ಭಾರತದ ರಾಜಧಾನಿ ದೆಹಲಿಯ ಐತಿಹಾಸಿಕ ರೆಡ್ ಫೋರ್ಟ್ (ಕೆಂಪು ಕೋಟೆ)ಯ ಮೆಟ್ರೋ ಸ್ಟೇಶನ್ ಬಳಿ ಸಂಭವಿಸಿದ ಕಾರು ಸ್ಫೋಟ ಘಟನೆಯು ದೇಶವನ್ನು ಆತಂಕಕ್ಕೆ ಒಳಪಡಿಸಿದೆ. ನವೆಂಬರ್ 10ರ ಸಂಜೆ ಸುಮಾರು 6:50ಕ್ಕೆ ನಡೆದ ಈ ಸ್ಫೋಟದಲ್ಲಿ ಕನಿಷ್ಠ 11 ಜನರು ಮೃತಪಟ್ಟಿದ್ದಾರೆ ಮತ್ತು 20ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದಾರೆ ಎಂದು ಮೂಲಗಳು ತಿಳಿಸಿವೆ.
ಹ್ಯುಂಡೈ ಐ20 ಕಾರೊಂದು ಸಿಗ್ನಲ್ ಬಳಿ ನಿಂತಿದ್ದಾಗ ಸ್ಫೋಟಗೊಂಡು, ಸುತ್ತಮುತ್ತಲಿನ 6 ವಾಹನಗಳು ಮತ್ತು 3 ಆಟೋ ರಿಕ್ಷಾಗಳು ಧಗಧಗಿಸಿವೆ. ಈ ಪ್ರದೇಶವು ಪ್ರವಾಸಿಗರ ದಟ್ಟಣೆಯಿರುವ ಮಾರುಕಟ್ಟೆ ಮತ್ತು ಐತಿಹಾಸಿಕ ಸ್ಥಳಗಳಿಂದ ಕೂಡಿದ್ದು, ಘಟನೆಯು ಭಯೋತ್ಪಾದಕ ಕೃತ್ಯವಾಗಿರಬಹುದೆಂದು ದೆಹಲಿ ಪೊಲೀಸ್ ಗಂಭೀರ ಶಂಕೆ ವ್ಯಕ್ತಪಡಿಸಿದ್ದಾರೆ. ರಾಷ್ಟ್ರೀಯ ತನಿಖಾ ಇಲಾಖೆ (ಎನ್ಐಎ), ರಾಷ್ಟ್ರೀಯ ಸುರಕ್ಷಾ ಗಾರ್ಡ್ (ಎನ್ಎಸ್ಜಿ) ಮತ್ತು ಫಾರೆನ್ಸಿಕ್ ತಂಡಗಳು ತನಿಖೆಯನ್ನು ಚುರುಕುಗೊಳಿಸಿವೆ.
ಪ್ರಾಥಮಿಕ ವರದಿಗಳ ಪ್ರಕಾರ, ಕಾರಿನೊಳಗೆ ಸ್ಫೋಟಕಗಳು (ಬಾಂಬ್) ಇರಿಸಿರುವುದರಿಂದ ಈ ಘಟನೆ ಸಂಭವಿಸಿರಬಹುದು ಎಂದು ಅಧಿಕಾರಿಗಳು ಅನುಮಾನ ವ್ಯಕ್ತಪಡಿಸಿದ್ದಾರೆ. ಇದು ಆತ್ಮಾಹುತಿ ದಾಳಿಯಾಗಿರುವ ಸಾಧ್ಯತೆಯೂ ಇದೆ, ಏಕೆಂದರೆ ಕಾರಿನೊಳಗೆ 3 ಜನರು ಇದ್ದರು ಮತ್ತು ಅವರಲ್ಲಿ ಒಬ್ಬರ ಮೃತದೇಹವು ಸಂಪೂರ್ಣವಾಗಿ ದಹನಗೊಂಡಿದೆ. ಸ್ಫೋಟದ ತೀವ್ರತೆಯಿಂದಾಗಿ ಮೃತರ ಗುರುತು ಕಂಡುಹಿಡಿಯಲು ಕಷ್ಟಕರವಾಗಿದ್ದು, ಡಿಎನ್ಎ ಪರೀಕ್ಷೆಗಳು ನಡೆಯುತ್ತಿವೆ.
ದೆಹಲಿ ಪೊಲೀಸ್ ಕಮಿಷನರ್ ಸತೀಶ್ ಗೋಲ್ಚಾ ಮಾತನಾಡಿ. “ಸಿಗ್ನಲ್ ಬಳಿ ನಿಂತ ಕಾರಿನೊಳಗೆ ಸ್ಫೋಟ ಸಂಭವಿಸಿತು. ಸುತ್ತಮುತ್ತಲಿನ ವಾಹನಗಳು ಹಾನಿಯಾಗಿವೆ. ಎಲ್ಲಾ ಸಾಧ್ಯತೆಗಳನ್ನು ಪರಿಶೀಲಿಸುತ್ತಿದ್ದೇವೆ.” ಕಾರಿನ ಮೊದಲ ಮಾಲೀಕ ಸಲ್ಮಾನ್ ಎಂಬಾತನನ್ನು ಗುರುಗ್ರಾಮ್ನಲ್ಲಿ ವಶಕ್ಕೆ ಪಡೆಯಲಾಗಿದ್ದು, ಇದರೊಂದಿಗೆ 4 ಜನರನ್ನು ವಿಚಾರಣೆಗೆ ಒಳಪಡಿಸಲಾಗಿದೆ. ಪುಲ್ವಾಮಾ ಸಂಬಂಧಿತ ಭಯೋತ್ಪಾದಕ ಗುಂಪುಗಳ ತನಿಖೆಯಲ್ಲಿ ಈ ಕಾರು ಬಳಸಿರಬಹುದೆಂದು ಶಂಕೆಯಿದೆ.
ಪ್ರಧಾನಿ ನರೇಂದ್ರ ಮೋದಿ Xನಲ್ಲಿ ಪೋಸ್ಟ್ ಮಾಡಿ. “ದೆಹಲಿಯ ಸ್ಫೋಟದಲ್ಲಿ ಮೃತರ ಕುಟುಂಬಗಳಿಗೆ ಆಳವಾದ ಸಹಾನುಭೂತಿ. ಗಾಯಾಳುಗಳ ಆರೋಗ್ಯಕ್ಕಾಗಿ ಪ್ರಾರ್ಥಿಸುತ್ತೇನೆ. ಹೋಮ್ ಮಿನಿಸ್ಟರ್ ಅಮಿತ್ ಶಾ ಅವರೊಂದಿಗೆ ಸ್ಥಿತಿ ಪರಿಶೀಲಿಸಿದ್ದೇನೆ” ಎಂದಿದ್ದಾರೆ. ಹೋಮ್ ಮಿನಿಸ್ಟರ್ ಅಮಿತ್ ಶಾ ಸ್ಥಳಕ್ಕೆ ಭೇಟಿ ನೀಡಿ ಗಾಯಾಳುಗಳನ್ನು ಭೇಟಿಯಾಗಿ, “ಎಲ್ಲಾ ಸಾಧ್ಯತೆಗಳನ್ನು ನೋಡಿ. ಸಂಪೂರ್ಣ ತನಿಖೆ ನಡೆಸಲಾಗುತ್ತದೆ” ಎಂದರು.
ಈ ಘಟನೆಯು ದೆಹಲಿಯ ಸುರಕ್ಷತಾ ವ್ಯವಸ್ಥೆಯನ್ನು ಪ್ರಶ್ನಿಸುತ್ತಿದ್ದು, ದೇಶಾದ್ಯಂತ ಹೈ ಅಲರ್ಟ್ ಘೋಷಿಸಲಾಗಿದೆ. ಜಮ್ಮು-ಕಾಶ್ಮೀರ, ಮಹಾರಾಷ್ಟ್ರ, ಮುಂಬೈ, ಗೌತಮ್ ಬುದ್ಧ ನಗರ, ಶ್ರೀನಗರ್ನಲ್ಲಿ ಸುರಕ್ಷತೆ ಹೆಚ್ಚಿಸಲಾಗಿದ್ದು, ಮೆಟ್ರೋ ಸ್ಟೇಶನ್ಗಳು, ಬಸ್/ರೈಲು ನಿಲ್ದಾಣಗಳು, ಏರ್ಪೋರ್ಟ್ಗಳು (IGI ದೆಹಲಿ ಸಹ) ಮತ್ತು ಜನದಟ್ಟಣೆಯ ಸ್ಥಳಗಳಲ್ಲಿ ಪರಿಶೀಲನೆ ತೀವ್ರಗೊಳಿಸಲಾಗಿದೆ. ಸಿಐಎಸ್ಎಫ್ ಸೈನಿಕರನ್ನು ಹೆಚ್ಚಿಸಿ, ಸಿಸಿಟಿವಿ ದೃಶ್ಯಗಳು, ಮೊಬೈಲ್ ಕಾಲ್ ರೆಕಾರ್ಡ್ಗಳು ಮತ್ತು ಸ್ನಿಫರ್ ಡಾಗ್ಗಳನ್ನು ಬಳಸಿ ತನಿಖೆ ನಡೆಯುತ್ತಿದೆ.
ಇದನ್ನೂ ಓದಿ | ಮುಂಬೈಯಲ್ಲಿ ಭಯೋತ್ಪಾದಕ ಬೆದರಿಕೆ: 34 ವಾಹನಗಳಲ್ಲಿ 400 ಕೆಜಿ ಆರ್ಡಿಎಕ್ಸ್ !
ರೆಡ್ ಫೋರ್ಟ್ 3 ದಿನಗಳ ಕಾಲ ಮುಚ್ಚಲ್ಪಟ್ಟಿದ್ದು. ಲೋಕ್ ನಾಯಕ್ ಆಸ್ಪತ್ರೆಯಲ್ಲಿ ಗಾಯಾಳುಗಳ ಚಿಕಿತ್ಸೆ ನಡೆಯುತ್ತಿದ್ದು, ಅಂಬುಲೆನ್ಸ್ಗಳಿಗಾಗಿ ವಿಶೇಷ ಕಾರಿಡಾರ್ ರಚಿಸಲಾಗಿದೆ. ಈ ಪ್ರದೇಶವು 17ನೇ ಶತಮಾನದ ಮೊಘಲ್ ಕಾಲದ ಐತಿಹಾಸಿಕ ಸ್ಥಳವಾಗಿದ್ದು, ಸ್ವಾತಂತ್ರ್ಯದ ಸಂಕೇತ.
