ನವೆಂಬರ್ 01 ರಿಂದ ಭಾರತೀಯ ಹಣಕಾಸು ನಿಯಮಗಳಲ್ಲಿ 7 ಪ್ರಮುಖ ಬದಲಾವಣೆಗಳನ್ನು ತರಲಾಗಿದೆ. ಈ ತಿಂಗಳಿನಿಂದಲೇ ಜಾರಿಗೆ ಬಂದಿರುವ ಏಳು ಪ್ರಮುಖ ನಿಯಮ ಬದಲಾವಣೆಗಳು ದೇಶದ ಪ್ರತಿಯೊಬ್ಬ ಪ್ರಜೆಯ ಮೇಲೆ ಪರಿಣಾಮ ಬೀರಲಿದೆ. ಆಧಾರ್ ನವೀಕರಣದ ಸರಳೀಕರಣ, ಜೀವನ ಪ್ರಮಾಣಪತ್ರ ಸಲ್ಲಿಕೆಗೆ ಕಟ್ಟುನಿಟ್ಟಿನ ಅವಧಿ, ಬ್ಯಾಂಕ್ ನಾಮೀನೇಷನ್ನ ಹೊಸ ಸೌಲಭ್ಯ ಮತ್ತು ಎಸ್ಬಿಐ ಕ್ರೆಡಿಟ್ ಕಾರ್ಡ್ ಶುಲ್ಕಗಳ ಏರಿಕೆಯಂತಹ ಈ ದೊಡ್ಡ ಬದಲಾವಣೆಗಳು ಡಿಜಿಟಲ್ ಇಂಡಿಯಾ ಮತ್ತು ಹಣಕಾಸು ಸುರಕ್ಷತೆಯ ದಿಶೆಯಲ್ಲಿ ದೊಡ್ಡ ಹೆಜ್ಜೆಯಾಗಿವೆ.
1. ಆಧಾರ್ ನವೀಕರಣ: ಆನ್ಲೈನ್ ಸರಳೀಕರಣ ಮತ್ತು ಹೊಸ ಶುಲ್ಕ ವ್ಯವಸ್ಥೆ
ಆಧಾರ್ ಕಾರ್ಡ್ ಇಂದು ಭಾರತೀಯರ ಗುರುತಿನ ಮೂಲಾಧಾರವಾಗಿದೆ. ನವೆಂಬರ್ 1, 2025ರಿಂದ myAadhaar ಪೋರ್ಟಲ್ ಮೂಲಕ ಹೆಸರು, ವಿಳಾಸ, ಜನ್ಮ ದಿನಾಂಕ ಅಥವಾ ಮೊಬೈಲ್ ಸಂಖ್ಯೆಯನ್ನು ಯಾವುದೇ ದಾಖಲೆಗಳನ್ನು ಅಪ್ಲೋಡ್ ಮಾಡದೆಯೇ ನವೀಕರಿಸಬಹುದು. ಆದರೆ ಶುಲ್ಕದಲ್ಲಿ ಬದಲಾವಣೆಯಾಗಿದೆ. ನಾನ್-ಬಯೋಮೆಟ್ರಿಕ್ ನವೀಕರಣಕ್ಕೆ 75 ರೂಪಾಯಿ ಮತ್ತು ಬಯೋಮೆಟ್ರಿಕ್ ನವೀಕರಣಕ್ಕೆ 125 ರೂಪಾಯಿ ವಿಧಿಸಲಾಗುತ್ತದೆ. ಮಕ್ಕಳಿಗೆ ವಿಶೇಷ ಸೌಲಭ್ಯವಿದ್ದು, ಪ್ರತಿ ಐದು ವರ್ಷಕ್ಕೊಮ್ಮೆ ಬಯೋಮೆಟ್ರಿಕ್ ನವೀಕರಣ ಉಚಿತವಾಗಿರುತ್ತದೆ ಮತ್ತು 15 ವರ್ಷ ತುಂಬಿದ ನಂತರ ಮತ್ತೊಮ್ಮೆ ಉಚಿತ ಸೇವೆ ಲಭ್ಯ. ಆಧಾರ್ ನವೀಕರಿಸದಿದ್ದರೆ ಬ್ಯಾಂಕ್ ಖಾತೆ, ಮೊಬೈಲ್ ಸಿಮ್ ಅಥವಾ ಸರ್ಕಾರಿ ಯೋಜನೆಗಳಲ್ಲಿ ತೊಂದರೆಗಳು ಎದುರಾಗಬಹುದು ಎಂಬುದನ್ನು ಮರೆಯಬಾರದು.
2. ಜೀವನ ಪ್ರಮಾಣಪತ್ರ: ಪಿಂಚಣಿ ಮುಂದುವರಿಕೆಗೆ ಕಡ್ಡಾಯ ಸಲ್ಲಿಕೆ
ಪಿಂಚಣಿ ಪಡೆಯುತ್ತಿರುವವರು ಪ್ರತಿ ವರ್ಷ ತಾವು ಜೀವಂತವಾಗಿದ್ದೇವೆ ಎಂದು ಸಾಬೀತುಪಡಿಸಲು ಜೀವನ ಪ್ರಮಾಣಪತ್ರ ಸಲ್ಲಿಸಬೇಕು. ಇದು ಕಡ್ಡಾಯ ಮತ್ತು ತಪ್ಪಿದರೆ ಪಿಂಚಣಿ ನಿಲ್ಲುತ್ತದೆ. ಕೇಂದ್ರ ಹಾಗೂ ರಾಜ್ಯ ಸರ್ಕಾರದಿಂದ ಪಿಂಚಣಿ ಪಡೆಯುತ್ತಿರುವವರು ನವೆಂಬರ್ 1ರಿಂದ 30ರೊಳಗೆ ಈ ಪ್ರಮಾಣಪತ್ರವನ್ನು ಕಡ್ಡಾಯವಾಗಿ ಸಲ್ಲಿಸಬೇಕು. ಇದನ್ನು jeevanpramaan.gov.in ಪೋರ್ಟಲ್ನಲ್ಲಿ ಆಧಾರ್ OTP ಅಥವಾ ಮುಖ ಗುರುತಿಸುವಿಕೆಯ ಮೂಲಕ ಆನ್ಲೈನ್ನಲ್ಲಿ ಮಾಡಬಹುದು. ಅಥವಾ ಬ್ಯಾಂಕ್ ಶಾಖೆ, ಪೋಸ್ಟ್ ಆಫೀಸ್ಗಳಲ್ಲಿ ಫಿಂಗರ್ಪ್ರಿಂಟ್ ಸ್ಕ್ಯಾನ್ ಮೂಲಕ ಸಲ್ಲಿಸಬಹುದು. ಗ್ರಾಮೀಣ ಪ್ರದೇಶಗಳಲ್ಲಿ ಪೋಸ್ಟ್ಮ್ಯಾನ್ ಮನೆಗೆ ಬಂದು ಸೇವೆ ನೀಡುತ್ತಾನೆ. 80 ವರ್ಷ ಮೀರಿದವರು ಅಕ್ಟೋಬರ್ 1ರಿಂದಲೇ ಸಲ್ಲಿಸಬಹುದು. ಸಮಯಕ್ಕೆ ಸಲ್ಲಿಸದಿದ್ದರೆ ಡಿಸೆಂಬರ್ನಿಂದ ಪಿಂಚಣಿ ನಿಲ್ಲುವ ಸಾಧ್ಯತೆ ಇದ್ದು, ಇದು ಹೆಚ್ಚಾಗಿ ಲಕ್ಷಾಂತರ ಹಿರಿಯ ನಾಗರಿಕರಿಗೆ ಅನ್ವಯಿಸುತ್ತದೆ.
3. ಬ್ಯಾಂಕ್ ಡೊಮೇನ್ನಲ್ಲಿ ಬದಲಾವಣೆ
ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್ಬಿಐ) ಬ್ಯಾಂಕುಗಳಿಗೆ ತಮ್ಮ ನೆಟ್ ಬ್ಯಾಂಕಿಂಗ್ ವೆಬ್ಸೈಟ್ ವಿಳಾಸಗಳನ್ನು ವಿಶೇಷ ಇಂಟರ್ನೆಟ್ ಡೊಮೇನ್ – ‘.bank.in’ ಗೆ ಅಕ್ಟೋಬರ್ 31, 2025ರೊಳಗೆ ಸ್ಥಳಾಂತರಿಸುವಂತೆ ಸೂಚಿಸಿತ್ತು, ಏಪ್ರಿಲ್ 21, 2025ರ ಕೇಂದ್ರ ಬ್ಯಾಂಕ್ ಸುತ್ತೋಲೆಯ ಪ್ರಕಾರ. ಭಾರತದ ಪ್ರಮುಖ ಬ್ಯಾಂಕುಗಳಾದ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (ಎಸ್ಬಿಐ), ಪಂಜಾಬ್ ನ್ಯಾಷನಲ್ ಬ್ಯಾಂಕ್ (ಪಿಎನ್ಬಿ) ಮತ್ತು ಕೆನರಾ ಬ್ಯಾಂಕ್ ಆರ್ಬಿಐ ಸೂಚನೆಗಳಿಗೆ ಅನುಗುಣವಾಗಿ ತಮ್ಮ ಅಧಿಕೃತ ವೆಬ್ಸೈಟ್ URLಗಳನ್ನು ‘.bank.in’ ಡೊಮೇನ್ಗೆ ಬದಲಾಯಿಸಿವೆ. ಸೈಬರ್ ಭದ್ರತೆಯನ್ನು ಸುಧಾರಿಸುವುದು, ವಂಚನೆಯನ್ನು ಕಡಿಮೆ ಮಾಡುವುದು ಮತ್ತು ಡಿಜಿಟಲ್ ಬ್ಯಾಂಕಿಂಗ್ನಲ್ಲಿ ಸಾರ್ವಜನಿಕ ವಿಶ್ವಾಸವನ್ನು ಹೆಚ್ಚಿಸುವುದು ಈ ಕ್ರಮದ ಉದ್ದೇಶವಾಗಿದೆ ಎಂದು ಆರ್ಬಿಐ ಸುತ್ತೋಲೆಯಲ್ಲಿ ತಿಳಿಸಿದೆ.
4. ಬ್ಯಾಂಕ್ ನಾಮೀನೇಷನ್ : ನಾಲ್ವರು ವ್ಯಕ್ತಿಗಳನ್ನು ನಾಮೀನಿ ಮಾಡಬಹುದು
ಬ್ಯಾಂಕ್ ಖಾತೆಗಳ ಸುರಕ್ಷತೆಯನ್ನು ಇನ್ನಷ್ಟು ಬಲಪಡಿಸುವ ನಿಟ್ಟಿನಲ್ಲಿ ನವೆಂಬರ್ 1ರಿಂದ ಒಂದೇ ಸೇವಿಂಗ್ಸ್ ಖಾತೆ, ಠೇವಣಿ ಅಥವಾ ಲಾಕರ್ಗೆ ನಾಲ್ವರು ವ್ಯಕ್ತಿಗಳನ್ನು ನಾಮೀನಿ ಮಾಡಬಹುದು. ಹಿಂದೆ ಇದು ಒಬ್ಬರಿಗೆ ಮಾತ್ರ ಸೀಮಿತವಾಗಿತ್ತು. ಈ ಬದಲಾವಣೆ ಖಾತೆದಾರನ ಮರಣದ ನಂತರ ಕುಟುಂಬಕ್ಕೆ ಹಣ ಅಥವಾ ಆಸ್ತಿ ಸುಲಭವಾಗಿ ವರ್ಗಾವಣೆಯಾಗುವಂತೆ ಮಾಡುತ್ತದೆ ಮತ್ತು ಕಾನೂನು ವಿವಾದಗಳನ್ನು ಕಡಿಮೆ ಮಾಡುತ್ತದೆ. ನಾಮೀನೇಷನ್ ಮಾಡಲು ಬ್ಯಾಂಕ್ ಶಾಖೆಗೆ ಭೇಟಿ ನೀಡಿ Form DA1 ತುಂಬಬಹುದು ಅಥವಾ ನೆಟ್ ಬ್ಯಾಂಕಿಂಗ್ ಮೂಲಕವೂ ಮಾಡಬಹುದು. ಪ್ರತಿ ಮೂರು ವರ್ಷಕ್ಕೊಮ್ಮೆ ನಾಮೀನೇಷನ್ ಪರಿಶೀಲಿಸುವುದು ಒಳ್ಳೆಯ ಅಭ್ಯಾಸ.
5. ಎಸ್ಬಿಐ ಕಾರ್ಡ್: ಶಿಕ್ಷಣ ಮತ್ತು ವ್ಯಾಲೆಟ್ ಪಾವತಿಗೆ 1% ಹೆಚ್ಚುವರಿ ಶುಲ್ಕ
ಎಸ್ಬಿಐ ಕ್ರೆಡಿಟ್ ಮತ್ತು ಡೆಬಿಟ್ ಕಾರ್ಡ್ ಬಳಕೆದಾರರಿಗೆ ಒಂದು ಆಘಾತಕಾರಿ ಬದಲಾವಣೆಯಾಗಿದೆ. ನವೆಂಬರ್ 1ರಿಂದ ಮೂರನೇ ವ್ಯಕ್ತಿಯ ಆ್ಯಪ್ಗಳಾದ MobiKwik, CRED, PhonePe ಮೂಲಕ ವ್ಯಾಲೆಟ್ ಲೋಡ್ ಮಾಡುವುದು ಅಥವಾ ಶಿಕ್ಷಣ ಶುಲ್ಕ ಪಾವತಿಸುವುದಕ್ಕೆ ಶೇಕಡಾ 1 ರಷ್ಟು ಶುಲ್ಕ ವಿಧಿಸಲಾಗುತ್ತದೆ. ಉದಾಹರಣೆಗೆ 50 ಸಾವಿರ ರೂಪಾಯಿ ಕಾಲೇಜು ಶುಲ್ಕಕ್ಕೆ 500 ರೂಪಾಯಿ ಹೆಚ್ಚುವರಿ ಖರ್ಚು. ಈ ಶುಲ್ಕವನ್ನು ತಪ್ಪಿಸಲು ದೊಡ್ಡ ಮೊತ್ತದ ಹಣ ವರ್ಗಾವಣೆಗೆ ನೇರ ಬ್ಯಾಂಕ್ ವರ್ಗಾವಣೆ (NEFT/RTGS) ಅಥವಾ UPI ID ಮೂಲಕ ಪಾವತಿ ಮಾಡುವುದು ಉತ್ತಮ ಪರ್ಯಾಯ.
6. ಪಿಎನ್ಬಿ ಲಾಕರ್: ಬಾಡಿಗೆ ಶುಲ್ಕದಲ್ಲಿ ಗಣನೀಯ ಇಳಿಕೆ
ಪಂಜಾಬ್ ನ್ಯಾಷನಲ್ ಬ್ಯಾಂಕ್ (ಪಿಎನ್ಬಿ) ಗ್ರಾಹಕರಿಗೆ ಸಿಹಿ ಸುದ್ದಿ ನೀಡಿದೆ. ಅಕ್ಟೋಬರ್ 16ರ ನೋಟಿಸ್ನಂತೆ 30 ದಿನಗಳ ನಂತರ ಅಂದರೆ ನವೆಂಬರ್ ಮಧ್ಯದಿಂದ ಲಾಕರ್ ಬಾಡಿಗೆ ಶುಲ್ಕದಲ್ಲಿ ಗಣನೀಯ ಕಡಿತ ಮಾಡಲಾಗಿದೆ. ಸಣ್ಣ ಲಾಕರ್ಗೆ ವಾರ್ಷಿಕ 2,000 ರೂಪಾಯಿಯಿಂದ 1,200 ರೂಪಾಯಿಗೆ, ಮಧ್ಯಮ ಲಾಕರ್ಗೆ 4,000 ರೂಪಾಯಿಯಿಂದ 2,500 ರೂಪಾಯಿಗೆ ಮತ್ತು ದೊಡ್ಡ ಲಾಕರ್ಗೆ 8,000 ರೂಪಾಯಿಯಿಂದ 5,000 ರೂಪಾಯಿಗೆ ಇಳಿಕೆಯಾಗಿದೆ. ಈ ರಿಯಾಯಿತಿ ನಗರ ಮತ್ತು ಗ್ರಾಮೀಣ ಎಲ್ಲಾ ಶಾಖೆಗಳಿಗೂ ಅನ್ವಯಿಸುತ್ತದೆ ಮತ್ತು ಹೊಸ ಗ್ರಾಹಕರಿಗೆ ಸ್ವಯಂಚಾಲಿತವಾಗಿ ಅನ್ವಯವಾಗುತ್ತದೆ.
7. ಎನ್ಪಿಎಸ್ನಿಂದ ಯುಪಿಎಸ್ಗೆ ಸ್ವಿಚ್: ಕೊನೆಯ ಅವಕಾಶದ ವಿಸ್ತರಣೆ
ಕೇಂದ್ರದ ಸರ್ಕಾರಿ ನೌಕರರು ತಮ್ಮ ನ್ಯಾಷನಲ್ ಪೆನ್ಶನ್ ಸಿಸ್ಟಮ್ (NPS) ನಿಂದ ಯುನಿಫೈಡ್ ಪೆನ್ಶನ್ ಸಿಸ್ಟಮ್ (UPS) ಗೆ ಬದಲಾಯಿಸುವ ಅವಧಿಯನ್ನು ನವೆಂಬರ್ 30, 2025ರವರೆಗೆ ವಿಸ್ತರಿಸಲಾಗಿದೆ. NPS ಮಾರ್ಕೆಟ್ ಆಧಾರಿತವಾದರೆ, UPS ಕೊನೆಯ ಸಂಬಳದ ಶೇಕಡಾ 50 ರಷ್ಟು ಖಚಿತ ಪಿಂಚಣಿ ನೀಡುತ್ತದೆ. 2004ರ ನಂತರ ಸೇರಿದ ಕೇಂದ್ರ ನೌಕರರು protean.co.in ಪೋರ್ಟಲ್ ಮೂಲಕ ಆಧಾರ್ OTP ಬಳಸಿ ಬದಲಾಯಿಸಬಹುದು. ಒಮ್ಮೆ ಬದಲಾಯಿಸಿದ ನಂತರ ಮತ್ತೆ ಬದಲಿಸಲು ಸಾಧ್ಯವಿಲ್ಲ.
8. ಜಿಎಸ್ಟಿ ನೋಂದಣಿ: ಸಣ್ಣ ವ್ಯಾಪಾರಿಗಳಿಗೆ ಸರಳೀಕರಣ ಮತ್ತು ಹೊಸ ಸ್ಲ್ಯಾಬ್
ಸಣ್ಣ ವ್ಯಾಪಾರಿಗಳಿಗೆ ಜಿಎಸ್ಟಿ ನೋಂದಣಿ ಪ್ರಕ್ರಿಯೆ ಇನ್ನಷ್ಟು ಸರಳಗೊಂಡಿದೆ. ನವೆಂಬರ್ 1ರಿಂದ ಒಂದೇ ಫಾರ್ಮ್ ಮತ್ತು ಕಡಿಮೆ ದಾಖಲೆಗಳೊಂದಿಗೆ ನೋಂದಣಿ ಮಾಡಬಹುದು. ಹೊಸ ಸ್ಲ್ಯಾಬ್ ವ್ಯವಸ್ಥೆಯಲ್ಲಿ ಶೇಕಡಾ 12 ಮತ್ತು 28 ದರಗಳನ್ನು ತೆಗೆದುಹಾಕಿ, ಐಷಾರಾಮಿ ಸರಕುಗಳಿಗೆ ಶೇಕಡಾ 40 ದರ ವಿಧಿಸಲಾಗುತ್ತದೆ. ವಾರ್ಷಿಕ 40 ಲಕ್ಷ ರೂಪಾಯಿಗಳೊಳಗಿನ ವ್ಯಾಪಾರಿಗಳಿಗೆ ತ್ರೈಮಾಸಿಕ ರಿಟರ್ನ್ ಸೌಲಭ್ಯ ಇರುತ್ತದೆ. ಇದು ದಿನಸಿ ಅಂಗಡಿ, ಬಟ್ಟೆ ವ್ಯಾಪಾರಿಗಳಂತಹ ಸಣ್ಣ ಉದ್ಯಮಿಗಳಿಗೆ ದೊಡ್ಡ ಸಹಾಯ ನೀಡುತ್ತದೆ.
ಇದನ್ನೂ ಓದಿ | `ನಾನ್ʼ ಕನ್ನಡಿಗ | ಗಡಿಗಳನ್ನು ಮೀರಿದ ಕನ್ನಡ ಪ್ರೀತಿ
ಈ ಏಳು ಬದಲಾವಣೆಗಳು ಡಿಜಿಟಲ್ ಸೇವೆಗಳನ್ನು ಸುಲಭಗೊಳಿಸುವುದರ ಜೊತೆಗೆ ಹಣಕಾಸು ಸುರಕ್ಷತೆಯನ್ನು ಬಲಪಡಿಸುತ್ತವೆ. ಆದರೆ ಸಮಯಕ್ಕೆ ಸರಿಯಾದ ಕ್ರಮ ಕೈಗೊಳ್ಳದಿದ್ದರೆ ತೊಂದರೆಗಳು ಎದುರಾಗಬಹುದು. ಆಧಾರ್ ನವೀಕರಣ, ಜೀವನ ಪ್ರಮಾಣಪತ್ರ ಸಲ್ಲಿಕೆ ಮತ್ತು ನಾಮೀನೇಷನ್ ಅಪ್ಡೇಟ್ಗಳನ್ನು ನವೆಂಬರ್ ಒಳಗೆ ಪೂರ್ಣಗೊಳಿಸಿ. ಹೆಚ್ಚಿನ ಮಾಹಿತಿಗಾಗಿ UIDAI, RBI ಅಥವಾ ಸಂಬಂಧಿತ ಬ್ಯಾಂಕ್ ವೆಬ್ಸೈಟ್ಗಳನ್ನು ಸಂಪರ್ಕಿಸಬಹುದು.
