ಕರ್ನಾಟಕ ವಿಧಾನಪರಿಷತ್ತಿನಲ್ಲಿ ಸೋಮವಾರ ನಡೆದ ಘಟನೆಯು ರಾಜಕೀಯ ವಲಯದಲ್ಲಿ ಭಾರೀ ಕೋಲಾಹಲ ಸೃಷ್ಟಿಸಿದೆ. ವಿರೋಧ ಪಕ್ಷದ ನಾಯಕ ಛಲವಾದಿ ಟಿ. ನಾರಾಯಣಸ್ವಾಮಿ ಅವರು ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ ರಾಜ್ ಸಚಿವ ಪ್ರಿಯಾಂಕ್ ಖರ್ಗೆಯವರನ್ನು ‘ಗೂಂಡಾ’ ಎಂದು ಕರೆದು, ‘ಬೊಗಳೋ ನಾಯಿಗೆ ಆನೆಯನ್ನು ಬೆದರಿಸಲಾಗದು’ ಎಂಬ ಗಾದೆಯನ್ನು ಉಲ್ಲೇಖಿಸಿ ವ್ಯಂಗ್ಯವಾಡಿದರು. ಈ ಹೇಳಿಕೆಯು ಸದನದಲ್ಲಿ ಆಡಳಿತ ಮತ್ತು ವಿರೋಧ ಪಕ್ಷಗಳ ನಡುವೆ ತೀವ್ರ ಗದ್ದಲಕ್ಕೆ ಕಾರಣವಾಯಿತು.
ಘಟನೆಯ ಹಿನ್ನೆಲೆಯಲ್ಲಿ, ಕಳೆದ ಮೇ ೨೧ರಂದು ಕಲಬುರಗಿ ಜಿಲ್ಲೆಯ ಚಿತ್ತಾಪುರದಲ್ಲಿ ನಡೆದ ಘಟನೆಯನ್ನು ಛಲವಾದಿ ಅವರು ಸದನದಲ್ಲಿ ಪ್ರಸ್ತಾಪಿಸಿದರು. ಅಂದು, ಕಾಂಗ್ರೆಸ್ ಕಾರ್ಯಕರ್ತರು ತಮ್ಮನ್ನು ಸರ್ಕಾರಿ ಅತಿಥಿಗೃಹದಲ್ಲಿ ಸುಮಾರು ಐದು ಗಂಟೆಗಳ ಕಾಲ ದಿಗ್ಬಂಧನದಲ್ಲಿಟ್ಟರು ಎಂದು ಆರೋಪಿಸಿದರು.
ಪ್ರಿಯಾಂಕ್ ಖರ್ಗೆಯವರ ಸೂಚನೆಯ ಮೇರೆಗೆ ಈ ಗೂಂಡಾಗಿರಿ ನಡೆದಿದೆ ಎಂದು ಹೇಳಿ, ಸಚಿವರ ರಾಜೀನಾಮೆಗೆ ಆಗ್ರಹಿಸಿದರು. ‘೨೫ಕ್ಕೂ ಹೆಚ್ಚು ಜನರು ನನ್ನ ಮೇಲೆ ಗುಂಪು ಸೇರಿ ಹಲ್ಲೆ ಮಾಡಲು ಯತ್ನಿಸಿದರು, ಆದರೆ ಪೊಲೀಸರು ಮೂಕಪ್ರೇಕ್ಷಕರಾಗಿದ್ದರು’ ಎಂದು ಛಲವಾದಿ ಅವರು ವಿವರಿಸಿದರು. ಇದು ಹಕ್ಕುಭಂಗದ ಪ್ರಶ್ನೆಯಾಗಿದ್ದು, ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರ ಸಮ್ಮುಖದಲ್ಲಿ ಖರ್ಗೆಯವರು ಕ್ಷಮೆಯಾಚಿಸಬೇಕು ಅಥವಾ ರಾಜೀನಾಮೆ ನೀಡಬೇಕು ಎಂದು ಒತ್ತಾಯಿಸಿದರು.
ಈ ಹೇಳಿಕೆಗಳು ಕಾಂಗ್ರೆಸ್ ಸದಸ್ಯರನ್ನು ಕೆರಳಿಸಿದವು. ಸಚಿವ ಖರ್ಗೆಯವರನ್ನು ‘ಗೂಂಡಾ’ ಮತ್ತು ‘ನಾಯಿ’ ಎಂದು ಕರೆದಿದ್ದು ಅಸಂಸದೀಯ ಎಂದು ಆರೋಪಿಸಿ, ಸದನದಲ್ಲಿ ಭಾರೀ ಗದ್ದಲ ಉಂಟಾಯಿತು. ಕಾಂಗ್ರೆಸ್ ಸದಸ್ಯರು ಛಲವಾದಿ ಅವರ ವಿರುದ್ಧ ಘೋಷಣೆಗಳನ್ನು ಕೂಗಿದರು. ಉಪಸಭಾಪತಿ ಎಸ್.ಎಲ್. ಭೋಜೇಗೌಡ ಅವರು ಮಧ್ಯಪ್ರವೇಶಿಸಿ, ‘ಗೂಂಡಾ’ ಮತ್ತು ‘ನಾಯಿ’ ಪದಗಳನ್ನು ಸದನದ ಕಡತದಿಂದ ತೆಗೆದುಹಾಕುವಂತೆ ಆದೇಶಿಸಿದರು. ಆದರೂ ವಿವಾದ ಮುಗಿಯಲಿಲ್ಲ. ಶೂನ್ಯವೇಳೆಯ ನಂತರ ಈ ವಿಷಯವನ್ನು ಮತ್ತೆ ಪ್ರಸ್ತಾಪಿಸಿದ ಛಲವಾದಿ ಅವರಿಗೆ, ಉಪಸಭಾಪತಿ ಅವರು ‘ಈ ಪ್ರಕರಣವನ್ನು ಹಕ್ಕುಗಳ ಸಮಿತಿಗೆ ವರ್ಗಾಯಿಸಲಾಗಿದೆ. ವರದಿ ಬಂದ ನಂತರ ಚರ್ಚಿಸೋಣ.’ ಎಂದರು.
ಇದನ್ನೂ ಓದಿ | ಮುಂಗಾರು ಅಧಿವೇಶನದ ಮೊದಲನೆ ದಿನವೇ ಪ್ರತಿಪಕ್ಷಗಳು ಸರ್ಕಾರಕ್ಕೆ ತರಾಟೆಗೆ
ಆದರೆ ಛಲವಾದಿ ಅವರು ಸದನದಲ್ಲಿ ತಕ್ಷಣ ಚರ್ಚೆಗೆ ಒತ್ತಾಯಿಸಿದರು. ಭೋಜನ ವಿರಾಮದ ನಂತರ ಅವಕಾಶ ನೀಡಲಾಯಿತು. ಚರ್ಚೆಯಲ್ಲಿ ಬಿಜೆಪಿ ಸದಸ್ಯ ಸಿ.ಟಿ. ರವಿ ಅವರು ಛಲವಾದಿ ಅವರನ್ನು ಬೆಂಬಲಿಸಿ, ‘ವಿರೋಧ ಪಕ್ಷದ ನಾಯಕನನ್ನು ದಿಗ್ಬಂಧನದಲ್ಲಿಡುವುದು ಪ್ರಜಾಪ್ರಭುತ್ವಕ್ಕೆ ಕಳಂಕ’ ಎಂದರು. ಕಾಂಗ್ರೆಸ್ ನಾಯಕರು ಇದನ್ನು ತಿರಸ್ಕರಿಸಿ, ಛಲವಾದಿ ಅವರೇ ಮೊದಲು ಖರ್ಗೆಯವರನ್ನು ಅವಮಾನಿಸಿದ್ದರು ಎಂದು ಹೇಳಿದರು. ಮೇ ತಿಂಗಳಲ್ಲಿ ಛಲವಾದಿ ಅವರು ಪತ್ರಿಕಾಗೋಷ್ಠಿಯಲ್ಲಿ ಖರ್ಗೆಯವರನ್ನು ‘ನಾಯಿ’ಗೆ ಹೋಲಿಸಿದ್ದರು, ಅದರ ಪ್ರತಿಕ್ರಿಯೆಯಾಗಿ ಕಾಂಗ್ರೆಸ್ ಕಾರ್ಯಕರ್ತರು ಚಿತ್ತಾಪುರದಲ್ಲಿ ದಿಗ್ಬಂಧನ ಮಾಡಿದ್ದರು. ಬಿಜೆಪಿ ಇದರ ವಿರುದ್ಧ ‘ಕಲಬುರಗಿ ಚಲೋ’ ಆಂದೋಲನ ನಡೆಸಿ ಖರ್ಗೆಯವರ ರಾಜೀನಾಮೆ ಆಗ್ರಹಿಸಿದ್ದರು.
