ರಾಜ್ಯದ ಸರ್ಕಾರಿ ಹಾಗೂ ಅನುದಾನಿತ ಕಾರ್ಯಕ್ರಮಗಳಲ್ಲಿ ಗಣ್ಯರಿಗೆ ನೀಡುತ್ತಿದ್ದ ಟ್ರೋಫಿಗಳು, ಸ್ಮರಣಿಕೆಗಳು ಮತ್ತು ಇತರ ದುಬಾರಿ ಉಡುಗೊರೆಗಳಿಗೆ ರಾಜ್ಯ ಸರ್ಕಾರವು ಸಂಪೂರ್ಣ ಬ್ರೇಕ್ ಹಾಕಿದೆ. ಇದು ಆಡಳಿತ ಸುಧಾರಣೆಗೆ ಒಂದು ದೊಡ್ಡ ಹೆಜ್ಜೆಯಾಗಿದ್ದು, ಸಾರ್ವಜನಿಕ ಹಣದ ವ್ಯರ್ಥವನ್ನು ತಡೆಯಲು ಉದ್ದೇಶಿಸಿದೆ.
ಸಿಬ್ಬಂದಿ ಮತ್ತು ಆಡಳಿತ ಸುಧಾರಣಾ ಇಲಾಖೆ (ಪ್ರೋಟೋಕಾಲ್)ಯಿಂದ ಹೊರಡಿಸಿರುವ ಸುತ್ತೋಲೆಗಳ ಪ್ರಕಾರ, ಇನ್ನು ಮುಂದೆ ಕಾರ್ಯಕ್ರಮಗಳಲ್ಲಿ ಸ್ಥಳೀಯ ಕುಶಲಕರ್ಮಿಗಳು ತಯಾರಿಸಿದ ಕರಕುಶಲ ವಸ್ತುಗಳು, ಕನ್ನಡ ಪುಸ್ತಕಗಳು, ಸಸಿಗಳು ಅಥವಾ ಪರಿಸರ ಸ್ನೇಹಿ ಉಡುಗೊರೆಗಳನ್ನು ಮಾತ್ರ ನೀಡಬೇಕು.
ಈ ನಿಯಮವು ರಾಜ್ಯಪಾಲ ಕಚೇರಿ, ಸಚಿವಾಲಯಗಳು, ಇಲಾಖಾ ಕಚೇರಿಗಳು ಸೇರಿದಂತೆ ಎಲ್ಲಾ ಸರ್ಕಾರಿ ಸಂಸ್ಥೆಗಳಿಗೆ ಅನ್ವಯವಾಗುತ್ತದೆ. ಹಿರಿಯ ಅಧಿಕಾರಿಗಳು, ಸಚಿವರು ಮತ್ತು ಇತರ ಗಣ್ಯರಿಗೆ ಗೌರವ ನೀಡುವುದು ಮುಖ್ಯವಾದರೂ, ದುಬಾರಿ ಟ್ರೋಫಿಗಳು ಮತ್ತು ಸ್ಮರಣಿಕೆಗಳು ಲಕ್ಷಾಂತರ ರೂಪಾಯಿಗಳ ವ್ಯರ್ಥವನ್ನು ಉಂಟುಮಾಡುತ್ತಿವೆ ಎಂದು ಇಲಾಖೆಯ ಅಧಿಕಾರಿಯೊಬ್ಬರು ತಿಳಿಸಿದರು. “ಇದರ ಬದಲಿಗೆ ಸ್ಥಳೀಯ ಕರಕುಶಲಕ್ಕೆ ಒತ್ತು ನೀಡುವುದರಿಂದ ರಾಜ್ಯದ ಉದ್ಯಮಿಗಳು ಮತ್ತು ಕುಶಲಕರ್ಮಿಗಳಿಗೆ ಆದಾಯ ಸೃಷ್ಟಿಯಾಗುತ್ತದೆ. ಕನ್ನಡ ಪುಸ್ತಕಗಳು ನೀಡುವುದರಿಂದ ಸಾಂಸ್ಕೃತಿಕ ಮೌಲ್ಯವೂ ಸೇರ್ಪಡೆಯಾಗುತ್ತದೆ” ಎಂದು ಅವರು ಹೇಳಿದರು.
ಇದನ್ನೂ ಓದಿ | ಯುವಕರ ತಾಳ್ಮೆ ಪರೀಕ್ಷಿಸಬೇಡಿ, ದಂಗೆ ಎದ್ದಾರು ಎಚ್ಚರ: ಸರ್ಕಾರಕ್ಕೆ ವಿಜಯೇಂದ್ರ ಎಚ್ಚರಿಕೆ!
ಈ ನಿರ್ಧಾರವು ರಲ್ಲಿ 2021ರಲ್ಲಿ ಬಸವರಾಜ ಬೊಮ್ಮಯಿ ಸರ್ಕಾರದಿಂದ ಆರಂಭಿಸಿದ್ದ ಪ್ರೋಟೋಕಾಲ್ ಸುಧಾರಣೆಯ ಮುಂದುವರಿಕೆಯಾಗಿದೆ. ಆಗ ಮಾಲೆ, ಶಾಲ್, ಪುಷ್ಪಗುಚ್ಛಗಳು ಮತ್ತು ಸ್ಮರಣಿಕೆಗಳಿಗೆ ನಿಷೇಧ ಹಾಕಲಾಗಿತ್ತು. ಈಗ ಸಿದ್ದರಾಮಯ್ಯ ನೇತೃತ್ವದ ಸರ್ಕಾರವು ಇದನ್ನು ವಿಸ್ತರಿಸಿ, ಟ್ರೋಫಿಗಳನ್ನೂ ಸೇರಿಸಿದೆ. ಪರಿಸರ ಸಂರಕ್ಷಣೆಯ ದೃಷ್ಟಿಯಿಂದ ಸಸಿಗಳು ನೀಡುವುದು ಉತ್ತಮ ಎಂದು ಸೂಚಿಸಲಾಗಿದೆ. ಈ ನಿಯಮ ಉಲ್ಲಂಘಿಸಿದರೆ ಕಠಿಣ ಕ್ರಮಗಳು ತೆಗೆದುಕೊಳ್ಳಲಾಗುತ್ತದೆ ಎಂದು ಸುತ್ತೋಲೆಗಳಲ್ಲಿ ಎಚ್ಚರಿಸಲಾಗಿದೆ.
