ಕರ್ನಾಟಕ ಸರ್ಕಾರದ ಉದ್ದೇಶಿತ ಶರಾವತಿ ಪಂಪ್ ಸ್ಟೋರೇಜ್ ಯೋಜನೆಯ ವಿರುದ್ಧ ಸಾಗರ ತಾಲೂಕಿನಲ್ಲಿ ಹೋರಾಟ ತೀವ್ರಗೊಂಡಿದೆ. ಅಕ್ಟೋಬರ್ 4ರಿಂದ ಪ್ರಾರಂಭವಾದ ಧರಣಿ ಸತ್ಯಾಗ್ರಹದಲ್ಲಿ ರೈತರು, ಪರಿಸರವಾದಿಗಳು, ರಾಜಕೀಯ ನಾಯಕರು ಮತ್ತು ಸಾಮಾನ್ಯ ಜನರ ಭಾಗವಹಿಸುತ್ತಿದ್ದು, ಈ ಯೋಜನೆಯು ಪಶ್ಚಿಮ ಘಟ್ಟದ ಸೂಕ್ಷ್ಮ ಪರಿಸರಕ್ಕೆ ಮಾರಕವಾಗುತ್ತದೆ ಎಂದು ಆಕ್ರೋಶ ವ್ಯಕ್ತಪಡಿಸಲಾಗುತ್ತಿದೆ.
ನಿರಂತರವಾಗಿ 11ದಿನಗಳಕಾಲ ನಡೆದ ಈ ಪ್ರತಿಭಟನೆ ನಾಳೆ (ಅಕ್ಟೋಬರ್ 15) ಬೆಳಿಗ್ಗೆ 10 ಗಂಟೆಗೆ ಸಾಗರದ ಉಪವಿಭಾಗಾಧಿಕಾರಿ ಕಚೇರಿ ಮುಂದೆ ಬೃಹತ್ ಪ್ರತಿಭಟನಾ ಸಭೆ ನಡೆಯಲಿದ್ದು, ಕರ್ನಾಟಕ ರಾಜ್ಯ ರೈತ ಸಂಘ ಮತ್ತು ಹಸಿರು ಸೇನೆಯ ನೇತೃತ್ವದಲ್ಲಿ ಸಾವಿರಾರು ಜನರು ಭಾಗವಹಿಸಲಿದ್ದಾರೆ.
ಈ 10,250 ಕೋಟಿ ರೂಪಾಯಿಗಳ ಯೋಜನೆಯು ಸುಮಾರು 2,000 ಮೆಗಾವ್ಯಾಟ್ ವಿದ್ಯುತ್ ಉತ್ಪಾದನೆಗೆ ಗುರಿ ಹೊಂದಿದ್ದು, ಈಗಾಗಲೇ ಇರುವ 1,460 ಮೆಗಾವ್ಯಾಟ್ಗೆ ಸೇರಿ ಒಟ್ಟು 3,460 ಮೆಗಾವ್ಯಾಟ್ ಉತ್ಪಾದನೆ ಸಾಧ್ಯವಾಗುತ್ತದೆ ಎಂದು ಕರ್ನಾಟಕ ಪವರ್ ಕಾರ್ಪೊರೇಷನ್ ಲಿಮಿಟೆಡ್ (ಕೆಪಿಸಿಎಲ್) ಹೇಳುತ್ತದೆ. ಆದರೆ, ವಿರೋಧಿಗಳು ಇದನ್ನು ಅವೈಜ್ಞಾನಿಕ ಮತ್ತು ಪರಿಸರವಿನಾಶಕ ಯೋಜನೆ ಎಂದು ಖಂಡಿಸುತ್ತಿದ್ದಾರೆ. ಯೋಜನೆಗಾಗಿ ಲಕ್ಷಾಂತರ ಎಕರೆ ಕೃಷಿ ಭೂಮಿ, ಅಡಿಕೆ ಮತ್ತು ತೆಂಗಿನ ತೋಟಗಳನ್ನು ಸ್ವಾಧೀನಪಡಿಸಿಕೊಳ್ಳುವುದು, ಶರಾವತಿ ಕೊಳ್ಳದಲ್ಲಿ 16,000 ಮರಗಳ ಕಟಾವು ಮತ್ತು ಹೊರ ರಾಜ್ಯದ 4-5 ಸಾವಿರ ಕಾರ್ಮಿಕರ ಆಗಮನದಿಂದ ಕಾನೂನುಬಾಹಿರ ಚಟುವಟಿಕೆಗಳ ಆತಂಕವಿದೆ ಎಂದು ಆಕ್ಷೇಪಗಳು ಎದ್ದಿವೆ.
ಶರಾವತಿ ಯೋಜನೆಗೆ ಶಾಸಕ ದರ್ಶನ್ರ ಬೆಂಬಲ
ಮೇಲುಕೋಟೆ ಶಾಸಕ ಮತ್ತು ರಾಜ್ಯ ರೈತ ಸಂಘದ ಮುಖಂಡರಾದ ದರ್ಶನ್ ಪುಟ್ಟಣ್ಣಯ್ಯ ಅವರು ಈ ಯೋಜನೆಯ ಬಗ್ಗೆ ವಿರೋಧ ವ್ಯಕ್ತಪಡಿಸಿದ್ದಾರೆ. ” 2,000 ಮೆಗಾವ್ಯಾಟ್ ವಿದ್ಯುತ್ ಉತ್ಪಾದನೆಗಾಗಿ ಸರ್ಕಾರ ಈ ಯೋಜನೆಯನ್ನು ಜಾರಿಗೊಳಿಸುತ್ತಿದೆ. ಆದರೆ, ಇದು ವೈಲ್ಡ್ಲೈಫ್ ಪ್ರೊಟೆಕ್ಷನ್ ಆಕ್ಟ್ನ ಸೆಕ್ಷನ್ 29ಕ್ಕೆ ವಿರುದ್ಧವಾಗಿದ್ದು, ಜನರ ಹಣವನ್ನು ಖರ್ಚುಮಾಡಿ ಜನರಿಗೇ ಅಪಾಯ ತರುವ ಯೋಜನೆಯಾಗಿದೆ” ಎಂದು ಅವರು ಹೇಳಿದರು. ಉತ್ಪಾದನೆಗೆ 2,500 ಮೆಗಾವ್ಯಾಟ್ ವಿದ್ಯುತ್ ಬಳಕೆ ಮಾಡುವುದು ಆರ್ಥಿಕವಾಗಿ ನಷ್ಟಕ್ಕೆ ಕಾರಣವಾಗುತ್ತದೆ ಎಂದೂ ಅವರು ಸೂಚಿಸಿದರು.
“16,000 ಮರಗಳ ಕಟಾವು ಎಂದರೆ ದೊಡ್ಡ ಮರಗಳ ಮಾತ್ರ; ಸಣ್ಣ ಸಸಿಗಳು ಕೂಡ ನಾಶವಾಗುತ್ತವೆ. ಶರಾವತಿ ಕೊಳ್ಳದ ಸಿಂಗಳಿಕ ಅಭಯಾರಣ್ಯದಲ್ಲಿ ಕಪ್ಪು ಬಣ್ಣದ ಅಪರೂಪದ ಲಯನ್-ಟೈಲ್ಡ್ ಮಕಾಕ್ ಕೋತಿಗಳು ನೆಲೆಸಿವೆ. ಈ ಕಾಡು ನಾಶದಿಂದ ಅವುಗಳ ಅಸ್ತಿತ್ವಕ್ಕೇ ಧಕ್ಕೆ ಬರಲಿದೆ” ಎಂದು ಸ್ಥಳಿಯ ಪತ್ರಕರ್ತರಾದ ಹಿತಾಕರ್ ಜೈನ್ರವರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ಶರಾವತಿ ಯೋಜನೆ ಅವೈಜ್ಞಾನಿಕ!
ಯೋಜನೆಗಾಗಿ ಸುರಂಗಮಾರ್ಗ ಕೊರೆಯಲು 18,500 ಟನ್ ಸ್ಪೋಟಕಗಳ ಬಳಕೆಯಿಂದ ಭೂಕುಸಿತ, ಲಿಂಗನಮಕ್ಕಿ ಅಣೆಕಟ್ಟೆಗೆ ಹಾನಿ ಮತ್ತು ಮಹಾತ್ಮಾ ಗಾಂಧಿ ಪವರ್ ಹೌಸ್ಗೆ (3 ಕಿ.ಮೀ. ದೂರ) ತೊಂದರೆಯಾಗುವ ಸಾಧ್ಯತೆಯಿದೆ. ಕೆ.ಆರ್.ಎಸ್. ಅಣೆಕಟ್ಟಿನಂತೆ 20 ಕಿ.ಮೀ. ದೂರದಲ್ಲಿ ಸ್ಫೋಟಕ ಬಳಕೆಗೆ ಆದೇಶವಿರುವುದರಿಂದ ಇದು ಕಾನೂನುಬಾಹಿರ ಎಂದು ಹೋರಾಟಗಾರರು ಆರೋಪಿಸುತ್ತಿದ್ದಾರೆ. ಸ್ಫೋಟಕಗಳಿಂದ ಉಂಟಾಗುವ ಸುಮಾರು 12 ದಶಲಕ್ಷ ಟನ್ ವಿಷತ್ಯಾಜ್ಯವನ್ನು ಶರಾವತಿ ನದಿ ದಂಡೆಯ ಮೇಲೆ ಸುರಿಯುವುದರಿಂದ ನೀರಿನ ಮಾಲಿನ್ಯ ಮತ್ತು ಕಾಡುಪ್ರಾಣಿಗಳು ಗ್ರಾಮಗಳಿಗೆ ನುಗ್ಗುವ ಆತಂಕವಿದೆ.
ಹಿಂದೆ ಶರಾವತಿ ಡ್ಯಾಂ ನಿರ್ಮಾಣದಿಂದ ಕೆಲವು ಗ್ರಾಮಗಳು ನೀರಿನಲ್ಲಿ ಕೊಚ್ಚಿಹೋಗಿವೆ. ಈಗ ಈ ಅಪಾಯ ಮತ್ತೆ ಎದುರಾಗಬಹುದು ಎಂದು ಸ್ಥಳೀಯರು ಭಯಪಡುತ್ತಿದ್ದಾರೆ. ರಾಜ್ಯದಲ್ಲಿ ವಿದ್ಯುತ್ ಕೊರತೆ ಇಲ್ಲ; ಮಹಾರಾಷ್ಟ್ರ, ಗೋವಾ, ಒಡಿಶಾಕ್ಕೆ ರಫ್ತು ಮಾಡುತ್ತೇವೆ. ಶ್ರೀಲಂಕಾ, ದುಬೈಗೂ ಕಳುಹಿಸುತ್ತಿದ್ದೇವೆ. ಸೌರ, ಗಾಳಿ ಶಕ್ತಿಯಂತಹ ಪರ್ಯಾಯಗಳಿವೆ” ಎಂದು ಹೋರಾಟಗಾರರು ಕೇಳುತ್ತಿದ್ದಾರೆ. ಈ ಯೋಜನೆಯ ಹಿಂದೆ ದೊಡ್ಡ ಪ್ರಮಾಣದ ಹಣವನ್ನು ದೋಚುವ ಹುನ್ನಾರ ಇರಬಹುದು ಎಂದು ಆರೋಪಗಳು ಕೇಳಿಬಂದಿವೆ.
ಹೋರಾಟಕ್ಕೆ ಬೃಹತ್ ಬೆಂಬಲ ದೊರೆತಂತಾಗಿದೆ. ಶಿವಮೊಗ್ಗ ಸಂಸತ್ ಸದಸ್ಯ ಬಿ.ವೈ. ರಾಘವೇಂದ್ರ, ಎಟಿ. ರಾಮಸ್ವಾಮಿ, ವಿಶ್ರಾಂತ ನ್ಯಾಯಮೂರ್ತಿಗಳಾದ ಸಂತೋಷ್ ಹೆಗ್ಡೆ, ಬಿ.ಟಿ. ಲಲಿತಾ ನಾಯಕ್, ಸ್ಥಳೀಯ ನಾಯಕರು, ಸ್ವಾಮೀಜಿಗಳು ಮತ್ತು ಪರಿಸರ ತಜ್ಞರು ಬೆಂಬಲ ಸೂಚಿಸಿದ್ದಾರೆ. ಪಕ್ಷಬೇದ ಮೀರಿ ನ್ಯಾಯವಾದಿಗಳು, ಸಾಹಿತಿಗಳು, ಬುದ್ಧಿಜೀವಿಗಳು, ಮಹಿಳಾ ಸಂಘಟನೆಗಳು, ವಿದ್ಯಾರ್ಥಿಗಳು ಮತ್ತು ಡಿಎಸ್ಎಸ್ ಸಂಘಟನೆಗಳು ಒಗ್ಗೂಡಿವೆ.
ಈ ಹಿಂದೆ ಸೆಪ್ಟೆಂಬರ್ನಲ್ಲಿ ಪರಿಸರ ಸಾರ್ವಜನಿಕ ಸಂಭಾಷಣೆಯಲ್ಲಿ ಯೋಜನೆಯ ವಿರುದ್ಧ ಭಾರೀ ವಿರೋಧ ವ್ಯಕ್ತವಾಗಿತ್ತು. ಅರಣ್ಯ ಸಲಹಾ ಸಮಿತಿ ಕೂಡ ಮರಗಳ ಕಟಾವು ಮತ್ತು ಪರಿಸರ ಕಾಳಜಿ ಬಗ್ಗೆ ಸ್ಪಷ್ಟೀಕರಣ ಕೇಳಿದೆ.
ಇದನ್ನೂ ಓದಿ| ಬೆಳೆ ಪರಿಹಾರ | ರೈತರ ಮೂಗಿಗೆ ತುಪ್ಪ: ರೈತ ಮುಖಂಡರ ಆಕ್ರೋಶ
ಈ ಯೋಜನೆಯು ಪರಿಸರಕ್ಕೆ ಮಾತ್ರವಲ್ಲದೆ, ರೈತರ ಜೀವನ, ಕಾಡುಪ್ರಾಣಿಗಳ ಸಂರಕ್ಷಣೆ, ಜಲಾಶಯದ ಭದ್ರತೆ ಮತ್ತು ಸ್ಥಳೀಯರ ಸಾಮಾಜಿಕ-ಆರ್ಥಿಕ ಜೀವನಕ್ಕೆ ಧಕ್ಕೆ ತರುತ್ತದೆ. ಇದು ವನ್ಯ ಜೀವಿ ಸಂರಕ್ಷಣಾ ಕಾಯ್ದೆ ವಿರುದ್ಧವಾಗಿದ್ದು, ಪಶ್ಚಿಮ ಘಟ್ಟದ ಸೂಕ್ಷ್ಮ ಪರಿಸರವನ್ನು ಶಾಶ್ವತವಾಗಿ ಹಾಳುಮಾಡಬಹುದು. ಅಕ್ಟೋಬರ್ 15ರಂದು ಸಾಗರದಲ್ಲಿ ನಡೆಯಲಿರುವ ಬೃಹತ್ ಪ್ರತಿಭಟನೆಯು ಈ ವಿಷಯವನ್ನು ರಾಷ್ಟ್ರೀಯ ಮಟ್ಟದ ಚರ್ಚೆಗೆ ತರಲಿದೆ.
