‘ಅಪಾಯಕಾರಿ’ ಲೇಬಲ್‌ನೊಂದಿಗೆ ಇನ್ಮುಂದೆ ಜಿಲೇಬಿ, ಸಮೋಸಾ

ಸಂಜೆಯಾಗುತ್ತಿದ್ದಂತೆ ತಿನಿಸು ಪ್ರಿಯರನ್ನು ಕೈಬೀಸಿ ಕರೆಯುವ ಜಿಲೇಬಿ, ಸಮೋಸಾ, ಬಿಸ್ಕೆಟ್ ಹಾಗೂ ಚಹಾ ಇನ್ನುಮುಂದೆ ಸಿಗರೇಟ್ನಂತೆ ʼಅಪಾಯಕಾರಿʼ ಎಂಬ ಲೇಬಲ್‌ನೊಂದಿಗೆ ಸಿಗಲಿವೆ.

ಆರೋಗ್ಯ ಸಚಿವಾಲಯವು, ನಾಗ್ಪುರ್ ಎಐಐಎಂಎಸ್ ಸೇರಿದಂತೆ ಎಲ್ಲ ಕೇಂದ್ರೀಯ ಸಂಸ್ಥೆಗಳಿಗೆ, ಜನಸಾಮಾನ್ಯರು ತಿನ್ನುವ ತಿಂಡಿ, ತಿನಿಸುಗಳು ಎಷ್ಟು ಎಣ್ಣೆಯ ಅಂಶ ಮತ್ತು ಸಕ್ಕರೆಯ ಅಂಶಹೊಂದಿದೆ ಎಂಬ ಫಲಕವನ್ನು ಎದ್ದುಕಾಣುವಹಾಗೆ ಅಳವಡಿಸುವಂತೆ ಸೂಚನೆ ನೀಡಿದೆ. ಸಿಗರೇಟಿನಂತೆಯೇ ಈ ಜಂಕ್ ಫುಡ್ಗಳು ಸಹ ಹಾನಿಕಾರಕ ಎಂದು ಜಾಗೃತಿ ಮೂಡಿಸಲು ಈ ಪ್ರಯತ್ನ ಮೊದಲ ಹೆಜ್ಜೆ ಎನ್ನಲಾಗಿದೆ.

ಸಾಂಪ್ರದಾಯಿಕ ಆಹಾರವೆಂದು ಸೇವಿಸಲಾಗುವ ಈ ಆಹಾರಗಳು ಎಷ್ಟು ಜಿಡ್ಡಿನ ಅಂಶ ಮತ್ತು ಸಕ್ಕರೆಯನ್ನು ಹೊಂದಿವೆ ಎನ್ನುವುದು ಜನಸಾಮಾನ್ಯರ ಗಮನಕ್ಕೆ ಬರಬೇಕು. ಈ ನಿಟ್ಟಿನಲ್ಲಿ ಸರ್ಕಾರಿ ಸಂಸ್ಥೆಗಳು ಶಾಂತವಾದ ಆದರೆ, ತೀಕ್ಷಣವಾದ ಜ್ಞಾಪನೆಗಳನ್ನು ಎಚ್ಚರಿಕೆಯಾಗಿ ಬಳಸುವ ಗುರಿಹೊಂದಿವೆ. ಈ ಎಚ್ಚರಿಕೆ ಫಲಕಗಳನ್ನು ಕೆಫೆಟೇರಿಯಾ ಮತ್ತು ಸಾರ್ವಜನಿಕ ಸ್ಥಳಗಳಲ್ಲಿ ಅಳವಡಿಸಲಾಗುವುದು. ಜಿಲೇಬಿ, ಸಮೋಸಾ ಹಾಗೂ ಚಾಯ್ ಮಾತ್ರವಲ್ಲ, ಲಡ್ಡೂ, ವಡಾಪಾವ್, ಪಕೋಡಾಗಳನ್ನೂ ಸಹ ಪರಿಶಿಲಿಸಲಾಗುತ್ತಿದೆ ಎಂದು ನಾಗ್ಪರ್ ಎಐಐಎಂಎಸ್ ಅಧಿಕಾರಿಗಳು ತಿಳಿಸಿದ್ದಾರೆ. 

ಸರ್ಕಾರದ ಆಂತರಿಕ ಟಿಪ್ಪಣಿಯೊಂದು ದೇಶದಲ್ಲಿ ಬಿಕ್ಕಟ್ಟಾಗಿ ಪರಿಣಮಿಸುತ್ತಿರುವದರ ಬಗ್ಗೆ ಬೆಳಕು ಚೆಲ್ಲಿದ್ದು, 2050ರ ವೇಳೆಗೆ ಭಾರತದ 44.9 ಕೋಟಿಗೂ ಹೆಚ್ಚು ಜನ ಅಧಿಕ ತೂಕ ಮತ್ತು ಬೊಜ್ಜು ಹೊಂದಿರುತ್ತಾರೆ ಎಂದು ಅಂದಾಜಿಸಲಾಗಿದೆ. ಈಗಾಗಲೇ ಪ್ರತೀ ಐದು ಜನ ವಯಸ್ಕರಲ್ಲಿ ಒಬ್ಬರು ಅಧಿಕ ತೂಕ ಹೊಂದಿದವರಾಗಿದ್ದಾರೆ. ಕಳಪೆ ಆಹಾರ ಮತ್ತು ವ್ಯಾಯಾಮದ ಕೊರತೆ ಈ ಕಳವಳವನ್ನು ಇನ್ನಷ್ಟು ಹೆಚ್ಚು ಮಾಡಿದೆ.

ಇದನ್ನೂ ಓದಿ | ಆಹಾರ ಸುರಕ್ಷತೆ ತಪಾಸಣೆ: 406 ಬೀದಿಬದಿ ಮಾರಾಟಗಾರರಿಗೆ ನೋಟಿಸ್

ಇದು ಆಹಾರವನ್ನು ನಿಷೇಧಿಸುವ ವಿಚಾರವಲ್ಲ. ಬದಲಿಗೆ, ಒಂದು ಗುಲಾಬ್ ಜಾಮೂನಿನಲ್ಲಿ ಐದು ಟೀ ಚಮಚ ಸಕ್ಕರೆ ಇರಬಹುದು ಎಂದು ಜನ ತಿಳಿದಾಗ, ಅವರು ಅದನ್ನು ತಿನ್ನುವ ಮೊದಲು ಎರಡುಬಾರಿ ಯೋಚಿಸಬಹುದು. ಒಟ್ಟಿನಲ್ಲಿ ʼತಿಳಿದು ತಿನ್ನಿʼ ಎನ್ನುತ್ತಿದ್ದಾರೆ ತಜ್ಞರು.