ಕರ್ನಾಟಕದ ರಾಜಕೀಯ ವಲಯದಲ್ಲಿ ದೊಡ್ಡ ಚರ್ಚೆಗೆ ಕಾರಣವಾದ ಕೊಡಗು ಜಿಲ್ಲೆಯ ಬಿಜೆಪಿ ಕಾರ್ಯಕರ್ತ ವಿನಯ್ ಸೋಮಯ್ಯ ಅವರ ಆತ್ಮಹತ್ಯೆ ಪ್ರಕರಣಕ್ಕೆ ಇಂದು ಪೂರ್ಣವಿರಾಮ ಇಡಲಾಗಿದೆ. ಬೆಂಗಳೂರಿನ ಹೆಣ್ಣೂರು ಪೊಲೀಸ್ ಠಾಣೆಯ ತನಿಖಾಧಿಕಾರಿಗಳು ನ್ಯಾಯಾಲಯಕ್ಕೆ ಬಿ-ವರದಿ ಸಲ್ಲಿಸಿ, ಆರೋಪಿತರಾದ ಕಾಂಗ್ರೆಸ್ ಶಾಸಕರಾದ ಎ.ಎಸ್. ಪೊನ್ನಣ್ಣ (ವಿರಾಜಪೇಟೆ), ಡಾ. ಮಂತಾರ್ ಗೌಡ (ಮಡಿಕೇರಿ) ಹಾಗೂ ರಾಜೀವ್ ಗಾಂಧಿ ಪಂಚಾಯತ್ ರಾಜ್ ಸಂಘಟನೆಯ ಕೊಡಗು ಜಿಲ್ಲಾ ಅಧ್ಯಕ್ಷ ತನ್ನೀರಾ ಮೈನಾ ಅವರಿಗೆ ಕ್ಲೀನ್ ಚಿಟ್ ನೀಡಿದ್ದಾರೆ. ಕಿರುಕುಳ ಮತ್ತು ಬೆದರಿಕೆಯಿಂದಲೇ ವಿನಯ್ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎಂಬ ಆರೋಪಕ್ಕೆ ಯಾವುದೇ ಸಾಕ್ಷ್ಯಾಧಾರಗಳು ಸಿಕ್ಕಿಲ್ಲ ಎಂದು ವರದಿಯಲ್ಲಿ ಸ್ಪಷ್ಟಪಡಿಸಲಾಗಿದೆ ಎಂದು ದಿ ಹಿಂದೂ ವರದಿ ಮಾಡಿದೆ.
ಪ್ರಕರಣದ ಹಿನ್ನೆಲೆ:
ಈ ಘಟನೆಯು ಏಪ್ರಿಲ್ 4, 2025ರಂದು ನಡೆದಿದ್ದು. ಕೊಡಗು ಜಿಲ್ಲೆಯ ಸೋಮವಾರಪೇಟೆ ತಾಲೂಕಿನ ಗೋಣಿಮರೂರು ಗ್ರಾಮದ ನಿವಾಸಿ ವಿನಯ್ ಸೋಮಯ್ಯ (39), ಬೆಂಗಳೂರು ನಗರದ ನಾಗವಾರದಲ್ಲಿರುವ ತಮ್ಮ ಕಂಪನಿಯ ಗೋಡೌನ್ನಲ್ಲಿ ಆತ್ಮಹತ್ಯೆ ಮಾಡಿಕೊಂಡರು. ವಿದ್ಯಾವಂತ ಮತ್ತು ಉದ್ಯಮಿ ವಿನಯ್ ಅವರು ಬಿಜೆಪಿಯ ಸಾಮಾಜಿಕ ಮಾಧ್ಯಮಗಳ ತಂಡದ ಸದಸ್ಯರಾಗಿದ್ದರು. ಆತ್ಮಹತ್ಯೆಗೆ ಮುನ್ನ ಬರೆದಿರುವ ಪತ್ರದಲ್ಲಿ ಅವರು ತನ್ನೀರಾ ಮೈನಾ, ಪೊನ್ನಣ್ಣ ಮತ್ತು ಮಂತಾರ್ ಗೌಡ ಅವರನ್ನು ನೇರವಾಗಿ ಆರೋಪಿಸಿದ್ದರು. ರಾಜಕೀಯ ಪ್ರೇರಿತ ಪ್ರಕರಣದಲ್ಲಿ ತಮಗೆ ತೊಂದರೆ ನೀಡಲಾಗುತ್ತಿದೆ, ಹೈಕೋರ್ಟ್ ಸ್ಟೇಯ್ ಇದ್ದರೂ ಪೊಲೀಸರು ಕಿರುಕುಳಿ ಮಾಡುತ್ತಿದ್ದಾರೆ, ರೌಡಿ ಶೀಟ್ ತೆರೆಯುವ ಬೆದರಿಕೆ ಇದೆ ಎಂದು ಬರೆದಿದ್ದರು. ಇದರಿಂದಾಗಿ, ಅವರ ಸಹೋದರ ಕೆ.ಎಸ್. ಜೀವನ್ ಅವರು ಹೆಣ್ಣೂರು ಠಾಣೆಯಲ್ಲಿ ದೂರು ನೀಡಿ, ಮೂವರ ವಿರುದ್ಧ FIR ದಾಖಲಿಸಿದ್ದರು.
ತನಿಖೆಯಲ್ಲಿ ಪೊಲೀಸರು ಆರೋಪಿತರ ಮೊಬೈಲ್ ಕರೆ ವಿವರಗಳನ್ನು ಎರಡು ತಿಂಗಳ ಕಾಲ ಪರಿಶೀಲಿಸಿದರು. ತಜ್ಞರ ಮೂಲಕ ವಿಶ್ಲೇಷಣೆಗೆ ಒಳಪಡಿಸಿದಾಗ, ವಿನಯ್ ಅವರ ಸಂಖ್ಯೆಗೆ ಯಾವುದೇ ಬೆದರಿಕೆ ಕರೆಗಳು ಅಥವಾ ವಾಟ್ಸ್ಆಪ್ ಸಂದೇಶಗಳು ಬಂದಿಲ್ಲ ಎಂದು ತಿಳಿದುಬಂದಿದೆ. ಫೋರೆನ್ಸಿಕ್ ವಿಶ್ಲೇಷಣೆಯಲ್ಲೂ ಯಾವುದೇ ಸಂಪರ್ಕದ ಸಾಕ್ಷ್ಯಗಳು ಕಂಡುಬಂದಿಲ್ಲ. ಈ ಹಿನ್ನೆಲೆಯಲ್ಲಿ, ವಿನಯ್ ಅವರು ನಡೆಸುತ್ತಿದ್ದ ‘ಕೊಡಗು ಸಮಸ್ಯೆಗಳು ಮತ್ತು ಪರಿಹಾರಗಳು’ ಎಂಬ ವಾಟ್ಸ್ಆಪ್ ಗ್ರೂಪ್ನಲ್ಲಿ ಪೊನ್ನಣ್ಣ ಅವರ ವಿರುದ್ಧದ ಒಂದು ಪೋಸ್ಟ್ಗೆ ಸಂಬಂಧಿಸಿ FIR ದಾಖಲಾಗಿತ್ತು. ಇದರಿಂದ ಉಂಟಾದ ಒತ್ತಡವೇ ಕಾರಣ ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿತ್ತು. ಆದರೆ, ಈ ಆರೋಪಗಳು ಸಾಬೀತಾಗಿಲ್ಲ.
ಈ ಪ್ರಕರಣದ ನಂತರ ಬಿಜೆಪಿ ಕಾರ್ಯಕರ್ತರು ಕುಶಾಲನಗರದಲ್ಲಿ ವ್ಯಾಪಕ ಪ್ರತಿಭಟನೆ ನಡೆಸಿ, ಸಿಬಿಐ ತನಿಖೆ ಒತ್ತಾಯಿಸಿದ್ದರು. ರಾಜ್ಯಾಧ್ಯಕ್ಷ ಬಿ.ವೈ. ವಿಜಯೇಂದ್ರ ಅವರು ‘ಪಾರದರ್ಶಕ ತನಿಖೆ ನಡೆಸಿ ಸತ್ಯ ಬಹಿರಂಗಪಡಿಸಬೇಕು’ ಎಂದು ಹೇಳಿದ್ದರು. ವಿಪಕ್ಷ ನಾಯಕ ಆರ್. ಅಶೋಕ್ ಅವರ ನೇತೃತ್ವದಲ್ಲಿ ಬಿಜೆಪಿ ಶಾಸಕರು ದೂರಿನಲ್ಲಿ ಶಾಸಕರ ಹೆಸರು ಸೇರಿಸುವಂತೆ ಒತ್ತಡ ಹೇರಿದ್ದರು.
ಇದನ್ನೂ ಓದಿ | ಬಿಜೆಪಿ ಅವಧಿಯಲ್ಲಿ ನಡೆದ ಹಗರಣ ತನಿಖೆಗೆ ರಚಿಸಿದ ಆಯೋಗ ರದ್ದು
ತನಿಖೆಯಲ್ಲಿ ಪುರಾವೆಗಳ ಕೊರತೆಯಿದ್ದರೂ, ಆತ್ಮಹತ್ಯೆಯ ಮೂಲ ಕಾರಣಗಳು – ಮಾನಸಿಕ ಒತ್ತಡ, ಆರ್ಥಿಕ ಸಮಸ್ಯೆಗಳು ಅಥವಾ ಇತರ ಅಂಶಗಳು – ಇನ್ನೂ ಚರ್ಚೆಗೆ ಒಳಗಾಗಿವೆ. ಈಗ ನ್ಯಾಯಾಲಯವು ಬಿ-ವರದಿಯನ್ನು ಪರಿಶೀಲಿಸಿ ಅಂತಿಮ ನಿರ್ಧಾರ ತೆಗೆದುಕೊಳ್ಳಬೇಕಾಗಿದೆ.
