ಕರ್ನಾಟಕ ಕಾಂಗ್ರೆಸ್ನಲ್ಲಿ ಮುಖ್ಯಮಂತ್ರಿ ಕುರ್ಚಿ ಕದನ ಈಗ ಸಾಮಾಜಿಕ ಜಾಲತಾಣದಲ್ಲಿ ತಾರಕಕ್ಕೇರಿದೆ. ಮುಖ್ಯಮಂತ್ರಿ ಸಿದ್ದರಾಮಯ್ಯ ಮತ್ತು ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ನಡುವಿನ ‘ಕೊಟ್ಟ ಮಾತು’ ಸಮರ ನವೆಂಬರ್ 27ರ ಬುಧವಾರ ಸಂಜೆಯಿಂದ ಆರಂಭವಾಯಿತು. ಒಂದೇ ದಿನದಲ್ಲಿ ಇಬ್ಬರೂ ತಮ್ಮ ಎಕ್ಸ್ ಖಾತೆಯಲ್ಲಿ ಪರಸ್ಪರ ಟಾಂಗ್ ಕೊಡುವ ಪೋಸ್ಟ್ಗಳನ್ನು ಹಾಕಿ ರಾಜ್ಯ ರಾಜಕಾರಣವನ್ನೇ ಬಿಸಿಮಾಡಿದ್ದಾರೆ.
ಮೊದಲು ಡಿ.ಕೆ. ಶಿವಕುಮಾರ್ ಅವರು ತಮ್ಮ ಎಕ್ಸ್ (ಟ್ವಿಟರ್) ಸಾಮಾಜಿಕ ಜಾಲತಾಣದಲ್ಲಿ “ಕೊಟ್ಟ ಮಾತು ಉಳಿಸಿಕೊಳ್ಳುವುದೇ ಜಗತ್ತಿನ ಅತ್ಯಂತ ದೊಡ್ಡ ಶಕ್ತಿ. ನ್ಯಾಯಾಧೀಶರಾಗಲೀ, ರಾಷ್ಟ್ರಪತಿಗಳಾಗಲೀ, ನಾನಾಗಲೀ – ಎಲ್ಲರೂ ಕೊಟ್ಟ ಮಾತಿಗೆ ಬದ್ಧರಾಗಿರಬೇಕು.” ಎಂದು ಬರೆದಿದ್ದರು.
ಈ ಒಂದು ವಾಕ್ಯವೇ ಸಾಕಾಯಿತು – 2023ರ ವಿಧಾನಸಭೆ ಚುನಾವಣೆಯಲ್ಲಿ ಸಿದ್ದರಾಮಯ್ಯ ಅವರೊಂದಿಗೆ ಮಾಡಿಕೊಂಡ ‘ಎರಡೂವರೆ + ಎರಡೂವರೆ ವರ್ಷ’ ಒಪ್ಪಂದದ ಕಡೆಯ ಆರು ತಿಂಗಳು ಬಾಕಿ ಇರುವಾಗಲೇ ಡಿ.ಕೆ.ಶಿ ಬೆಂಬಲಿಗರಲ್ಲಿ ಜೋಷ ತುಂಬಿತು.
ಇದಕ್ಕೆ ತಕ್ಷಣವೇ ಸಿದ್ದರಾಮಯ್ಯ ಪ್ರತಿಕ್ರಿಯೆ ಎನ್ನುವಂತೆ ಅವರ ಎಕ್ಸ್ ಖಾತೆಯಲ್ಲಿ “ರಾಜ್ಯದ ಜನತೆಗೆ ನಾವು ಕೊಟ್ಟ ಮಾತು ಕೇವಲ ಘೋಷಣೆ ಅಲ್ಲ, ಅದು ನಮಗೆ ಜಗತ್ತು. ಮಾತು ಎಂದರೆ ಶಕ್ತಿ ಅಲ್ಲ, ಜನರ ಹಿತಕ್ಕಾಗಿ ಲೋಕವನ್ನು ಉತ್ತಮಗೊಳಿಸಿದಾಗ ಮಾತ್ರ ಅದು ಶಕ್ತಿಯಾಗುತ್ತದೆ.”
ಜೊತೆಗೆ ಗ್ಯಾರಂಟಿ ಯೋಜನೆಗಳ ಯಶಸ್ಸನ್ನು ಎಣಿಸಿದರು – “ಶಕ್ತಿ ಯೋಜನೆಯಡಿ ಮಹಿಳೆಯರಿಗೆ 600 ಕೋಟಿಗೂ ಹೆಚ್ಚು ಉಚಿತ ಪ್ರಯಾಣ, ಮೊದಲ ತಿಂಗಳಿನಿಂದಲೇ ಭರವಸೆಗಳನ್ನು ಕಾರ್ಯರೂಪಕ್ಕೆ ತಂದಿದ್ದೇವೆ. ಮಾತಿನಲ್ಲಿ ಅಲ್ಲ, ಕೆಲಸದಲ್ಲಿ.”
ಸಿದ್ದರಾಮಯ್ಯ ಇನ್ನಷ್ಟು ಮುಂದೆ ಹೋಗಿ ಅಂಕಿಅಂಶಗಳನ್ನೂ ನೀಡಿದರು:
- 2013-18ರ ಅವಧಿಯಲ್ಲಿ 165 ಭರವಸೆಗಳಲ್ಲಿ 157 ಈಡೇರಿಕೆ
- ಪ್ರಸಕ್ತ ಅವಧಿಯಲ್ಲಿ 593 ಭರವಸೆಗಳಲ್ಲಿ ಈಗಾಗಲೇ 243ಕ್ಕೂ ಹೆಚ್ಚು ಈಡೇರಿಕೆ “ಉಳಿದ ಎಲ್ಲವನ್ನೂ ಬದ್ಧತೆಯಿಂದ ಈಡೇರಿಸುತ್ತೇವೆ. ಕರ್ನಾಟಕದ ಜನರು ನೀಡಿದ ಜನಾದೇಶ 5 ವರ್ಷಗಳದ್ದು, ಒಂದು ಕ್ಷಣದ್ದಲ್ಲ” ಎಂದು ಡಿ.ಕೆ.ಶಿ ಬಳಸಿದ ‘ಜಗತ್ತು’ ಪದವನ್ನೇ ತಿರುಗಿಸಿ ಉಪಯೋಗಿಸಿದ್ದು ರಾಜಕೀಯ ವಲಯದಲ್ಲಿ ಚರ್ಚೆಗೆ ಗ್ರಾಸವಾಯಿತು.
ಈ ಪೋಸ್ಟ್ ತರ್ಕ ಹಿನ್ನೆಲೆಯಲ್ಲಿ ಡಿ.ಕೆ. ಶಿವಕುಮಾರ್ ಬೆಂಬಲಿಗರು “2.5 ವರ್ಷದ ಒಪ್ಪಂದ ಮುಗಿಯುತ್ತಿದೆ, ಮಾತು ಉಳಿಸಬೇಕು” ಎಂದು ಒತ್ತಡ ಹೇರತೊಡಗಿದ್ದಾರೆ. ಆದರೆ ಸಿದ್ದರಾಮಯ್ಯ ಬಣ “ಗ್ಯಾರಂಟಿ ಯೋಜನೆಗಳ ಯಶಸ್ಸಿನ ಮಧ್ಯೆ ಸರ್ಕಾರ ಬದಲಿಸುವುದು ಜನವಿರೋಧಿ” ಎಂದು ಪ್ರತಿಯಾಗಿ ವಾದಿಸುತ್ತಿದೆ.
ಇದನ್ನೂ ಓದಿ | ಕೊಟ್ಟ ಮಾತು ಉಳಿಸಿಕೊಳ್ಳುವುದೇ ವಿಶ್ವದಲ್ಲಿರುವ ದೊಡ್ಡ ಶಕ್ತಿ: ಡಿಕೆಶಿ
ದೆಹಲಿಯ ಹೈಕಮಾಂಡ್ ಈಗಾಗಲೇ ಡಿ.ಕೆ. ಶಿವಕುಮಾರ್ಗೆ “ಸ್ಥಿರತೆ ಕಾಯ್ದುಕೊಳ್ಳಿ, ಸಮಯ ಬಂದಾಗ ಚರ್ಚಿಸೋಣ” ಎಂಬ ಸಂದೇಶ ಕಳುಹಿಸಿದೆ ಎನ್ನಲಾಗಿದೆ. ಆದರೆ ಈ ಸಾಮಾಜಿಕ ಜಾಲತಾಣದಲ್ಲಿ ಕಾಂಗ್ರೆಸ್ನ ಒಳಗಿನ ಒಡಕು ಸಾರ್ವಜನಿಕವಾಗಿ ಬಯಲಾಗಿದೆ ಎಂಬುದು ಸ್ಪಷ್ಟವಾಗಿದೆ ಎಂದು ಸಾರ್ವಜನಿಕ ವ;ಯದಲ್ಲಿ ಚರ್ಚೆಯಾಗುತ್ತಿದೆ.
