ಬಿಹಾರದ ಮುಂಬರುವ ವಿಧಾನಸಭಾ ಚುನಾವಣೆಯನ್ನು ಗಮನದಲ್ಲಿಟ್ಟುಕೊಂಡು ಕೇಂದ್ರ ಸರ್ಕಾರವು ಜಿಎಸ್ಟಿ ವ್ಯವಸ್ಥೆಯನ್ನು ಸರಳೀಕರಣಗೊಳಿಸುವ ಮೂಲಕ ರಾಜ್ಯಕ್ಕೆ ವಾರ್ಷಿಕ ₹15,000 ಕೋಟಿ ರೂಪಾಯಿಗಳ ನಷ್ಟ ಉಂಟಾಗಲಿದೆ ಎಂದು ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಶುಕ್ರವಾರ ತೀವ್ರವಾಗಿ ಆರೋಪಿಸಿದ್ದಾರೆ.
ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಕೇಂದ್ರದ ಈ ಕೆಲಸವು ರಾಜ್ಯದ ಆರ್ಥಿಕ ಭದ್ರತೆಗೆ ಧಕ್ಕೆ ತರುತ್ತದೆ ಎಂದು ಆತಂಕ ವ್ಯಕ್ತಪಡಿಸಿ, ಜಿಎಸ್ಟಿ ವ್ಯವಸ್ಥೆಯನ್ನು 2017ರಲ್ಲಿ ಜಾರಿಗೊಳಿಸಿದ್ದು ಕೇಂದ್ರ ಸರ್ಕಾರವೇ. ಅದೇ ಸರ್ಕಾರವು ದರಗಳನ್ನು ನಿಗದಿಪಡಿಸಿ, ಕಳೆದ ಎಂಟು ವರ್ಷಗಳಿಂದಲೂ ಹೆಚ್ಚಿನ ದರಗಳ ಮೂಲಕ ಲಕ್ಷಾಂತರ ಕೋಟಿ ರೂಪಾಯಿಗಳನ್ನು ಸಂಗ್ರಹಿಸಿಕೊಂಡಿದೆ. ಈಗ ಬಿಹಾರದ ಚುನಾವಣೆಯ ಮುನ್ನ ಬಂದು, ದರಗಳನ್ನು ಕಡಿಮೆ ಮಾಡಿ ‘ಸರಳೀಕರಣ’ ಎಂದು ಹೇಳುತ್ತಿದ್ದಾರೆ. ಇದರಲ್ಲಿ ಜಿಎಸ್ಟಿ ಉತ್ಸವ ಆಚರಿಸುವ ಅಗತ್ಯವೇನು? ತಾವೇ ಹೆಚ್ಚಿಸಿದ ದರವನ್ನು ತಾವೇ ಕಡಿಮೆ ಮಾಡಿ, ತಮ್ಮ ಬೆನ್ನು ತಾವೇ ತಟ್ಟಿಕೊಳ್ಳುವ ಕೆಲಸದಲ್ಲಿ ಕೇಂದ್ರ ತೊಡಗಿದೆ ಎಂದು. “ಕಳೆದ ಎಂಟು ವರ್ಷಗಳಿಂದ ಹೆಚ್ಚಿನ ದರಗಳನ್ನು ವಿಧಿಸಿ ಸಂಗ್ರಹಿಸಿದ ಹಣವನ್ನು ಮರಳಿ ಜನರಿಗೆ ನೀಡುವರೇ? ಎಂದು ಪ್ರಶ್ನಿಸಿ, ಇದು ಬಿಹಾರದ ಚುನಾವಣೆಗಾಗಿಯೇ ಮಾಡಿದ್ದು” ಎಂದು ಆರೋಪಿಸಿದರು.
ತೆರಿಗೆ ಹಂಚಿಕೆಯಲ್ಲಿ ಕರ್ನಾಟಕ್ಕೆ ಅನ್ಯಾಯ
ಕೇಂದ್ರದ ಈ ನಿರ್ಧಾರವು ಎರಡು-ಸ್ಲ್ಯಾಬ್ ಜಿಎಸ್ಟಿ ಮಾದರಿಯನ್ನು ಒಳಗೊಂಡಿದ್ದು, ದರಗಳನ್ನು ಕಡಿಮೆ ಮಾಡುವ ಮೂಲಕ ತೆರಿಗೆ ಸಂಗ್ರಹಣೆಯನ್ನು ಸರಳಗೊಳಿಸುತ್ತದೆ ಎಂದು ಹೇಳಲಾಗಿದೆ. ಆದರೆ ಇದರಿಂದ ರಾಜ್ಯ ಸರ್ಕಾರಗಳಿಗೆ ದೊಡ್ಡ ನಷ್ಟವಾಗಲಿದೆ. ಕರ್ನಾಟಕದಂತಹ ಉನ್ನತ ಆರ್ಥಿಕ ರಾಜ್ಯಗಳು ಈ ತೆರಿಗೆಯಿಂದ ₹4.5 ಲಕ್ಷ ಕೋಟಿ ರೂಪಾಯಿಗಳನ್ನು ಕೇಂದ್ರಕ್ಕೆ ನೀಡುತ್ತವೆ, ಆದರೆ ಮರಳಿ ಪಡೆಯುವುದು ಕೇವಲ 14 ಪೈಸೆಗಳಷ್ಟು ಮಾತ್ರ. ಉತ್ತರ ಪ್ರದೇಶಕ್ಕೆ 17-18% ಅನುದಾನ ನೀಡುತ್ತಿರುವ ಕೇಂದ್ರ, ಕರ್ನಾಟಕಕ್ಕೆ ಕೇವಲ 3.5% ನೀಡುತ್ತಿದೆ ಎಂದು ಸಿಎಂ ಆಕ್ಷೇಪಿಸಿದರು. ಇದು ರಾಜಕೀಯ ಲಾಭಕ್ಕಾಗಿ ಅಳವಡಿಸಿಕೊಂಡ ನೀತಿ ಎಂದು ಟೀಕಿಸಿದರು.
ಈ ಜಿಎಸ್ಟಿ ಸರಳೀಕರಣದಿಂದ ರಾಜ್ಯಕ್ಕೆ ಉಂಟಾಗುವ ನಷ್ಟವು ₹15,000 ಕೋಟಿ ಎಂದು ಅಂದಾಜಿಸಲಾಗಿದೆ. ಇದರ ಜೊತೆಗೆ, 15ನೇ ಹಣಕಾಸು ಆಯೋಗದ ಶಿಫಾರಸುಗಳಂತಹ ವಿಶೇಷ ಅನುದಾನಗಳನ್ನೂ ಕೇಂದ್ರ ನಿರಾಕರಿಸಿದೆ. ಆಯೋಗವು ₹5,490 ಕೋಟಿ, ತಡೆಗಳ ಅಭಿವೃದ್ಧಿಗೆ ₹3,000 ಕೋಟಿ, ರಸ್ತೆ ನಿರ್ಮಾಣಕ್ಕೆ ₹3,000 ಕೋಟಿ ಮತ್ತು ಉಪ್ಪರ್ ಭದ್ರಾ ಯೋಜನೆಗೆ ₹5,000 ಕೋಟಿ ನೀಡುವಂತೆ ಶಿಫಾರಸು ಮಾಡಿತ್ತು. ಆದರೆ ಇವೆಲ್ಲವೂ ತಡೆಯಾಗಿವೆ. ಒಟ್ಟು ₹17,000 ಕೋಟಿ ಅನುದಾನಗಳನ್ನು ಕೇಂದ್ರ ಮಸಕರಿಸಿಕೊಂಡಿದೆ ಎಂದು ಸಿದ್ದರಾಮಯ್ಯರವರು ಆರೋಪಿಸಿದರು. “ಇದು ಕರ್ನಾಟಕದ ಆರ್ಥಿಕ ನ್ಯಾಯಕ್ಕೆ ಧಕ್ಕೆ. ನಾವು ರಾಜ್ಯದ ಗ್ಯಾರಂಟಿ ಯೋಜನೆಗಳನ್ನು ಜಾರಿಗೊಳಿಸುವಲ್ಲಿ ಎದುರಿಸುತ್ತಿರುವ ಸವಾಲುಗಳನ್ನು ಧೈರ್ಯದಿಂದ ಎದುರಿಸುತ್ತೇವೆ” ಎಂದು ಅವರು ಹೇಳಿದರು.
ಇದನ್ನೂ ಓದಿ| ಬಿಹಾರದಲ್ಲಿ 80,000 ಮುಸ್ಲಿಂ ಮತಗಳನ್ನು ಅಳಿಸಲು ಬಿಜೆಪಿ ಯೋಜನೆ!
ಸರಳೀಕರಣವನ್ನು ಸ್ವಾಗತಿಸುತ್ತೇವೆ ಆದರೆ ರಾಜ್ಯದ ಆದಾಯ ರಕ್ಷಣೆ ಮೊದಲು ಎಂದು ಸಿಎಂ ಸ್ಪಷ್ಟಪಡಿಸಿದರು. ಜಿಎಸ್ಟಿ ಸಂಗ್ರಹಣೆ 12-13% ಬೆಳವಣಿಗೆಯೊಂದಿಗೆ ಇರುವುದರಿಂದ, ರಾಜ್ಯಗಳಿಗೆ ಪರಿಹಾರ ನೀಡಬೇಕು. ಸಿಗರೇಟ್, ಗುಟ್ಕಾ, ಪಾನ್ ಮಸಾಲಾ ಮತ್ತು ಲಕ್ಸರಿ ಕಾರುಗಳ ಮೇಲೆ ಸೆಸ್ ಹಾಕಿ ಆ ಆದಾಯವನ್ನು ರಾಜ್ಯಗಳಿಗೆ ನೀಡಬೇಕು ಎಂದು ಅವರು ಸೂಚಿಸಿದರು. ಈಗಾಗಲೇ ಎಂಟು ರಾಜ್ಯಗಳು ದೆಹಲಿಯಲ್ಲಿ ಚರ್ಚೆ ನಡೆಸಿವೆ ಮತ್ತು ರಾಜ್ಯ ಕಂದಾಯ ಖಾತೆ ಸಚಿವ ಕೃಷ್ಣ ಬೈರೆ ಗೌಡ ಅವರು ಜಿಎಸ್ಟಿ ಕೌನ್ಸಿಲ್ ಸಭೆಯಲ್ಲಿ ಭಾಗವಹಿಸಲಿದ್ದಾರೆ.
ಕರ್ನಾಟಕದ ಬಿಜೆಪಿ ಸಂಸತ್ ಸದಸ್ಯರು ಮತ್ತು ಸಚಿವರು ಈ ವಿಷಯವನ್ನು ಸಂಸತ್ತಿನಲ್ಲಿ ಎತ್ತದ ಕಾರಣಕ್ಕೂ ಸಿದ್ದರಾಮಯ್ಯರವರು ಅಸಮದಾನ ವ್ಯಕ್ತಪಡಿಸಿದರು. “ಅವರ ಕೆಲಸವೇ ಮೋದಿ ಅವರನ್ನು ಪ್ರಶಂಸಿಸುವುದು, ರಾಜ್ಯದ ಒಳಿತಿಗಾಗಿ ಹೋರಾಡುವುದಲ್ಲ” ಎಂದು ಅವರು ಹೇಳಿದರು.
