ಡಿ.ವೈ. ಪಾಟೀಲ್ ಕ್ರೀಡಾಂಗಣದಲ್ಲಿ ಗುರುವಾರ ರಾತ್ರಿ ನಡೆದ ಐಸಿಸಿ ಮಹಿಳೆಯರ ಏಕದಿನ ಕ್ರಿಕೆಟ್ ವಿಶ್ವಕಪ್ 2025ರ ಎರಡನೇ ಸೆಮಿಫೈನಲ್ ಪಂದ್ಯದಲ್ಲಿ ಭಾರತ ಮಹಿಳಾ ತಂಡವು ಆಸ್ಟ್ರೇಲಿಯಾವನ್ನು 5 ವಿಕೆಟ್ಗಳ ಅಂತರದಿಂದ ಸೋಲಿಸಿ ಫೈನಲ್ಗೆ ಪ್ರವೇಶಿಸಿದೆ.
339 ರನ್ಗಳ ಗುರಿಯನ್ನು ಬೆನ್ನಟ್ಟಿದ ಭಾರತ 48.3 ಓವರ್ಗಳಲ್ಲಿ 341/5 ಸ್ಕೋರ್ ಮಾಡಿ ಗೆದ್ದ ಭಾರತ, ಮಹಿಳೆಯರ ಏಕದಿನ ಕ್ರಿಕೆಟ್ನಲ್ಲಿ ಇದುವರೆಗಿನ ಅತೀ ದೊಡ್ಡ ಚೇಸ್ ದಾಖಲೆ ಬರೆಯಿತು. 2005 ಮತ್ತು 2017ರ ನಂತರ ಇದು ಭಾರತಕ್ಕೆ ಮೂರನೇ ಬಾರಿಗೆ ಫೈನಲ್ ಪ್ರವೇಶವಾಗಿದ್ದು, ಆಸ್ಟ್ರೇಲಿಯಾದ ಸತತ 16 ವಿಶ್ವಕಪ್ ಪಂದ್ಯಗಳ ಗೆಲುವಿನ ಸರಣಿಯನ್ನು ಅಂತ್ಯಗೊಳಿಸಿತು.
ಟಾಸ್ ಗೆದ್ದ ಆಸ್ಟ್ರೇಲಿಯಾ ಮೊದಲು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡು 49.5 ಓವರ್ಗಳಲ್ಲಿ 338 ರನ್ಗಳಿಸಿ ಆಲೌಟ್ ಆಯಿತು. ಆರಂಭಿಕ ಆಟಗಾರ್ತಿ ಫೀಬಿ ಲಿಚ್ಫೀಲ್ಡ್ 93 ಎಸೆತಗಳಲ್ಲಿ 17 ಬೌಂಡರಿ ಮತ್ತು 3 ಸಿಕ್ಸರ್ಗಳೊಂದಿಗೆ 119 ರನ್ ಸಿಡಿಸಿ ತಂಡಕ್ಕೆ ಭದ್ರ ಬುನಾದಿ ಹಾಕಿದರು. ಎಲಿಸ್ ಪೆರ್ರಿ 88 ಎಸೆತಗಳಲ್ಲಿ 77 ರನ್ (6 ಬೌಂಡರಿ, 2 ಸಿಕ್ಸರ್), ತಹ್ಲಿಯಾ ಮ್ಯಾಗ್ರಾತ್ 45 ಎಸೆತಗಳಲ್ಲಿ 63 ರನ್ (4 ಬೌಂಡರಿ, 4 ಸಿಕ್ಸರ್) ಗಳಿಸಿದರು. ಆಶ್ಲೆ ಗಾರ್ಡ್ನರ್ ಸಹ ಉತ್ತಮ ಆಟವಾಡಿದರು. ಆದರೆ ಭಾರತದ ಬೌಲರ್ಗಳು ಕೊನೆಯ ಓವರ್ಗಳಲ್ಲಿ ಕಟ್ಟುನಿಟ್ಟಾಗಿ ಬೌಲಿಂಗ್ ಮಾಡಿ 118 ರನ್ಗಳಿಗೆ 8 ವಿಕೆಟ್ಗಳನ್ನು ಕಿತ್ತುಕೊಂಡರು.
339 ರನ್ಗಳ ಗುರಿಯನ್ನು ಬೆನ್ನತ್ತಿದ ಭಾರತಕ್ಕೆ ಆರಂಭದಲ್ಲೇ ಎರಡು ಆಘಾತಗಳನ್ನು ಅನುಭವಿಸಿತು. ಶಫಾಲಿ ವರ್ಮಾ 1.3 ಓವರ್ನಲ್ಲಿ 8 ರನ್ಗಳಿಗೆ ಎಲ್ಬಿಡಬ್ಲ್ಯೂ (ಕಿಮ್ ಗಾರ್ಥ್), ಸ್ಮೃತಿ ಮಂಧಾನ 9.2 ಓವರ್ನಲ್ಲಿ 24 ರನ್ಗಳಿಗೆ ಔಟಾದರು. 59/2 ಎಂಬ ಸ್ಥಿತಿಯಿಂದ ಜೆಮಿಮಾ ರೋಡ್ರಿಗಸ್ (134 ಎಸೆತ, 14 ಬೌಂಡರಿ, 127*) ಮತ್ತು ನಾಯಕಿ ಹರ್ಮನ್ಪ್ರೀತ್ ಕೌರ್ (88 ಎಸೆತ, 10 ಬೌಂಡರಿ, 2 ಸಿಕ್ಸರ್, 89) 156 ಎಸೆತಗಳಲ್ಲಿ 167 ರನ್ಗಳ ದಾಖಲೆಯ ಜೊತೆಯಾಟ ನಿರ್ಮಿಸಿದರು. ಇದು ವಿಶ್ವಕಪ್ ನಾಕೌಟ್ ಹಂತದಲ್ಲಿ ಭಾರತದ ಅತೀ ಹೆಚ್ಚು ರನ್ಗಳ ಜೊತೆಯಾಟವಾಯಿತು. ಜೆಮಿಮಾ 42ನೇ ಓವರ್ನಲ್ಲಿ ತಮ್ಮ ಮೊದಲ ವಿಶ್ವಕಪ್ ಶತಕ ಪೂರೈಸಿದರು.
ಇದನ್ನೂ ಓದಿ | ನಾರ್ವೆ ವಿಶ್ವ ಚಾಂಪಿಯನ್ಶಿಪ್: ಮೀರಾಬಾಯಿ ಚಾನುಗೆ ಬೆಳ್ಳಿ ಪದಕ
ಕೊನೆಯ 6 ಓವರ್ಗಳಲ್ಲಿ 48 ರನ್ ಅಗತ್ಯವಿದ್ದಾಗ, ಜೆಮಿಮಾ ದೊಡ್ಡ ಹೊಡೆತಗಳೊಂದಿಗೆ ಆಟವನ್ನು ಮುನ್ನಡೆಸಿದರು. 48.3 ಓವರ್ನಲ್ಲಿ ಅಮಾನ್ಜೋತ್ ಕೌರ್ ಬೌಂಡರಿ ಹೊಡೆದು ಗೆಲುವು ಖಚಿತಪಡಿಸಿದರು.
ಈ ಗೆಲುವು ಮಹಿಳೆಯರ ಏಕದಿನ ಕ್ರಿಕೆಟ್ನಲ್ಲಿ ಅತೀ ದೊಡ್ಡ ಚೇಸ್ (339) ಮತ್ತು ನಾಕೌಟ್ ಹಂತದಲ್ಲಿ ಅತೀ ದೊಡ್ಡ ಚೇಸ್ ಎಂಬ ದಾಖಲೆಗಳನ್ನು ನಿರ್ಮಿಸಿತು. ಭಾರತ ಭಾನುವಾರ ಡಿ.ವೈ. ಪಾಟೀಲ್ ಕ್ರೀಡಾಂಗಣದಲ್ಲೇ ದಕ್ಷಿಣ ಆಫ್ರಿಕಾವನ್ನು ಎದುರಿಸಿ ಫೈನಲ್ ಆಡಲಿದೆ.
