1859 ನವೆಂಬರ್ 24ರಂದು ಚಾರ್ಲ್ಸ್ ಡಾರ್ವಿನ್ ಅವರ ಅತ್ಯಂತ ಪ್ರಸಿದ್ಧ ಕೃತಿ “ಆನ್ ದಿ ಒರಿಜಿನ್ ಆಫ್ ಸ್ಪೀಶೀಸ್ ಬೈ ಮೀನ್ಸ್ ಆಫ್ ನ್ಯಾಚುರಲ್ ಸೆಲೆಕ್ಷನ್”(“On the Origin of Species by Means of Natural Selection”) ಪ್ರಕಟವಾಯಿತು. ಈ ಪುಸ್ತಕ ಆಧುನಿಕ ಜೀವವಿಜ್ಞಾನದ ಇತಿಹಾಸದಲ್ಲಿ ತಿರುವು ಮೂಡಿಸಿದ ಮಹತ್ತ್ವದ ಘಟನೆಯಾಗಿದೆ. ಡಾರ್ವಿನ್ ಅವರು ಗಲಾಪಾಗೋಸ್ ದ್ವೀಪಗಳಲ್ಲಿ ನಡೆಸಿದ ನಿರೀಕ್ಷಣೆಗಳು, ಫಿಂಚ್ ಹಕ್ಕಿಗಳ ಬಾಯಿಯ ಆಕಾರದ ವ್ಯತ್ಯಾಸಗಳು, ಭೂವೈಜ್ಞಾನಿಕ ದಾಖಲೆಗಳು ಮತ್ತು ರೈತರು ಪಶು ಹಾಗೂ ಸಸ್ಯಗಳಲ್ಲಿ ಮಾಡುತ್ತಿದ್ದ ಕೃತಕ ಆಯ್ಕೆಯ(artificial selection) ಅಧ್ಯಯನದಿಂದ “ಪ್ರಾಕೃತಿಕ ಆಯ್ಕೆ” (Natural Selection) ಎಂಬ ಕಲ್ಪನೆಯನ್ನು ರೂಪಿಸಿದರು. ಈ ಸಿದ್ಧಾಂತದ ಪ್ರಕಾರ, ಪರಿಸರಕ್ಕೆ ಹೊಂದಿಕೊಳ್ಳಲು ಸಮರ್ಥವಾದ ಗುಣಲಕ್ಷಣಗಳನ್ನು ಹೊಂದಿದ ಜೀವಿಗಳು ಮಾತ್ರ ಬದುಕಿ ಸಂತಾನೋತ್ಪತ್ತಿ ಮಾಡುತ್ತವೆ ಮತ್ತು ಕಾಲಾಂತರದಲ್ಲಿ ಪ್ರಜಾತಿಗಳು ಬದಲಾಗುತ್ತವೆ ಅಥವಾ ಹೊಸ ಪ್ರಜಾತಿಗಳು ಉದ್ಭವಿಸುತ್ತವೆ.
ಇದನ್ನೂ ಓದಿ | ಇವತ್ತು | ನವೆಂಬರ್ 23, 1992 | ವಿಶ್ವದ ಮೊದಲ ಸ್ಮಾರ್ಟ್ಫೋನ್ ಪರಿಚಯ
ಪುಸ್ತಕ ಪ್ರಕಟವಾದ ತಕ್ಷಣ ಇದು ವಿಜ್ಞಾನ ಲೋಕದ ಜೊತೆಗೆ ಧಾರ್ಮಿಕ ಮತ್ತು ಸಾಮಾಜಿಕ ಕ್ಷೇತ್ರಗಳಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಯಿತು. ಆ ಕಾಲದಲ್ಲಿ ಬೈಬಲ್ನ ಸೃಷ್ಟಿವಾದದ (Creationism) ಪ್ರಭಾವ ಅಪಾರವಾಗಿದ್ದ ಕಾರಣ, ಮನುಷ್ಯ ಸೇರಿದಂತೆ ಎಲ್ಲ ಎಲ್ಲಾ ಜೀವಿಗಳೂ ಒಂದೇ ಪೂರ್ವಜರಿಂದ ವಿಕಾಸಗೊಂಡವು ಎಂಬ ಡಾರ್ವಿನ್ನ ನಿರ್ಧಾರ ತೀವ್ರ ವಿರೋಧಕ್ಕೆ ಗುರಿಯಾಯಿತು. ಆದರೆ ಕೇವಲ ಕೆಲವೇ ದಶಕಗಳಲ್ಲಿ ಈ ಸಿದ್ಧಾಂತಕ್ಕೆ ವಿಜ್ಞಾನಿಗಳ ವ್ಯಾಪಕ ಬೆಂಬಲ ದೊರೆತು ಆಧುನಿಕ ಜೀವವಿಕಾಸ ಸಿದ್ಧಾಂತದ ಅಡಿಗಲ್ಲಾಯಿತು. ಇಂದಿಗೂ ಈ ಕೃತಿ ಜೀವಶಾಸ್ತ್ರ, ಆನುವಂಶಿಕ ಶಾಸ್ತ್ರ, ಪರಿಸರ ವಿಜ್ಞಾನ ಹಾಗೂ ಔಷಧ ಶಾಸ್ತ್ರದ ಮೇಲೆ ಅಪಾರ ಪ್ರಭಾವ ಬೀರುತ್ತದೆ ಮತ್ತು “ವಿಜ್ಞಾನ ಇತಿಹಾಸದ ಅತ್ಯಂತ ಪ್ರಭಾವಿ ಗ್ರಂಥಗಳಲ್ಲಿ” ಒಂದೆಂದು ಗೌರವ ಪಡೆದಿದೆ.
