ರಾಜ್ಯ ಸರ್ಕಾರದಿಂದ ಘೋಷಿಸಿರುವ ಕಸ ಗುಡಿಸುವ ಯಂತ್ರಗಳ ಬಾಡಿಗೆ ಯೋಜನೆಯು ರಾಜಕೀಯ ಮತ್ತು ಸಾರ್ವಜನಿಕ ವಲಯಗಳಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ. ಗ್ರೇಟರ್ ಬೆಂಗಳೂರು ಅಥಾರಿಟಿ (ಜಿಬಿಎ)ಯ ನಿರ್ದೇಶನದ ಮೇರೆಗೆ ನವೆಂಬರ್ 13ರಂದು ಸಭೆಯಲ್ಲಿ ಒಪ್ಪಿದ ರಾಜ್ಯ ಕ್ಯಾಬಿನೆಟ್, 46 ಕಸ ಗುಡಿಸುವ ಮೆಕ್ಯಾನಿಕಲ್ ರಸ್ತೆ ಸ್ವೀಪರ್ ಯಂತ್ರಗಳನ್ನು 7 ವರ್ಷಗಳ ಅವಧಿಗೆ ಬಾಡಿಗೆಗೆ ಪಡೆಯಲು 613.25 ಕೋಟಿ ರೂಪಾಯಿಗಳ ಖರ್ಚನ್ನು ಅನುಮೋದಿಸಿದೆ.
ಈ ನಿರ್ಧಾರಕ್ಕೆ ವಿರೋಧ ಪಕ್ಷಗಳಾದ ಬಿಜೆಪಿ ಮತ್ತು ಜೆಡಿಎಸ್ ತೀವ್ರ ವಿರೋಧ ವ್ಯಕ್ತಪಡಿಸುತ್ತಿವೆ, ಇದರ ಹಿನ್ನೆಲೆಯಲ್ಲಿ, ಕೇಂದ್ರ ಸರ್ಕಾರದ ಸ್ವಚ್ಛ ಭಾರತ ಅಭಿಯಾನದಡಿ ಒಂದು ಯಂತ್ರಕ್ಕೆ ಕೇವಲ 82 ಲಕ್ಷ ರೂಪಾಯಿಗಳಲ್ಲಿ ಖರೀದಿ ಮಾಡಬಹುದಾದ ಸಾಧ್ಯತೆಯಿದ್ದರೂ, ರಾಜ್ಯ ಸರ್ಕಾರವು ಬಾಡಿಗೆ ಮಾರ್ಗವನ್ನು ಆಯ್ಕೆ ಮಾಡಿರುವುದು ಎಷ್ಟು ಸಮಂಜಸವೆಂದು ಪ್ರಶ್ನೆಗಳು ಎದ್ದಿವೆ.
ವಿರೋಧ ಪಕ್ಷದ ನಾಯಕ ಆರ್. ಅಶೋಕ್ ಅವರು ಈ ಯೋಜನೆಯನ್ನು ಟೀಕಿಸಿದ್ದಾರೆ. “44 ಯಂತ್ರಗಳನ್ನು (ಸಚಿವ ಸಚಿವಾಲಯದ ಪ್ರಕಾರ 46) 613 ಕೋಟಿ ರೂಪಾಯಿಗಳಿಗೆ ಬಾಡಿಗೆಗೆ ಪಡೆಯುವುದು ಎಷ್ಟು ಸರಿ? ಕೇಂದ್ರ ಸರ್ಕಾರ ಸ್ವಚ್ಛ ಭಾರತದಡಿ 82 ಲಕ್ಷಕ್ಕೊಂದು ಯಂತ್ರವನ್ನು ಖರೀದಿ ಮಾಡಿ ರಾಜ್ಯಕ್ಕೆ ಕೊಡುತ್ತಿದೆ. ಇದರ ಬದಲಿಗೆ ನಾವು ಬಾಡಿಗೆಗೆ ಹೋಗುತ್ತಿದ್ದೇವೆಯೇ? 45 ಯಂತ್ರಗಳನ್ನು 308 ಕೋಟಿಗೆ ಸ್ವಂತವಾಗಿ ಖರೀದಿ ಮಾಡಬಹುದಿತ್ತು. ಉಳಿದ 300 ಕೋಟಿ ರೂಪಾಯಿಗಳು ಯಾರ ಪಾಲಿಗೆ? ಇದು ಸ್ಪಷ್ಟ ಲೂಟಿ! ನಾವು ಈ ವಿರುದ್ಧ ಹೋರಾಟ ಮಾಡುತ್ತೇವೆ” ಎಂದು ಅಶೋಕ್ ವಾಗ್ದಾಳಿ ನಡೆಸಿದ್ದಾರೆ.
ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ವೈ. ವಿಜಯೇಂದ್ರ ಅವರೂ, “ಜಿಬಿಎಯಲ್ಲಿ ಈಗಿರುವ 26 ಸ್ವೀಪರ್ ಯಂತ್ರಗಳು ಧೂಳುಹಿಡಿದಿವೆ. ಇದರ ಮೇಲೆ 46 ಹೊಸದು ಖರೀದಿಸಿ 613 ಕೋಟಿ ಖರ್ಚು ಮಾಡುವುದು ಅಸಮರ್ಥ ಸರ್ಕಾರದ ಗುಣ!” ಎಂದು ಟೀಕಿಸಿದ್ದಾರೆ.
ಇದನ್ನೂ ಓದಿ | “ಇಂದಿನ ಸಿಎಂ ಅಂದು ನನ್ನ ಮಗನ ಸರ್ಕಾರ ಕೆಡವಿದ್ದರು”: ಎಚ್ಡಿಡಿ
ಜೆಡಿಎಸ್ ನಾಯಕ ನಿಖಿಲ್ ಕುಮಾರಸ್ವಾಮಿ ಅವರೂ ಈ ವಿಷಯದಲ್ಲಿ ತೀವ್ರ ಅಸಮಾಧಾನ ವ್ಯಕ್ತಪಡಿಸಿ. “ಬಜಾರದಲ್ಲಿ ಒಂದು ಸ್ವಉಪ್ರೊಪೆಲ್ಡ್ ಸ್ವೀಪರ್ ಯಂತ್ರದ ಬೆಲೆ 1.13 ಕೋಟಿಯಿಂದ 3 ಕೋಟಿಗೆ ಇದೆ. ಆದರೆ ಜಿಬಿಎ 1.9 ಕೋಟಿಗೆ ವಾರ್ಷಿಕ ಬಾಡಿಗೆ ನೀಡಿ 7 ವರ್ಷಗಳಲ್ಲಿ 613 ಕೋಟಿ ಖರ್ಚು ಮಾಡುತ್ತಿದೆ. 26 ಯಂತ್ರಗಳು ಬಳಕೆಗೆ ಇಲ್ಲದಿರುವಾಗ ಹೊಸದು ಬಾಡಿಗೆಗೆ ಹೋಗುವುದು ಏಕೆ?” ಎಂದು ಪ್ರಶ್ನಿಸಿದ್ದಾರೆ.
ಸಂಸದೆ ಶೋಭಾ ಕರಂದ್ಲಾಜೆ ಅವರು ಸಹ, “ಯಂತ್ರಗಳು, ಚಾಲಕರ ಸಂಬಳ ಮತ್ತು ನಿರ್ವಹಣೆ ಸೇರಿಸಿದರೂ ಒಟ್ಟು ಖರ್ಚು 100 ಕೋಟಿಗೆ ಸೀಮಿತವಾಗಬೇಕು. ಆದರೆ 613 ಕೋಟಿ ಖರ್ಚು ಮಾಡುವುದು ಎಲ್ಲಿ ಹೋಗುತ್ತಿದೆ? ಉಳಿದ 500 ಕೋಟಿ ಯಾರ ಜೇಬಿಗೆ? ಈ ನಿರ್ಧಾರವನ್ನು ತಕ್ಷಣ ರದ್ದುಪಡಿಸಿ, ಪಾರದರ್ಶಕತೆ ಖಾತರಿಪಡಿಸಿ” ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
