ರಾಜ್ ಬಿ ಶೆಟ್ಟಿ ಭಿನ್ನ ಆಲೋಚನೆಗಳೊಂದಿಗೆ ಸಿನಿಮಾ ಮಾಡುವ ನಟ – ನಿರ್ದೇಶಕ. ‘ಸು ಫ್ರಂ ಸೋ’, ಅವರ ನಿರ್ಮಾಣದ ಸಿನಿಮಾ ಎಂದೇ ಸುದ್ದಿಯಾಗಿತ್ತು. ಈ ಬಾರಿ ಮತ್ತೊಂದು ವಿಶಿಷ್ಟ ಸಿನಿಮಾದೊಂದಿಗೆ ಅವರು ಥಿಯೇಟರ್ಗೆ ಬಂದಿದ್ದಾರೆ. ತಾವು ಹಿಂದೆ ನಿಂತು ಪ್ರತಿಭಾವಂತ ಕಲಾವಿದರು ಹಾಗೂ ತಂತ್ರಜ್ಞರಿಗೆ ಸಲಹೆ – ಸೂಚನೆಗಳೊಂದಿಗೆ ನೆರವಾಗಿದ್ದಾರೆ. ಮೂಲತಃ ತುಳು ರಂಗಭೂಮಿಯ ನಟ – ನಿರ್ದೇಶಕರಾದ ಜೆ ಪಿ ತೂಮಿನಾಡು ಚೊಚ್ಚಲ ನಿರ್ದೇಶನದ ಚಿತ್ರವಿದು. ಈ ಹಿಂದೆ ಕೆಲವು ಸಿನಿಮಾಗಳ ಚಿಕ್ಕ ಪಾತ್ರಗಳಲ್ಲಿ ಅವರು ನಟಿಸಿದ್ದರು. ಈ ಬಾರಿ ಪೂರ್ಣಪ್ರಮಾಣದ ಪಾತ್ರ ಪೋಷಿಸಿದ್ದು, ನಟನೆ ಮಾತ್ರವಲ್ಲದೆ ನಿರ್ದೇಶನದಲ್ಲೂ ಗಮನ ಸೆಳೆಯುತ್ತಾರೆ.
ಈ ಚಿತ್ರದಲ್ಲಿ ಯಾರನ್ನೂ ನಾಯಕನಟ, ನಾಯಕನಟಿ ಎಂದು ಕರೆಯುವ ಹಾಗಿಲ್ಲ. ಇಲ್ಲಿ ಎಲ್ಲಾ ಪಾತ್ರಗಳಿಗೂ space ಇದೆ. ಅವರು ನಮ್ಮ, ನಿಮ್ಮೂರಿನ ಜನರಂತೆಯೇ ಕಾಣಿಸುತ್ತಾರೆ. ಈ ಪಾತ್ರಗಳನ್ನು ಪೋಷಿಸಿರುವ ಕಲಾವಿದರು ರಂಗಭೂಮಿ ಹಿನ್ನೆಲೆಯವರೇ ಆಗಿದ್ದು, ಅತ್ಯಂತ ಸಹಜವಾಗಿ ಕಾಣಿಸಿಕೊಂಡಿದ್ದಾರೆ. ಹಾಗಾಗಿ ಪಾತ್ರಗಳು ಪ್ರೇಕ್ಷಕರಿಗೆ ಆಪ್ತವಾಗಿ connect ಆಗುತ್ತೆ. ನಿರ್ದೇಶಕ ಜೆಪಿ ತೂಮಿನಾಡು ಅವರೂ ಸನ್ನಿವೇಶಗಳನ್ನು ಅತ್ಯಂತ ಸಹಜವಾಗಿ ಕಟ್ಟುತ್ತಾ ಹೋಗುತ್ತಾರೆ. ಪಾತ್ರಗಳ ಆಗು-ಹೋಗುಗಳಲ್ಲೇ ಹಾಸ್ಯ ಹಾಸುಹೊಕ್ಕಾಗಿದ್ದು, ಕಾಮಿಡಿ ಇಲ್ಲಿ ‘Staged’ ಎಂದು ಎಲ್ಲೂ ಅನಿಸುವುದಿಲ್ಲ.
ಚಿತ್ರವಿಡೀ ಕಾಣಿಸುವುದು ಮುಗ್ಧತೆ. ಜನರ ಈ ಮುಗ್ಧತೆ ಹೇಗೆ ಮನೆಗಳಲ್ಲಿ, ಹಳ್ಳಿಯಲ್ಲಿ ಸಂಚಲನ ಮೂಡಿಸುತ್ತದೆ ಎನ್ನುವುದು ಕತೆ. ಸೋಜಿಗವೆಂದರೆ ಸಮಸ್ಯೆಯೊಂದನ್ನು ಪರಿಹರಿಸಲು ಬರುವ ಸ್ವಾಮೀಜಿಯಲ್ಲಿಯೂ ಒಂದು ಮುಗ್ಧತೆಯಿದೆ! ಕೆಲವರಿಗೆ ಕಂಟಕವಾಗುವ ಈ ಮುಗ್ಧತೆ ಮತ್ತೆ ಕೆಲವರಿಗೆ ಒಳಿತು ಮಾಡುತ್ತದೆ. ಚಿತ್ರದಲ್ಲಿ ಹಾಸ್ಯದ ಜೊತೆ ಪ್ರೇಮಕತೆಯೂ ಇದೆ. ಚೆಂದದ ಗೀತಸಾಹಿತ್ಯವಿರುವ ಹಾಡುಗಳಿವೆ. ಸಿನಿಮಾ ಬಿಡುಗಡೆಗೂ ಮುಂಚೆ ಸದ್ದು ಮಾಡಿದ್ದ ‘Danks Anthem’ ದೊಡ್ಡ ಪರದೆ ಮೇಲೆ ಮತ್ತಷ್ಟು ಇಷ್ಟವಾಗುತ್ತದೆ.
ಎಲ್ಲರ ಊರು, ಕುಟುಂಬಗಳಲ್ಲಿ ನಡೆಯುವ ಕತೆಯನ್ನೇ ಹೇಳಿದ್ದಾರೆ ನಿರ್ದೇಶಕರು. ಹಾಸ್ಯದ ಎಳೆಯ ಮಧ್ಯೆ ಸಂಬಂಧಗಳ ಬಗ್ಗೆ ಸೂಚ್ಯವಾಗಿ, ಸೂಕ್ಷ್ಮವಾಗಿ ಹೇಳುವುದೂ ಜವಾಬ್ದಾರಿಯಾಗಬೇಕು. ಪ್ರಭಾವಶಾಲಿ ಮಾಧ್ಯಮ ಸಿನಿಮಾ. ಇಲ್ಲಿ ಚಿಕ್ಕಪ್ಪನಿಂದಾಗುವ ಲೈಂಗಿಕ ಶೋಷಣೆಯನ್ನು ಸೂಚ್ಯವಾಗಿ ಹೇಳಿದ್ದರೆ ಸಾಕಿತ್ತು. ಸನ್ನಿವೇಶವೊಂದು ಪ್ರೇಕ್ಷಕನಲ್ಲಿನ ಒಳಿತನ್ನು ಪ್ರೇರೇಪಿಸುವಂತೆ ಇರಬೇಕೇ ವಿನಹಃ, ಪ್ರಚೋದನೆಗೆ ದಾರಿಯಾಗಕೂಡದು. ಯಾವುದೇ ಸೃಜನಶೀಲ ನಿರ್ದೇಶಕರಿಗೆ ಇದು ಖಂಡಿತ ಕಷ್ಟವಾಗಲಾರದು. ಚಿತ್ರದಲ್ಲಿ ಚಿಕ್ಕಪ್ಪನ ಪಾತ್ರವನ್ನು ಅಷ್ಟೊಂದು ವಾಚ್ಯ ಮಾಡುವ ಅಗತ್ಯ ಇರಲಿಲ್ಲ.
ಇದನ್ನೂ ಓದಿ | ಫಸ್ಟ್ ಶೋ| ‘ಎಕ್ಕ’ : ಭೂಗತ ಜಗತ್ತಿನ ಸುಳಿಯಲ್ಲಿ ಹುಟ್ಟೂರಿನ ಕನವರಿಕೆ
ನಿರ್ಮಾಪಕ ರಾಜ್ ಬಿ ಶೆಟ್ಟಿ ತಮ್ಮ ಸಿನಿಮಾ ಅನುಭವವನ್ನು ಸೊಗಸಾಗಿ ದುಡಿಸಿಕೊಂಡಿದ್ದಾರೆ. ರಂಗಭೂಮಿಯ ಪ್ರತಿಭಾವಂತರ ತಂಡ ಕತೆಯ ಆಶಯವನ್ನು ಅರಿತು ಸಿನಿಮಾ ಮಾಡಿದೆ. ಕರಾವಳಿ ನೇಟಿವಿಟಿ, ಅಲ್ಲಿನ slang ಅನ್ನು ಪರಿಣಾಮಕಾರಿಯಾಗಿ ದುಡಿಸಿಕೊಂಡ ಮತ್ತೊಂದು ಚಿತ್ರವಾಗಿ ‘ಸು ಫ್ರಂ ಸೋ’ ದಾಖಲಾಗುತ್ತದೆ. ಚಿತ್ರದ ಕಲಾವಿದರಾಗಿ ಶನೀಲ್ ಗೌತಮ್, ಜೆಪಿ ತೂಮಿನಾಡು, ಸಂಧ್ಯಾ ಅರಕೆರೆ, ಪ್ರಕಾಶ್ ಕೆ ತೂಮಿನಾಡು, ದೀಪಕ್ ರೈ ಪಾಣಾಜೆ, ಮೈಮ್ ರಾಮ್ದಾಸ್ ಸೇರಿದಂತೆ ಚಿತ್ರದ ಪ್ರತಿಯೊಬ್ಬ ಕಲಾವಿದರ ಪಾತ್ರಗಳೂ ನೆನಪಿನಲ್ಲಿಳಿಯುತ್ತವೆ. ಸುಮೇದ್ ಹಿನ್ನೆಲೆ ಸಂಗೀತ, ವಿನಾಯಕ್ ಆಚಾರ್ಯ ಛಾಯಾಗ್ರಹಣಕ್ಕೂ ಚಪ್ಪಾಳೆ ಸಲ್ಲಬೇಕು. ಒಂದೊಳ್ಳೆಯ ಅನುಭವಕ್ಕಾಗಿ ‘ಸು ಫ್ರಂ ಸೋ’ ವೀಕ್ಷಿಸಿ!
