“ಎಲ್ಲಾ ಸರ್ಕಾರಿ ಮತ್ತು ಖಾಸಗಿ ಸಂಸ್ಥೆಗಳು ಮಹಿಳಾ ಉದ್ಯೋಗಿಗಳಿಗೆ ಮಾಸಿಕ ರಜೆ ಕಡ್ಡಾಯವಾಗಿ ನೀಡಬೇಕು. ತಿಂಗಳಿಗೊಮ್ಮೆ ಋತುಸ್ರಾವವಾದಾಗ ದೈಹಿಕವಾಗಿ ಮತ್ತು ಮಾನಸಿಕವಾಗಿ ಆಯಾಸಗೊಳ್ಳುತ್ತೇವೆ. ಹಾಗಾಗಿ, ತಿಂಗಳು ಪೂರ್ತಿ ಮಹಿಳೆಯೊಬ್ಬಳು ಚೆನ್ನಾಗಿ ದುಡಿಯಬೇಕಾದರೆ ಆಕೆಗೆ ಒಂದು ಅಥವಾ ಎರಡು ದಿನ ಈ ವೇತನ ಸಹಿತ ಮಾಸಿಕ ರಜೆ ತುಂಬ ಅಗತ್ಯ ಎಂದು ಸುಮಲತಾ ನಾಯ್ಕ್ ಹೇಳಿದರು.
ರಾಜ್ಯ ಸರ್ಕಾರ ಘೋಷಿಸಿರುವ ʻಕರ್ನಾಟಕ ಮಾಸಿಕ ರಜೆ ನೀತಿ 2025ʼ ಕುರಿತು ಸಮಾಚಾರ.ಕಾಮ್ ನ್ಯೂಸ್ನೊಂದಿಗೆ ಮಾತನಾಡಿದ ಕುಂದಾಪುರದ ಭಂಡಾರ್ಕಾರ್ಸ ಕಲಾ ಮತ್ತು ವಿಜ್ಞಾನ ಕಾಲೇಜಿನ ಪತ್ರಿಕೋದ್ಯಮ ವಿಭಾಗದ ಮುಖ್ಯಸ್ಥೆ ಸುಮಲತಾ ನಾಯ್ಕ ಅವರು, ಎಲ್ಲಾ ಮಹಿಳೆಯರ ದೇಹದ ಸ್ಥಿತಿ ಒಂದೇ ರೀತಿಯಾಗಿರುವುದಿಲ್ಲ. ಕೆಲವರಿಗೆ ಮೊದಲ ದಿನ ನೋವಿದ್ದರೆ, ಇನ್ನು ಕೆಲವರಿಗೆ ಎರಡನೇ ದಿನ ಅಧಿಕ ನೋವಿರುತ್ತದೆ. ಹಾಗಾಗಿ, ಕನಿಷ್ಠ ಎರಡು ದಿನ ರಜೆಯನ್ನಾದರೂ ನೀಡಬೇಕು,” ಎಂದರು.
ಏಕೆ ಈ ಋತುಚಕ್ರ ರಜೆ ಮಹಿಳೆಯರಿಗೆ ಮುಖ್ಯ:
ಈ ವೇತನ ಸಹಿತ ಋತುಚಕ್ರ ರಜೆಯು ಮಹಿಳೆಯರಿಗೆ ಆರೋಗ್ಯಕರ ಕೆಲಸದ ವಾತಾವರಣವನ್ನು ಒದಗಿಸುತ್ತದೆ ಮತ್ತು ಕೆಲಸದ ಸ್ಥಳದಲ್ಲಿ ಲಿಂಗ ಸಮಾನತೆಯನ್ನು ಉತ್ತೇಜಿಸುತ್ತದೆ. ಇದರಿಂದ ಕೆಲಸದ ಸಾಮರ್ಥ್ಯ ಶೇಕಡ 20–30ರಷ್ಟು ಕಡಿಮೆಯಾಗುವುದನ್ನು ತಡೆಯಬಹುದು. ಅಮೆರಿಕಾದ ಒಂದು ಅಧ್ಯಯನವು ಈ ರಜೆಯಿಂದ ಒತ್ತಡ ಶೇಕಡ 25ರಷ್ಟು ಕಡಿಮೆಯಾಗಿ, ಕೆಲಸದ ಉತ್ಪಾದಕತೆ ಹೆಚ್ಚಾಗುತ್ತದೆ ಎಂದು ತಿಳಿಸಿದೆ. ಜಪಾನ್ (1947ರಿಂದ) ಮತ್ತು ದಕ್ಷಿಣ ಕೊರಿಯಾ (2001ರಿಂದ) ಈ ರಜೆಯನ್ನು ಜಾರಿಗೊಳಿಸಿದ್ದು, ಮಹಿಳಾ ಉದ್ಯೋಗಿಗಳ ಸಂತೃಪ್ತಿ ಶೇಕಡ 15ರಷ್ಟು ಹೆಚ್ಚಿದೆ ಎಂದು NCBI ಸಂಶೋಧನೆ ತೋರಿಸಿದೆ.
ಕರ್ನಾಟಕ ರಾಜ್ಯ ಕಾಂಗ್ರೆಸ್ ಸರ್ಕಾರವು ಗೃಹಲಕ್ಷ್ಮೀ ಯೋಜನೆ, ಸ್ತ್ರೀ ಶಕ್ತಿ ಯೋಜನೆಗಳಂತಹ ಯೋಜನೆಗಳಿಂದ ಮಹಿಳಾ ಸಬಲೀಕರಣಕ್ಕೆ ಒತ್ತು ನೀಡುತ್ತಾ ಬಂದಿದೆ. ಇದೀಗ, ಮಹಿಳಾ ಉದ್ಯೋಗಿಗಳ ಆರೋಗ್ಯಕ್ಕಾಗಿ ಐತಿಹಾಸಿಕ ನಿರ್ಧಾರವನ್ನು ಕೈಗೊಂಡಿದೆ.
ಸರ್ಕಾರದ ಕಾರ್ಮಿಕ ಬಲ ಸಮೀಕ್ಷೆಯ ಪ್ರಕಾರ, ಕರ್ನಾಟಕದಲ್ಲಿ ಮಹಿಳೆಯರ ಕಾರ್ಮಿಕ ಭಾಗವಹಿಸುವಿಕೆ ದರ ದೇಶದಲ್ಲೇ ಅತ್ಯಧಿಕವಾಗಿದ್ದು, ಶೇಕಡ 31.5ರಷ್ಟಿದೆ. ಹಾಗಾಗಿ, ಕರ್ನಾಟಕ ಸರ್ಕಾರವು ಸರ್ಕಾರಿ ಮತ್ತು ಖಾಸಗಿ ಸಂಸ್ಥೆಗಳಲ್ಲಿ ಕೆಲಸ ಮಾಡುವ ಎಲ್ಲಾ ಮಹಿಳೆಯರಿಗೆ ಪ್ರತಿ ತಿಂಗಳು ಒಂದು ದಿನದ ಕಡ್ಡಾಯ ಮಾಸಿಕ ರಜೆ ನೀಡುವ ‘ಕರ್ನಾಟಕ ಮಾಸಿಕ ರಜೆ ನೀತಿ 2025’ ಅನ್ನು 2025ರ ಅಕ್ಟೋಬರ್ 9ರಂದು ಘೋಷಿಸಿದೆ. ಈ ನೀತಿಯು ವಾರ್ಷಿಕ 12 ದಿನಗಳ ಸವೇತನ ರಜೆಯನ್ನು ಒದಗಿಸಲಿದ್ದು, ಭಾರತದಲ್ಲಿ ಸರ್ಕಾರಿ-ಖಾಸಗಿ ವಲಯಗಳನ್ನು ಒಳಗೊಂಡ ಮೊದಲ ರಾಜ್ಯವಾಗಿ ಕರ್ನಾಟಕ ಗುರುತಿಸಿಕೊಂಡಿದೆ.
ಋತುಚಕ್ರದ ರಜೆ ವಿಷಯವು ಭಾರತದಲ್ಲಿ ಭಾರಿ ಚರ್ಚೆಗೆ ಒಳಗಾಗಿದೆ. ಕರ್ನಾಟಕದಲ್ಲಿ ಮಾಸಿಕ ರಜೆ ಘೋಷಣೆಯಾಗಿರುವುದು ಚರ್ಚೆಯ ಮುಖ್ಯ ಭಾಗವಾಗಿದೆ, ಇದು ಭಾರತದ ಮೊದಲ ರಾಜ್ಯವಾಗಿ ಸರ್ಕಾರಿ-ಖಾಸಗಿ ಎರಡೂ ವಲಯಗಳನ್ನು ಒಳಗೊಂಡಿದೆ. ಇದೀಗ ಕರ್ನಾಟಕ, ಬಿಹಾರ ಮತ್ತು ಒಡಿಶಾದಂತಹ ರಾಜ್ಯಗಳ ಜೊತೆ ಸೇರಿ ಮಹಿಳಾ ಉದ್ಯೋಗಿಗಳಿಗೆ ಮಾಸಿಕ ರಜೆ ನೀಡುವ ರಾಜ್ಯಗಳ ಪಟ್ಟಿಗೆ ಸೇರಿದೆ. ಬಿಹಾರದಲ್ಲಿ ಸರ್ಕಾರಿ ಮಹಿಳಾ ಉದ್ಯೋಗಿಗಳಿಗೆ ತಿಂಗಳಿಗೆ ಎರಡು ದಿನ ರಜೆ ಇದ್ದರೆ, ಒಡಿಶಾದಲ್ಲಿ ಎಲ್ಲಾ ಕ್ಷೇತ್ರಗಳ ಮಹಿಳೆಯರಿಗೆ ವರ್ಷಕ್ಕೆ 12 ದಿನ ರಜೆ ನೀಡಲಾಗುತ್ತದೆ.
ಮೊದಲು ಮಾಸಿಕ ರಜೆಯ ನೀತಿ ರಾಜ್ಯದಲ್ಲಿ ವ್ಯಾಪಕವಾಗಿ ಅನ್ವಯದಲ್ಲಿರಲಿಲ್ಲ. ಆದರೂ ಕೂಡ ಕೆಲವು ಖಾಸಗಿ ಸಂಸ್ಥೆಗಳು, ಉದಾಹರಣೆಗೆ ಫ್ಲಿಪ್ಕಾರ್ಟ್ನಂತಹ ಇತರ ಕಂಪನಿಗಳು ಮತ್ತು NGOಗಳು, ಸ್ವಯಂಪ್ರೇರಿತವಾಗಿ 1-2 ದಿನಗಳ ರಜೆಯನ್ನು ನೀಡುತ್ತಿದ್ದವು, ಆದರೆ ಇದು ಕಡ್ಡಾಯವಾಗಿರಲಿಲ್ಲ. ಸರ್ಕಾರಿ ಕಚೇರಿಗಳಲ್ಲಿ ಸಹ, ಇದು ಸಾಮಾನ್ಯ ರಜೆಯ ಭಾಗವಾಗಿ ಪರಿಗಣಿಸಲ್ಪಡುತ್ತಿತ್ತು, ಆದರೆ ವಿಶೇಷ ಮಾಸಿಕ ರಜೆ ನೀತಿ ಇರಲಿಲ್ಲ.
ಇದನ್ನೂ ಓದಿ | ಟ್ರಂಪ್ಗಿಲ್ಲದ ನೊಬೆಲ್, ಮಾರಿಯಾ ಮಚಾಡೊ ಮುಡಿಗೆ
2025ರ ಅಕ್ಟೋಬರ್ 9ರಂದು ಕಾನೂನು ಸುಧಾರಣಾ ಆಯೋಗದ ಸಲಹೆಯ ಆಧಾರದ ಮೇಲೆ ಈ ನೀತಿಯನ್ನು ಒಕ್ಕೂಟದಲ್ಲಿ ಅಂಗೀಕರಿಸಲಾಗಿದೆ. ಈ ರಜೆಯು ಶಿಕ್ಷಣ, ಆರೋಗ್ಯ, ವಾಣಿಜ್ಯ, ಉದ್ಯಮ ಸೇರಿದಂತೆ ಎಲ್ಲಾ ಕ್ಷೇತ್ರಗಳ ಮಹಿಳಾ ಉದ್ಯೋಗಿಗಳಿಗೆ ಅನ್ವಯವಾಗಲಿದೆ. ರಾಜ್ಯದ ಲಕ್ಷಾಂತರ ಮಹಿಳಾ ಉದ್ಯೋಗಿಗಳಿಗೆ ಈ ನೀತಿಯಿಂದ ಲಾಭವಾಗಲಿದೆ. ಜಿಲ್ಲಾ ಕಚೇರಿಗಳು, ತಹಶೀಲ್ದಾರ್ ಕಚೇರಿಗಳು, ಪೊಲೀಸ್ ಇಲಾಖೆ, MNCಗಳು, ಗಾರ್ಮೆಂಟ್ ಫ್ಯಾಕ್ಟರಿಗಳು ಮತ್ತು ಶಿಕ್ಷಣ ಸಂಸ್ಥೆಗಳು ಸೇರಿದಂತೆ ಎಲ್ಲಾ 50,000ಕ್ಕೂ ಹೆಚ್ಚು ಸರ್ಕಾರಿ ಕಚೇರಿಗಳು ಮತ್ತು ಲಕ್ಷಾಂತರ ಖಾಸಗಿ ಸಂಸ್ಥೆಗಳಲ್ಲಿ ಈ ರಜೆ ಕಡ್ಡಾಯವಾಗಿ ಜಾರಿಯಾಗಲಿದೆ.
ಈ ನೀತಿಯು ಋತುಸ್ರಾವದ ಬಗ್ಗೆ ಸಾಮಾಜಿಕ ಕಳಂಕವನ್ನು ಕಡಿಮೆ ಮಾಡಲು ಮತ್ತು ಮಹಿಳೆಯರ ಆರೋಗ್ಯದ ಬಗ್ಗೆ ಜಾಗೃತಿ ಮೂಡಿಸಲು ಸಹಾಯ ಮಾಡಲಿದೆ. ಇದು ಲಿಂಗ ಸಮಾನತೆಯ ಕಡೆಗಿನ ಮಹತ್ವದ ಹೆಜ್ಜೆಯಾಗಿದೆ. ಸರ್ಕಾರವು ತರಬೇತಿ, ಜಾಗೃತಿ ಕಾರ್ಯಕ್ರಮಗಳು ಮತ್ತು ದೂರುದಾರಿ ವ್ಯವಸ್ಥೆಯ ಮೂಲಕ ಈ ನೀತಿಯ ಅನುಷ್ಠಾನವನ್ನು ಬಲಪಡಿಸಲಿದೆ. ಈ ನೀತಿಯು ಇತರ ರಾಜ್ಯಗಳಿಗೆ ಮಾದರಿಯಾಗಿ, ಮಹಿಳಾ ಸಬಲೀಕರಣಕ್ಕೆ ದಾರಿ ಮಾಡಿಕೊಡಲಿದೆ.
