2024ರ ಹರಿಯಾಣ ವಿಧಾನಸಭಾ ಚುನಾವಣೆಯಲ್ಲಿ ಬರೋಬ್ಬರಿ 25 ಲಕ್ಷ ಮತಗಳು ಕಳ್ಳತನಗೊಳಗಾಗಿವೆ ಎಂದು ಲೋಕಸಭೆ ವಿಪಕ್ಷ ನಾಯಕ ರಾಹುಲ್ ಗಾಂಧಿ ಆರೋಪಿಸಿದ್ದಾರೆ.
ಮಹದೇವಪುರ, ಆಳಂದ ಕ್ಷೇತ್ರಗಳಲ್ಲಿ ಮತಗಳ್ಳತನ ನಡೆದ ವಿವರಗಳನ್ನು ನೀಡಿದ್ದ ಎಐಸಿಸಿ ನಾಯಕ ರಾಹುಲ್ ಗಾಂಧಿ ಇಂದು ನವದೆಹಲಿಯ ಎಐಸಿಸಿ ಕಚೇರಿಯಲ್ಲಿ ಮಂಗಳವಾರ ನಡೆದ ಸುದ್ದಿಗೋಷ್ಠಿಯಲ್ಲಿ ಹರಿಯಾಣದಲ್ಲಿ ನಡೆದ ಮತಗಳ್ಳತನದ ವಿವರಗಳನ್ನು ಬಿಚ್ಚಿಟ್ಟರು.
ಸುದೀರ್ಘ ಒಂದು ಗಂಟೆ 20 ನಿಮಿಷಗಳ ಪತ್ರಿಕಾಗೋಷ್ಠಿಯಲ್ಲಿ ಹರಿಯಾಣದಲ್ಲಿ ನಡೆದ 25 ಲಕ್ಷ ಮತಗಳ ಕಳವಿನ ವಿವರಗಳನ್ನು ಬಿಡಿಸಿಟ್ಟರು, ಈ ಮತಗಳ ಅಕ್ರಮವು ಹರಿಯಾಣಕ್ಕೆ ಸೀಮಿತವಲ್ಲ, ರಾಜ್ಯ ಹಾಗೂ ದೇಶಾದ್ಯಂತ ವ್ಯಾಪಿಸಿದೆ ಎಂದು ಅರೋಪಿಸಿದ್ದಾರೆ.
ಹರಿಯಾಣದ ಮತಗಳ್ಳತನ ಪ್ರಮಾಣ
ಹರಿಯಾಣದಲ್ಲಿ ಮತಗಳ್ಳತನದ ಪ್ರಮಾಣ ಶೇ.12.5 ರಷ್ಟು ಆಗಿದ್ದು, 93,000 ವಿಳಾಸಗಳು ತಪ್ಪಾಗಿವೆ ಎಂದು ದಾಖಲೆಗಳೊಂದಿಗೆ ವಿವರಣೆ ನೀಡಿದರು. ಒಬ್ಬ ಮಹಿಳೆಯು ಸೀಮಾ, ಸ್ವೀಟಿ, ಸರಸ್ವತಿ ಸೇರಿದಂತೆ ಹಲವು ಹೆಸರಿನಲ್ಲಿ 22 ಬಾರಿ ಮತ ಚಲಾಯಿಸಿದ್ದಾಳೆ. ಈ ಮಹಿಳೆ 10 ವಿಭಿನ್ನ ಬೂಥ್ಗಳಲ್ಲಿ ಮತದಾನ ಮಾಡಿರುವುದು ನಂತರ ತಿಳಿದುಬಂದಿದೆ ಎಂದು ಮಾಹಿತಿ ನೀಡಿದ ರಾಹುಲ್ ಗಾಂಧಿ, ಆ ಮಹಿಳೆ ವಾಸ್ತವದಲ್ಲಿ ಬ್ರೆಜಿಲ್ನ ಮಾಡೆಲ್ ಎಂದು ಮಾಹಿತಿ ನೀಡಿದರು. ಈ ಘಟನೆಯೇ 25 ಲಕ್ಷ ಮತ ಕಳ್ಳತನದ ಉದಾಹರಣೆ ಎಂದು ರಾಹುಲ್ ಬಿಚ್ಚಿಟ್ಟರು.
2 ಕೋಟಿ ಮತಗಳಲ್ಲಿ 25 ಲಕ್ಷ ನಕಲಿ ಮತಗಳು ಇದ್ದು, ಪ್ರತಿ 8 ಮತದಾರರಲ್ಲಿ ಒಂದು ಮತ ನಕಲಿ ಆಗಿದೆ. ಒಂದೇ ಗುರುತಿನ ಚೀಟಿಯಲ್ಲಿ ಒಂದೇ ಕ್ಷೇತ್ರದಲ್ಲಿ ನೂರು ಮತಗಳು ಕಂಡುಬಂದಿವೆ. ನಕಲಿ ಫೋಟೋಗಳನ್ನು ಬಳಸಿ ಒಂದೇ ಗುರುತಿನಲ್ಲಿ ಹಲವು ಮತಗಳನ್ನು ಚಲಾಯಿಸಲಾಗಿದೆ ಎಂದು ರಾಹುಲ್ ಆರೋಪಿಸಿದರು.
ಈ ಅಕ್ರಮವು ಮಹಾದೇವಪುರ, ಆಳಂದಂತಹ ಕ್ಷೇತ್ರಗಳಿಗೆ ಸೀಮಿತವಲ್ಲ, ಹರಿಯಾಣ, ಮಧ್ಯಪ್ರದೇಶ, ಮಹಾರಾಷ್ಟ್ರ, ಛತ್ತೀಸ್ಗಢಗಳಂತಹ ರಾಜ್ಯಗಳೆಲ್ಲದರಲ್ಲೂ ನಡೆದಿದೆ ಎಂದು ಅವರು ಹೇಳಿದರು. ಈಗ ಹರಿಯಾಣವನ್ನು ಕೇಂದ್ರೀಕರಿಸಿ ಚುನಾವಣಾ ಆಯೋಗ ಮತ್ತು ಕೇಂದ್ರ ಸರ್ಕಾರದೊಂದಿಗೆ ಈ ವಿಷಯ ಎತ್ತಿದ್ದೇವೆ ಎಂದು ತಿಳಿಸಿದರು.
ರಾಹುಲ್ ಗಾಂಧಿ, “ಚುನಾವಣೆಯ ಫಲಿತಾಂಶಗಳು ನಮ್ಮ ಜನತಂತ್ರದ ಮೇಲೆ ಕಪ್ಪು ಕಲೆಯಾಗಿವೆ. ನಾವು ಇದನ್ನು ಸಹಿಸುವುದಿಲ್ಲ” ಎಂದು ಖಂಡಿಸಿದ್ದಾರೆ. ಚುನಾವಣಾ ಆಯೋಗ ಈ ಆರೋಪಗಳಿಗೆ ತನಿಖೆ ನಡೆಸುವುದಾಗಿ ಸೂಚಿಸಿದ್ದರೂ, ರಾಹುಲ್ ಅವರು ಸ್ವತಂತ್ರ ತನಿಖೆಗೆ ಒತ್ತಾಯಿಸಿದ್ದಾರೆ. ಹರಿಯಾಣದಲ್ಲಿ ಕಾಂಗ್ರೆಸ್ ಸೋಲುವುದು ನಿರೀಕ್ಷೆಯ ವಿರುದ್ಧವಾಗಿತ್ತು, ಮತ್ತು ಈಗ ಈ ದಾಖಲೆಗಳು ಚುನಾವಣಾ ಪ್ರಕ್ರಿಯೆಯ ಸಮಗ್ರತೆಯನ್ನು ಪ್ರಶ್ನಿಸುತ್ತಿವೆ.
ಇದನ್ನೂ ಓದಿ | ಮತ್ತೆ ಮುನ್ನೆಲೆಗೆ ಬಂದ ಭಾರತೀಯ ಚುನಾವಣಾ ವ್ಯವಸ್ಥೆಯ ವೈಫಲ್ಯ!
ಈ ಆರೋಪಗಳು 2024ರ ಚುನಾವಣೆಗಳ ಭವಿಷ್ಯದ ಚರ್ಚೆಗಳನ್ನು ತೀವ್ರವಾಗಿ ಹೆಚ್ಚಿಸಿವೆ. ಸಮೀಕ್ಷೆಗಳಲ್ಲಿ ಕಾಂಗ್ರೆಸ್ ಮುಂದಿತ್ತು ಎಂಬುದು ಸ್ಪಷ್ಟವಾಗಿದ್ದರೂ, ಫಲಿತಾಂಶದಲ್ಲಿ ಬಿಜೆಪಿ ಗೆದ್ದಿರುವುದು ಅನುಮಾನಗಳನ್ನು ಹುಟ್ಟಿಸಿದೆ. 25 ಲಕ್ಷ ನಕಲಿ ಮತಗಳ ಆರೋಪವು ಜನತಂತ್ರದ ಮೂಲಭೂತಗಳನ್ನು ಚ್ಯಾಲೆಂಜ್ ಮಾಡುತ್ತಿದ್ದು, ಚುನಾವಣಾ ಆಯೋಗದ ಮೇಲೆ ಒತ್ತಡ ಹೆಚ್ಚಾಗಿದೆ. ರಾಹುಲ್ ಅವರು ಈ ವಿಷಯವನ್ನು ಸಂಸತ್ತಿನಲ್ಲಿ ಎತ್ತಲು ಘೋಷಿಸಿದ್ದಾರೆ.
ಈ ಘಟನೆಯು ಭಾರತೀಯ ಚುನಾವಣಾ ವ್ಯವಸ್ಥೆಯ ದೌರ್ಬಲ್ಯಗಳನ್ನು ಬಹಿರಂಗಪಡಿಸಿದೆ. ನಕಲಿ ಮತಗಳು, ತಪ್ಪು ವಿಳಾಸಗಳು, ಮತ್ತು ಬಹುಬಾರಿ ಮತದಾನಗಳು ಜನತಂತ್ರದ ಮೇಲೆ ಧಕ್ಕೆ ನೀಡುತ್ತಿವೆ. ರಾಹುಲ್ ಗಾಂಧಿಯ ಈ ಹೋರಾಟವು ಭವಿಷ್ಯದ ಚುನಾವಣೆಗಳಲ್ಲಿ ಸುಧಾರಣೆಗಳಿಗೆ ದಾರಿ ಮಾಡಿಕೊಡಬಹುದು ಎಂದು ಪ್ರಜ್ಞಾವಂತ ವಲಯದಲ್ಲಿ ಚರ್ಚೆಯಾಗುತ್ತಿದೆ.
