ಭಾರತ ಮತ್ತು ಯುನೈಟೆಡ್ ಕಿಂಗ್ಡಮ್ (ಯುಕೆ) ನಡುವಿನ ಬಹುನಿರೀಕ್ಷಿತ ಮುಕ್ತ ವ್ಯಾಪಾರ ಒಪ್ಪಂದಕ್ಕೆ (FTA) ಪ್ರಧಾನಮಂತ್ರಿ ನರೇಂದ್ರ ಮೋದಿ ಮತ್ತು ಬ್ರಿಟಿಷ್ ಪ್ರಧಾನಮಂತ್ರಿ ಕೀರ್ ಸ್ಟಾರ್ಮರ್ ಜುಲೈ 24ರಂದು ಚೆಕರ್ಸ್ನಲ್ಲಿ ಸಹಿ ಹಾಕಿದ್ದಾರೆ. ಈ ಒಪ್ಪಂದವನ್ನು “ಐತಿಹಾಸಿಕ ದಿನ” ಎಂದು ಕರೆದ ಸ್ಟಾರ್ಮರ್, ಇದು ಎರಡೂ ದೇಶಗಳ ಕಾರ್ಮಿಕರು, ವ್ಯಾಪಾರಿಗಳು ಮತ್ತು ಹೂಡಿಕೆದಾರರಿಗೆ ದೊಡ್ಡ ಲಾಭವನ್ನು ತಂದುಕೊಡಲಿದೆ ಎಂದಿದ್ದಾರೆ. “ಇದು ಉದ್ಯೋಗ ಸೃಷ್ಟಿ, ವೇತನ ಹೆಚ್ಚಳ ಮತ್ತು ಜೀವನಮಟ್ಟ ಸುಧಾರಣೆಗೆ ಕಾರಣವಾಗುವ ಒಪ್ಪಂದವಾಗಿದೆ” ಎಂದಿದ್ದಾರೆ.
ಪ್ರಧಾನಿ ಮೋದಿ, ಈ ಒಪ್ಪಂದವನ್ನು “ಭಾರತ-ಯುಕೆ ಸಂಬಂಧಗಳಲ್ಲಿ ಹೊಸ ಅಧ್ಯಾಯ” ಎಂದು ಬಣ್ಣಿಸಿದ್ದಾರೆ. “ಹಲವು ವರ್ಷಗಳ ಕಠಿಣ ಪರಿಶ್ರಮದ ನಂತರ, ಇಂದು ಸಮಗ್ರ ಆರ್ಥಿಕ ಮತ್ತು ವ್ಯಾಪಾರ ಒಪ್ಪಂದವನ್ನು (CETA) ತೀರ್ಮಾನಿಸಲಾಗಿದೆ. ಇದು ಎರಡೂ ದೇಶಗಳ ಸಮೃದ್ಧಿಗೆ ಒಂದು ರೂಪರೇಷೆ” ಎಂದು ಲಂಡನ್ನ ಜಂಟಿ ಪತ್ರಿಕಾಗೋಷ್ಠಿಯಲ್ಲಿ ಹೇಳಿದ್ದಾರೆ. ಈ ಒಪ್ಪಂದವು 2030ರ ವೇಳೆಗೆ ದ್ವಿಪಕ್ಷೀಯ ವ್ಯಾಪಾರವನ್ನು $60 ಬಿಲಿಯನ್ನಿಂದ $120 ಬಿಲಿಯನ್ಗೆ ದ್ವಿಗುಣಗೊಳಿಸುವ ಗುರಿಯನ್ನು ಹೊಂದಿದೆ.
ಈ ಒಪ್ಪಂದವು ಭಾರತದ ಜವಳಿ, ಫೂಟ್ವೇರ್, ರತ್ನ-ಆಭರಣ, ಸಮುದ್ರ ಆಹಾರ, ಕೃಷಿ ಉತ್ಪನ್ನಗಳು ಮತ್ತು ಎಂಜಿನಿಯರಿಂಗ್ ಸರಕುಗಳಿಗೆ ಯುಕೆ ಮಾರುಕಟ್ಟೆಯಲ್ಲಿ ಉತ್ತಮ ಪ್ರವೇಶವನ್ನು ಒದಗಿಸಲಿದೆ. ಭಾರತದ 99% ರಫ್ತುಗಳಿಗೆ ಸುಂಕರಹಿತ ಪ್ರವೇಶ ಸಿಗಲಿದ್ದು, ಇದರಿಂದ ವಾರ್ಷಿಕವಾಗಿ $34 ಬಿಲಿಯನ್ ವ್ಯಾಪಾರ ಹೆಚ್ಚಳವಾಗಲಿದೆ ಎಂದು ಅಂದಾಜಿಸಲಾಗಿದೆ. ಯುಕೆಯಿಂದ ಭಾರತಕ್ಕೆ ವೈದ್ಯಕೀಯ ಉಪಕರಣಗಳು, ಏರೋಸ್ಪೇಸ್ ಭಾಗಗಳು, ವ್ಹಿಸ್ಕಿ ಮತ್ತು ಕಾರುಗಳ ರಫ್ತಿಗೆ ಸುಂಕ ಕಡಿತವಾಗಲಿದ್ದು, ಇದರಿಂದ ಭಾರತೀಯ ಗ್ರಾಹಕರಿಗೆ ಕೈಗೆಟುಕುವ ಬೆಲೆಯಲ್ಲಿ ಉತ್ಪನ್ನಗಳು ಲಭ್ಯವಾಗಲಿವೆ.
ಯುಕೆಯ ವ್ಹಿಸ್ಕಿ ಮತ್ತು ಜಿನ್ಗೆ ಭಾರತದಲ್ಲಿ 150%ರಿಂದ 75%ಕ್ಕೆ ಮತ್ತು 10 ವರ್ಷಗಳಲ್ಲಿ 40%ಕ್ಕೆ ಸುಂಕ ಕಡಿತವಾಗಲಿದೆ, ಆದರೆ ಕಾರುಗಳ ಮೇಲಿನ ಸುಂಕ 100%ರಿಂದ 10%ಕ್ಕೆ ಇಳಿಯಲಿದೆ. ಭಾರತದ ಕೃಷಿ ಉತ್ಪನ್ನಗಳಾದ ದ್ರಾಕ್ಷಿ, ಮಾವು, ಸಮುದ್ರ ಆಹಾರ ಮತ್ತು ತಯಾರಿಸಿದ ಆಹಾರಗಳಿಗೆ ಯುಕೆಯಲ್ಲಿ ಹೊಸ ಮಾರುಕಟ್ಟೆ ತೆರೆಯಲಿದೆ. ಈ ಒಪ್ಪಂದವು ಭಾರತದ ಯುವಕರು, ರೈತರು, ಮೀನುಗಾರರು ಮತ್ತು ಎಂಎಸ್ಎಂಇ ವಲಯಕ್ಕೆ ವಿಶೇಷವಾಗಿ ಲಾಭದಾಯಕವಾಗಿದೆ ಎಂದು ಮೋದಿ ಒತ್ತಿಹೇಳಿದ್ದಾರೆ.
ಇದನ್ನೂ ಓದಿ | ಜಿ7 ಶೃಂಗಸಭೆಗಾಗಿ ಕೆನಡಾದಲ್ಲಿ ಪ್ರಧಾನಿ ಮೋದಿ
2022ರಲ್ಲಿ ಆರಂಭವಾದ ಈ ಒಪ್ಪಂದದ ಮಾತುಕತೆಗಳು, ಕೋವಿಡ್-19 ಮತ್ತು ಎರಡೂ ದೇಶಗಳಲ್ಲಿ ನಡೆದ ಚುನಾವಣೆಗಳಿಂದಾಗಿ ವಿಳಂಬವಾದವು. ಆದರೆ, ಯುಎಸ್ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ರ ಸುಂಕ ಯುದ್ಧದಿಂದ ಉಂಟಾದ ಜಾಗತಿಕ ವ್ಯಾಪಾರ ಅನಿಶ್ಚಿತತೆಯಿಂದಾಗಿ, ಎರಡೂ ದೇಶಗಳು ಈ ಒಪ್ಪಂದವನ್ನು ಶೀಘ್ರಗತಿಯಲ್ಲಿ ಒಪ್ಪಿಕೊಂಡವು. ಭಾರತದ ವಾಣಿಜ್ಯ ಸಚಿವ ಪಿಯೂಷ್ ಗೋಯಲ್ ಮತ್ತು ಯುಕೆಯ ವ್ಯಾಪಾರ ಕಾರ್ಯದರ್ಶಿ ಜೊನಾಥನ್ ರೆನಾಲ್ಡ್ಸ್ ಈ ಒಪ್ಪಂದಕ್ಕೆ ಅಂತಿಮ ರೂಪ ನೀಡಿದ್ದಾರೆ.
