಯ ಹುಲಿಕಲ್-ಕುದೂರು ಹೆದ್ದಾರಿ ಬದಿಯಲ್ಲಿ (4.5 ಕಿ.ಮೀ. ಉದ್ದ) 385 ಆಲದ ಮರಗಳನ್ನು ನೆಟ್ಟು, ಅವುಗಳನ್ನೇ ‘ಮಕ್ಕಳು’ ಎಂದು ಪೋಷಿಸಿದರು. ಇಂದು ಆ ಮರಗಳು ಗಟ್ಟಿಯಾಗಿ ಬೆಳೆದು ನಿಂತು ಪರಿಸರಕ್ಕೆ ನೆರಳು ಒದಗಿಸುತ್ತಿವೆ. ಈ ಅಪೂರ್ವ ಕಾರ್ಯಕ್ಕಾಗಿ ‘ಸಾಲುಮರದ ತಿಮ್ಮಕ್ಕ’ ಎಂದು ಖ್ಯಾತರಾದರು.
