ಅವಧಿ ಮೀರಿದ ಔಷಧಿಗಳನ್ನು ನೀವು ಹೇಗೆ ವಿಲೇವಾರಿ ಮಾಡುತ್ತೀರಿ? ನೀವು ಅವುಗಳನ್ನು ಕಸದ ಬುಟ್ಟಿಗೆ ಎಸೆಯುತ್ತೀರಾ? ಹಾಗಿದ್ದಲ್ಲಿ, ಭಾರತದ ಉನ್ನತ ಔಷಧಿ ನಿಯಂತ್ರಣ ಸಂಸ್ಥೆಯು ಒಂದು ಎಚ್ಚರಿಕೆಯನ್ನು ನೀಡಿದೆ.
ಕೇಂದ್ರ ಔಷಧಿ ಗುಣಮಟ್ಟ ನಿಯಂತ್ರಣ ಸಂಸ್ಥೆ (ಸಿಡಿಎಸ್ಸಿಒ) ಔಷಧಿಯ ಅವಧಿ ಮುಗಿದಿದ್ದರೆ ಅಥವಾ ಬಳಸದಿದ್ದರೆ ಕಸದ ಬುಟ್ಟಿಗೆ ಎಸೆಯುವ ಬದಲು ಶೌಚಾಲಯಕ್ಕೆ ಎಸೆಯಬೇಕು ಅಥವಾ ಫ್ಲಷ್ ಮಾಡಬೇಕು ಎಂದು ಹೇಳಿದ್ದು. ಅಂತಹ 17 ಔಷಧಿಗಳ ಪಟ್ಟಿಯನ್ನು ಬಿಡುಗಡೆ ಮಾಡಿದೆ. ಇಂತಹ ಔಷಧಿಗಳನ್ನು ಸರಿಯಾಗಿ ವಿಲೇವಾರಿ ಮಾಡದಿದ್ದರೆ, ಇವುಗಳು ಜನರು ಮತ್ತು ಪರಿಸರಕ್ಕೆ ಹಾನಿಕಾರಕವಾಗಬಹುದು ಎಂದು ಸಂಸ್ಥೆ ಎಚ್ಚರಿಸಿದೆ.
ಸಿಡಿಎಸ್ಸಿಒ ಪ್ರಕಾರ, ಈ 17ಔಷಧಿಗಳನ್ನು ಶಿಫಾರಸು ಮಾಡಿದ ವ್ಯಕ್ತಿಯನ್ನು ಹೊರತುಪಡಿಸಿ ಬೇರೆ ಯಾರಾದರೂ ತೆಗೆದುಕೊಂಡರೆ, ಕೇವಲ ಒಂದು ಡೋಸ್ನಲ್ಲಿಯೇ ಈ 17ಔಷಧಿಗಳು ಹಾನಿಕಾರಕ ಮತ್ತು ಮಾರಕವಾಗಬಹುದು.
ಪರಿಸರ ಮತ್ತು ಸಾರ್ವಜನಿಕ ಆರೋಗ್ಯವನ್ನು ರಕ್ಷಿಸಲು ಅವಧಿ ಮೀರಿದ ಅಥವಾ ಬಳಕೆಯಾಗದ ಔಷಧಿಗಳ ವಿಲೇವಾರಿ ಕುರಿತಾದ ತನ್ನ ಮಾರ್ಗದರ್ಶನ ದಾಖಲೆಯಲ್ಲಿ, ಅವಧಿ ಮೀರಿದ ಅಥವಾ ಬಳಸದ ಔಷಧಿಗಳ ಸುರಕ್ಷಿತ ಮತ್ತು ಸರಿಯಾದ ವಿಲೇವಾರಿ ಅಗತ್ಯವಿದೆ ಎಂದು ಹೇಳಿದೆ.
ಯಾವ ಔಷಧಿಗಳನ್ನು ಫ್ಲಷ್ ಮಾಡಬೇಕು?
ಸಿಡಿಎಸ್ಸಿಒ ಪಟ್ಟಿಮಾಡಿರುವ 17ಔಷಧಿಗಳಲ್ಲಿ ಹೆಚ್ಚಿನವು ಮಾದಕ ಔಷಧಿಗಳು. ಇವುಗಳನ್ನು ಚರಂಡಿಗೆ ಎಸೆಯಬೇಕು. ಇವುಗಳನ್ನು ಕಸದ ಬುಟ್ಟಿಗೆ ಎಸೆಯಬಾರದು.
ಪ್ರಬಲ ಒಪಿಯಾರ್ಡಗಳು, ಸೈಕೋ ಟ್ರೋಫಿಕ್ ರಾಸಾಯನಿಕಗಳಿರುವ ಫೆಂಟನಿಲ್, ಟ್ರಾಮಾಡಾಲ್, ಮಾರ್ಫಿನ್ ಸಲ್ಪೇಟ್, ಬುಪ್ರೆನಾರ್ಫಿನ್, ಮೀಥೈಲ್ಪಿನಿಡೇಟ್, ಟ್ಯಾಪೆಂಟಾಡಾಲ್, ಆಕ್ಸಿಕೊಡೋನ್ ಮತ್ತು ಡಯಾಜೆಪಮ್ ಸೇರಿ 17 ಔಷಧಗಳಿಗೆ ಇದು ಅನ್ವಯ.
