ಕನ್ನಡ ಸಾಹಿತ್ಯದ ಅಕ್ಷರ ಮಾಂತ್ರಿಕ ಎಸ್.ಎಲ್‌. ಭೈರಪ್ಪನವರು ತಮ್ಮ ಜೀವನದ ‘ಯಾನ’ವನ್ನು ಮುಗಿಸಿ, ಸೆಪ್ಟೆಂಬರ್ 26ರಂದು ಪಂಚಭೂತಗಳಲ್ಲಿ ಲೀನರಾದರು. ಮೈಸೂರಿನ ಚಾಮುಂಡಿಬೆಟ್ಟದ ತಪ್ಪಲಿನ ಚಿತಾಗಾರದಲ್ಲಿ ಬ್ರಾಹ್ಮಣ ಸಂಪ್ರದಾಯದಂತೆ ಶಾಸ್ತ್ರೋಕ್ತವಾಗಿ ಅವರ ಅಂತ್ಯಕ್ರಿಯೆ ನೆರವೇರಿತು. ಭೈರಪ್ಪನವರ ಮಾನಸ ಪುತ್ರಿ ಸಹನಾ ವಿಜಯಕುಮಾರ್ ಅವರು ಪಾರ್ಥಿವ ಶರೀರಕ್ಕೆ ಅಂತಿಮ ನಮನ ಸಲ್ಲಿಸಿದ ಬಳಿಕ, ಅವರ ಪುತ್ರರು ಚಿತೆಗೆ ಅಗ್ನಿಸ್ಪರ್ಶ ಮಾಡಿದರು.
ಬೆಳಗ್ಗೆಯಿಂದಲೇ ಅಂತ್ಯಕ್ರಿಯೆಗೆ ಸಕಲ ಸಿದ್ಧತೆಗಳು ನಡೆದಿದ್ದವು. ಕುಟುಂಬಸ್ಥರು ಮತ್ತು ಗಣ್ಯರಿಗಾಗಿ ಜರ್ಮನ್ ಟೆಂಟ್‌ ಹಾಕಿ, ಕುರ್ಚಿಗಳನ್ನಿಟ್ಟು ವ್ಯವಸ್ಥೆ ಮಾಡಲಾಗಿತ್ತು. ಮೈಸೂರು ಎಡಿಸಿ ಶಿವರಾಜು ಅವರು ಸ್ಥಳಕ್ಕೆ ಭೇಟಿ ನೀಡಿ, ಎಲ್ಲ ವ್ಯವಸ್ಥೆಗಳನ್ನು ಪರಿಶೀಲಿಸಿದ್ದರು. ಪೊಲೀಸ್ ಭದ್ರತೆಯನ್ನು ಸಹ ನಿಯೋಜಿಸಲಾಗಿತ್ತು.
ಇದನ್ನೂ ಓದಿ | ಸಾಹಿತ್ಯದ ಹೆಸರಿನಲ್ಲಿ ಬೈರಪ್ಪನವರು ನೀಡಿದ್ದು ಅರ್ಧಸತ್ಯಗಳನ್ನು,…
ಎಸ್.ಎಲ್‌. ಭೈರಪ್ಪನವರ ಕಾದಂಬರಿಗಳಾದ ‘ಪರ್ವ’, ‘ಗೃಹಭಂಗ’, ‘ದಾಟು’ ಮತ್ತು ‘ತಬ್ಬಲಿಯು ನೀನಾದೆ ಮಗನೆ’ ಕನ್ನಡ ಸಾಹಿತ್ಯಕ್ಕೆ ಅಮರ ಕೊಡುಗೆಯಾಗಿವೆ. ಅವರ ಚಿಂತನಾತ್ಮಕ ಬರವಣಿಗೆ ಜನಮಾನಸವನ್ನು ಆಳವಾಗಿ ಸ್ಪರ್ಶಿಸಿವೆ. ಈ ದಿಗ್ಗಜನ ನಿಧನ ಕನ್ನಡ ಸಾಹಿತ್ಯ ಲೋಕಕ್ಕೆ ತುಂಬಲಾರದ ನಷ್ಟವನ್ನುಂಟು ಮಾಡಿದೆ. ಅವರ ಸಾಹಿತ್ಯ ಪರಂಪರೆಯು ಓದುಗರ ಹೃದಯದಲ್ಲಿ ಶಾಶ್ವತವಾಗಿ ಉಳಿಯಲಿದೆ. ಚಾಮುಂಡಿಬೆಟ್ಟದ ಚಿತೆಯಲ್ಲಿ ಭೈರಪ್ಪನವರ ದೇಹ ಭಸ್ಮವಾದರೂ, ಅವರ ಕೃತಿಗಳು ಕನ್ನಡಿಗರ ಮನಸ್ಸಿನಲ್ಲಿ ಜೀವಂತವಾಗಿರುತ್ತವೆ.
