ಕನ್ನಡ ಚಿತ್ರರಂಗದ ಯುವ ನಟ ಸಂತೋಷ್ ಬಾಲರಾಜ್ (34) ಅವರು ಜಾಂಡೀಸ್ನಿಂದ ಉಂಟಾದ ಆರೋಗ್ಯ ಸಮಸ್ಯೆಯಿಂದಾಗಿ ಆಗಸ್ಟ್ 5, 2025ರಂದು ಬೆಂಗಳೂರಿನ ಕುಮಾರಸ್ವಾಮಿ ಲೇಔಟ್ನ ಸಾಗರ್ ಅಪೊಲೋ ಆಸ್ಪತ್ರೆಯಲ್ಲಿ ನಿಧನರಾದರು. ‘ಕರಿಯ 2’, ‘ಗಣಪ’, ‘ಕೆಂಪ’, ‘ಜನ್ಮ’, ‘ಬರ್ಕ್ಲೀ’ ಮತ್ತು ‘ಸತ್ಯಂ’ ಚಿತ್ರಗಳಲ್ಲಿ ನಾಯಕನಾಗಿ ನಟಿಸಿದ್ದ ಸಂತೋಷ್, ಕನ್ನಡ ಚಿತ್ರರಂಗದಲ್ಲಿ ತಮ್ಮದೇ ಆದ ಛಾಪು ಮೂಡಿಸಿದ್ದರು. ಕಳೆದ ಕೆಲ ದಿನಗಳಿಂದ ತೀವ್ರ ಅನಾರೋಗ್ಯದಿಂದ ಬಳಲುತ್ತಿದ್ದ ಅವರಿಗೆ ತೀವ್ರ ನಿಗಾ ಘಟಕದಲ್ಲಿ (ಐಸಿಯು) ಚಿಕಿತ್ಸೆ ನೀಡಲಾಗುತ್ತಿತ್ತು. ಆದರೆ, ಚಿಕಿತ್ಸೆ ಫಲಕಾರಿಯಾಗದೆ ಅವರು ಇಹಲೋಕ ತ್ಯಜಿಸಿದ್ದಾರೆ.
ಸಂತೋಷ್ ಬಾಲರಾಜ್ ಅವರ ತಂದೆ, ಹಿರಿಯ ನಿರ್ಮಾಪಕ ಆನೇಕಲ್ ಬಾಲರಾಜ್. ಅವರು ಕಳೆದ ವರ್ಷ (2024) ನಿಧನರಾಗಿದ್ದರು. ಆನೇಕಲ್ ಬಾಲರಾಜ್ ಅವರ ಸಂತೋಷ್ ಎಂಟರ್ಪ್ರೈಸಸ್ ಬ್ಯಾನರ್ನಡಿ ‘ಕರಿಯ’ (2003) ಮತ್ತು ‘ಕರಿಯ 2’ (2017) ಚಿತ್ರಗಳನ್ನು ನಿರ್ಮಿಸಿದ್ದರು. ಈ ಚಿತ್ರಗಳಲ್ಲಿ ಸಂತೋಷ್ ಕೂಡ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ‘ಕೆಂಪ’ ಚಿತ್ರದ ಮೂಲಕ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಿದ ಸಂತೋಷ್, ತಮ್ಮ ಸ್ವಾಭಾವಿಕ ನಟನೆಯಿಂದ ಗಮನ ಸೆಳೆದಿದ್ದರು. ‘ಗಣಪ’ ಚಿತ್ರದಲ್ಲಿ ಅವರ ಅಭಿನಯವು ವಿಶೇಷವಾಗಿ ಮೆಚ್ಚುಗೆಗೆ ಪಾತ್ರವಾಗಿತ್ತು.
ಕಳೆದ ತಿಂಗಳು ಜಾಂಡೀಸ್ನಿಂದ ಬಳಲುತ್ತಿದ್ದ ಸಂತೋಷ್, ಚಿಕಿತ್ಸೆ ಪಡೆದು ಗುಣಮುಖರಾಗಿದ್ದರು. ಆದರೆ, ಆಗಸ್ಟ್ ತಿಂಗಳ ಆರಂಭದಲ್ಲಿ ಅವರ ಆರೋಗ್ಯ ಮತ್ತೆ ಕ್ಷೀಣಿಸಿತು. ಜಾಂಡೀಸ್ನಿಂದ ಯಕೃತ್ತು ಮತ್ತು ಮೂತ್ರಕೋಶದ ಸಮಸ್ಯೆ ಉಂಟಾಗಿ, ಅವರ ದೇಹದಲ್ಲಿ ರೋಗವು ತೀವ್ರವಾಗಿ ಹರಡಿತು. ಕೂಡಲೇ ಅವರನ್ನು ಬನಶಂಕರಿಯ ಸಾಗರ್ ಅಪೊಲೋ ಆಸ್ಪತ್ರೆಗೆ ದಾಖಲಿಸಲಾಯಿತು. ಕೃತಕ ಉಸಿರಾಟದ ವ್ಯವಸ್ಥೆಯಡಿ ತೀವ್ರ ಚಿಕಿತ್ಸೆ ನೀಡಲಾಯಿತಾದರೂ, ಆರೋಗ್ಯ ಸ್ಥಿತಿ ಗಂಭೀರವಾಗಿತ್ತು. ಆಗಸ್ಟ್ 5ರ ಬೆಳಿಗ್ಗೆ 9:30ರ ಸುಮಾರಿಗೆ ಅವರು ಕೊನೆಯುಸಿರೆಳೆದರು.
ಇದನ್ನೂ ಓದಿ | ಕನ್ನಡ ಚಿತ್ರರಂಗದ ‘ಅಭಿನಯ ಸರಸ್ವತಿ’ ಬಿ.ಸರೋಜಾದೇವಿ ವಿಧಿವಶ
ಸಂತೋಷ್ ಬಾಲರಾಜ್ ಅವರಿಗೆ ವಿವಾಹವಾಗಿರಲಿಲ್ಲ. ಅವರ ತಾಯಿ ಮತ್ತು ಸಹೋದರಿಯೊಂದಿಗೆ ಬೆಂಗಳೂರಿನಲ್ಲಿ ವಾಸವಾಗಿದ್ದರು. ತಮ್ಮ ಸ್ವಾಭಾವಿಕ ಮತ್ತು ಆಕರ್ಷಕ ನಟನೆಯಿಂದ ಕಿರುತೆರೆಯಿಂದ ದೊಡ್ಡ ತೆರೆಯವರೆಗೆ ಗುರುತಿಸಿಕೊಂಡಿದ್ದ ಸಂತೋಷ್, ತಮ್ಮ ಸಿನಿಮಾಗಳ ಮೂಲಕ ಚಿತ್ರರಸಿಕರ ಮನಸ್ಸಿನಲ್ಲಿ ಛಾಪು ಮೂಡಿಸಿದ್ದರು. ಅವರ ಕೊನೆಯ ಎರಡು ಚಿತ್ರಗಳಾದ ‘ಬರ್ಕ್ಲೀ’ ಮತ್ತು ‘ಸತ್ಯಂ’ ಇನ್ನೂ ಬಿಡುಗಡೆಯಾಗಬೇಕಿವೆ. ಈ ಚಿತ್ರಗಳ ಮೂಲಕ ಅವರ ಕಲಾತ್ಮಕ ಪ್ರತಿಭೆಯನ್ನು ಪ್ರೇಕ್ಷಕರು ಮತ್ತೊಮ್ಮೆ ಕಾಣಲಿದ್ದಾರೆ.
ಸಂತೋಷ್ ಬಾಲರಾಜ್ ಅವರ ಅಕಾಲಿಕ ನಿಧನವು ಕನ್ನಡ ಚಿತ್ರರಂಗಕ್ಕೆ ತೀರಲಾರದ ನಷ್ಟವನ್ನುಂಟು ಮಾಡಿದೆ. ಕನ್ನಡ ಚಿತ್ರರಂಗವು ಇತ್ತೀಚಿನ ದಿನಗಳಲ್ಲಿ ಹಲವಾರು ಕಲಾವಿದರನ್ನು ಕಳೆದುಕೊಂಡಿದೆ. ಸಂತೋಷ್ ಬಾಲರಾಜ್ ಅವರಂತಹ ಯುವ ಪ್ರತಿಭೆಯ ನಿಧನವು ಚಿತ್ರರಂಗಕ್ಕೆ ಭಾರೀ ನಷ್ಟವಾಗಿದೆ. ಅವರ ಚಿತ್ರಗಳು ಮತ್ತು ನಟನೆಯು ಅಭಿಮಾನಿಗಳ ಮನಸ್ಸಿನಲ್ಲಿ ಶಾಶ್ವತವಾಗಿ ಉಳಿಯಲಿದೆ. ‘ಕರಿಯ 2’ ಚಿತ್ರದಲ್ಲಿ ಅವರು ತೋರಿದ ಛಲ ಮತ್ತು ‘ಗಣಪ’ ಚಿತ್ರದಲ್ಲಿ ಅವರ ಭಾವನಾತ್ಮಕ ಅಭಿನಯವು ಚಿತ್ರರಸಿಕರಿಗೆ ಎಂದಿಗೂ ಮರೆಯಲಾಗದ ಕ್ಷಣಗಳಾಗಿವೆ.
