ಪ್ರಧಾನಿ ನರೇಂದ್ರ ಮೋದಿ ಅವರು 2016ರ ನವೆಂಬರ್ 8ರಂದು ದೇಶವನ್ನು ಬೆಚ್ಚಿಬೀಳಿಸುವಂತೆ ₹500 ಮತ್ತು ₹1000 ಮುಖಬೆಲೆಯ ನೋಟುಗಳನ್ನು ರಾತ್ರೋರಾತ್ರಿ ಅಮಾನ್ಯಗೊಳಿಸುವ ಘೋಷಣೆ ಮಾಡಿದರು.
ಕಪ್ಪು ಹಣವನ್ನು ನಿಯಂತ್ರಿಸುವುದು, ಭ್ರಷ್ಟಾಚಾರವನ್ನು ನಿರ್ಮೂಲನೆ ಮಾಡುವುದು, ನಕಲಿ ನೋಟುಗಳ ಹರಿವನ್ನು ತಡೆಯುವುದು ಮತ್ತು ಭಯೋತ್ಪಾದನೆಗೆ ಹಣದ ಮೂಲವನ್ನು ಕಡಿತಗೊಳಿಸುವುದು ಇವೇ ಈ ನೀತಿಯ ಮುಖ್ಯ ಉದ್ದೇಶಗಳೆಂದು ಬಿಜೆಪಿ ಸರ್ಕಾರ ಹೇಳಿಕೊಂಡಿತು. ಆದರೆ ಇಂದು, ಎಂಟು ವರ್ಷಗಳ ನಂತರ ನೋಡಿದರೆ, ಈ ಉದ್ದೇಶಗಳು ಕೇವಲ ಖಾಲಿ ಘೋಷಣೆಗಳಾಗಿ ಉಳಿದಿವೆ. ಬದಲಾಗಿ, ಈ ನೀತಿ ಸಾಮಾನ್ಯ ಜನರ ಮೇಲೆ ಭಾರೀ ಹೊರೆಯಾಯಿತು, ಆರ್ಥಿಕತೆಗೆ ಆಘಾತವಾಯಿತು ಮತ್ತು ಬಿಜೆಪಿ ಸರ್ಕಾರದ ಅಸಮರ್ಥ ನಿರ್ವಹಣೆಯನ್ನು ಬಯಲುಮಾಡಿತು. ಇದು ಬಡವರ ವಿರುದ್ಧದ ಯುದ್ಧವೇ ಸರಿ!
ಬಿಜೆಪಿ ಸರ್ಕಾರದ ಮೇಲೆ ಟೀಕೆ: ಉದ್ದೇಶಗಳು ವೈಫಲ್ಯಗೊಂಡವು
ಸರ್ಕಾರದ ಮೊದಲ ದೊಡ್ಡ ತಪ್ಪು ಎಂದರೆ, ಈ ನೀತಿಯನ್ನು ರಹಸ್ಯವಾಗಿ ಯೋಜಿಸಿ,ಪೂರ್ವ ಸಿದ್ಧತೆಯೇ ಇಲ್ಲದೆ ಜಾರಿಗೆ ತಂದಿದ್ದು. ಮೋದಿ ಅವರು ಟಿವಿಯಲ್ಲಿ ಘೋಷಿಸಿದ ಕೆಲವೇ ಗಂಟೆಗಳಲ್ಲಿ ನೋಟುಗಳು ಅಮಾನ್ಯವಾದವು. ಆದರೆ ಹೊಸ ನೋಟುಗಳ ಮುದ್ರಣ, ಬ್ಯಾಂಕುಗಳ ಸಿದ್ಧತೆ, ಎಟಿಎಂಗಳ ಕ್ಯಾಲಿಬ್ರೇಷನ್ – ಯಾವುದೂ ಸರಿಯಾಗಿ ನಡೆದಿರಲಿಲ್ಲ. ಇದರ ಫಲಿತಾಂಶ ದೇಶಾದ್ಯಂತ ಹಣದ ಕೊರತೆ ಉಂಟಾಯಿತು.
- ಕಪ್ಪು ಹಣ ನಿಯಂತ್ರಣ? ಆರ್ಬಿಐ ವರದಿಯ ಪ್ರಕಾರ, ಅಮಾನ್ಯಗೊಂಡ ನೋಟುಗಳಲ್ಲಿ 99.3% ಬ್ಯಾಂಕುಗಳಿಗೆ ಹಿಂದಿರುಗಿದವು, ಕಪ್ಪು ಹಣ ಹೊಂದಿದವರು ತಮ್ಮ ಹಣವನ್ನು ಬ್ಯಾಂಕುಗಳ ಮೂಲಕವೇ ಬಿಳಿ ಮಾಡಿಕೊಂಡರು. ಶ್ರೀಮಂತರು, ರಾಜಕಾರಣಿಗಳು ಮತ್ತು ಉದ್ಯಮಿಗಳು ತಮ್ಮ ಕಪ್ಪು ಹಣವನ್ನು ಚಿನ್ನ, ಆಸ್ತಿ ಅಥವಾ ವಿದೇಶಿ ಖಾತೆಗಳಿಗೆ ವರ್ಗಾಯಿಸಿದರು. ಬಿಜೆಪಿ ಸರ್ಕಾರ ಯಾವುದೇ ದೊಡ್ಡ ಮಟ್ಟದ ಕಪ್ಪು ಹಣ ವಶಪಡಿಸಿಕೊಳ್ಳಲಿಲ್ಲ ಇದು ಸಂಪೂರ್ಣ ವೈಫಲ್ಯವಾಯಿತು.
- ಭ್ರಷ್ಟಾಚಾರ ನಿರ್ಮೂಲನೆ? ಭ್ರಷ್ಟಾಚಾರ ಇನ್ನೂ ಹೆಚ್ಚೇ ಇದೆ. ಟ್ರಾನ್ಸ್ಪರೆನ್ಸಿ ಇಂಟರ್ನ್ಯಾಷನಲ್ ವರದಿಗಳು ಭಾರತ ಭ್ರಷ್ಟಾಚಾರದ ಸೂಚ್ಯಂಕದಲ್ಲಿ ಸುಧಾರಣೆಯೇ ಇಲ್ಲದಿರುವುದನ್ನು ತೋರಿಸುತ್ತವೆ. ಬದಲಾಗಿ, ನೋಟು ಅಮಾನ್ಯೀಕರಣದ ಸಮಯದಲ್ಲಿ ಬ್ಯಾಂಕ್ ಅಧಿಕಾರಿಗಳು ಮತ್ತು ಮಧ್ಯವರ್ತಿಗಳು ಕಮಿಷನ್ ಪಡೆದು ಹಣ ವಿನಿಮಯ ಮಾಡಿಕೊಟ್ಟರು – ಹೊಸ ಭ್ರಷ್ಟಾಚಾರವೇ ಉದ್ಭವಿಸಿತು.
- ನಕಲಿ ನೋಟು ಮತ್ತು ಭಯೋತ್ಪಾದನೆ? ನಕಲಿ ನೋಟುಗಳ ಸಮಸ್ಯೆ ಇನ್ನೂ ಪೂರ್ತಿಯಾಗಿ ನಿಯಂತ್ರಣಕ್ಕೆ ಬಂದಿಲ್ಲ. ಹೊಸ ನೋಟುಗಳು ಬಂದ ನಂತರವೂ ನಕಲಿ ನೋಟುಗಳು ಹರಿದಾಡುತ್ತಿವೆ. ಭಯೋತ್ಪಾದನೆಗೆ ಹಣದ ಮೂಲ ಕಡಿತವಾಗಿದೆ ಎನ್ನುವುದಕ್ಕೆ ಯಾವುದೇ ಸಾಕ್ಷ್ಯವಿಲ್ಲ. ಬದಲಾಗಿ, ಡಿಜಿಟಲ್ ಪಾವತಿಗಳು ಹೆಚ್ಚಿದವು ಎಂದು ಬಿಜೆಪಿ ಹೇಳಿಕೊಳ್ಳುತ್ತದೆ, ಆದರೆ ಅದು ನೋಟು ಅಮಾನ್ಯೀಕರಣದ ಫಲವಲ್ಲ ಇದಕ್ಕೂ ಮೊದಲೇ ಯುಪಿಐ, ಪೇಟಿಎಂ ಆರಂಭವಾಗಿದ್ದವು.
ಬಿಜೆಪಿ ಸರ್ಕಾರ ಈ ನೀತಿಯನ್ನು ಸರ್ಜಿಕಲ್ ಸ್ಟ್ರೈಕ್ ಎಂದು ಕರೆದುಕೊಂಡಿತು, ಆದರೆ ಅದು ಸಾಮಾನ್ಯ ಜನರ ಮೇಲೆಯೇ “ಸರ್ಜಿಕಲ್ ಅಟ್ಯಾಕ್” ಆಯಿತು. ಸಿದ್ಧತೆಯ ಕೊರತೆ, ತಪ್ಪು ಲೆಕ್ಕಾಚಾರ ಮತ್ತು ಜನರ ತೊಂದರೆಗಳನ್ನು ನಿರ್ಲಕ್ಷಿಸಿದ್ದು ಸರ್ಕಾರದ ಅಸಮರ್ಥತೆಯನ್ನು ತೋರಿಸುತ್ತದೆ.
ಸಾಮಾನ್ಯ ಜನರು ಎದುರಿಸಿದ ಪ್ರಮುಖ ತೊಂದರೆಗಳು
ನೋಟು ಅಮಾನ್ಯೀಕರಣದ ಹೊಡೆತ ಬಡವರು, ಕೂಲಿ ಕಾರ್ಮಿಕರು, ರೈತರು ಮತ್ತು ಸಣ್ಣ ವ್ಯಾಪಾರಿಗಳ ಮೇಲೆಯೇ ಬಿದ್ದಿತು. ಶ್ರೀಮಂತರು ಮನೆಯಲ್ಲೇ ಕುಳಿತು ಹಣ ವಿನಿಮಯ ಮಾಡಿಕೊಂಡರೆ, ಬಡವರು ಬ್ಯಾಂಕ್ಗಳ ಮುಂದೆ ಸಾಲಿನಲ್ಲಿ ನಿಂತು ಸಾಯುತ್ತಿದ್ದರು. ಪ್ರಮುಖ ಸಮಸ್ಯೆಗಳು.
- ಹಣದ ಕೊರತೆ ಮತ್ತು ಸಾಲುಗಳು: ಬ್ಯಾಂಕುಗಳ ಮುಂದೆ ಕಿಲೋಮೀಟರ್ಗಳಷ್ಟು ಸಾಲುಗಳು. ದಿನವಿಡೀ ನಿಂತರೂ ₹2000-4000 ಮಾತ್ರ ಸಿಗುತ್ತಿತ್ತು. ಎಟಿಎಂಗಳು ಖಾಲಿಯಾಗಿದ್ದವು, ಹೊಸ ನೋಟುಗಳು ಸರಿಯಾದ ಗಾತ್ರದಲ್ಲಿರಲಿಲ್ಲ. ಸುಮಾರು ಜನರು ಸಾಲಿನಲ್ಲಿ ನಿಂತು 40ಜನ ಹೃದಯಾಘಾತದಿಂದ ಅಥವಾ ಆಯಾಸದಿಂದ ಮೃತಪಟ್ಟಿದ್ದರು.
- ದೈನಂದಿನ ಜೀವನದಲ್ಲಿ ಅಡಚಣೆ: ತರಕಾರಿ, ಆಹಾರ, ಔಷಧಿ ಖರೀದಿಗೆ ಹಣವಿಲ್ಲದೇ ಜನರು ಹಸಿವಿನಿಂದ ಬಳಲಿದರು. ಬಸ್, ಆಟೋ, ರೈಲು ಟಿಕೆಟ್ಗಳಿಗೆ ಹಳೆ ನೋಟುಗಳನ್ನು ಸ್ವೀಕರಿಸದಿದ್ದರಿಂದ ಪ್ರಯಾಣ ತೊಂದರೆ. ಆಸ್ಪತ್ರೆಗಳು ಹಣವಿಲ್ಲದಿದ್ದರೆ ಚಿಕಿತ್ಸೆ ನೀಡದೇ ರೋಗಿಗಳನ್ನು ಹೊರಹಾಕಿದವು.
- ಕೂಲಿ ಕಾರ್ಮಿಕರು ಮತ್ತು ಅನೌಪಚಾರಿಕ ಆರ್ಥಿಕತೆ: ದಿನಗೂಲಿ ಕಾರ್ಮಿಕರು ಕೆಲಸಕ್ಕೆ ಹೋಗದೇ ಮನೆಯಲ್ಲಿದ್ದರು, ಯಜಮಾನರು ನಗದು ನೀಡಲಾಗದೇ ಇದ್ದರು. ಸಣ್ಣ ವ್ಯಾಪಾರಿಗಳು, ಬೀದಿ ವ್ಯಾಪಾರಿಗಳು ತಮ್ಮ ವ್ಯಾಪಾರವನ್ನು ಮುಚ್ಚಿದರು. ಲಕ್ಷಾಂತರ ಉದ್ಯೋಗಗಳು ನಾಶವಾದವು.
- ಗ್ರಾಮೀಣ ರೈತರ ಸಮಸ್ಯೆ: ಬೀಜ, ಗೊಬ್ಬರ ಖರೀದಿಗೆ ಹಣವಿಲ್ಲ. ಮಾರುಕಟ್ಟೆಗಳಲ್ಲಿ ಉತ್ಪನ್ನಗಳ ಮಾರಾಟ ಕಡಿಮೆಯಾಯಿತು. ಗ್ರಾಮಗಳಲ್ಲಿ ಬ್ಯಾಂಕುಗಳೇ ಇಲ್ಲದಿದ್ದರಿಂದ ಜನರು ಹತ್ತಿರದ ಪಟ್ಟಣಕ್ಕೆ ಪ್ರಯಾಣಿಸಬೇಕಾಯಿತು.
- ಆರ್ಥಿಕ ಸಂಕಷ್ಟ: ಜಿಡಿಪಿ ಬೆಳವಣಿಗೆ 8%ರಿಂದ 6%ಕ್ಕೆ ಇಳಿದಿತು. ಅನೌಪಚಾರಿಕ ಆರ್ಥಿಕತೆ (ದೇಶದ 90% ಉದ್ಯೋಗ) ಸಂಪೂರ್ಣ ಸ್ತಬ್ಧವಾಯಿತು. ಬಿಜೆಪಿ ಹೇಳುವ “ಡಿಜಿಟಲ್ ಇಂಡಿಯಾ” ಕೇವಲ ನಗರಗಳಿಗೆ ಸೀಮಿತವಾಗಿತ್ತು. ಗ್ರಾಮೀಣ ಭಾರತಕ್ಕೆ ಆಗ ಇಂಟರ್ನೆಟ್, ಸ್ಮಾರ್ಟ್ಫೋನ್ ಇರಲಿಲ್ಲ.
ಇದನ್ನೂ ಓದಿ | ಇವತ್ತು ನವೆಂಬರ್ 8, 2016 | 500, 1000 ರೂ. ನೋಟು ಅಮಾನ್ಯೀಕರಣ
ಬಡವರ ಮೇಲೆ ಹೊರೆ, ಶ್ರೀಮಂತರಿಗೆ ಲಾಭ
ನೋಟು ಅಮಾನ್ಯೀಕರಣದಿಂದ ಯಾವುದೇ ದೊಡ್ಡ ಪ್ರಯೋಜನವಾಗಲಿಲ್ಲ. ಕಪ್ಪು ಹಣ ಇನ್ನೂ ಇದೆ, ಭ್ರಷ್ಟಾಚಾರವೂ ನಿರ್ಮೂಲನೆಯಾಗಲಿಲ್ಲ. ಬಡವರು ಮಾತ್ರ ತೊಂದರೆ ಅನುಭವಿಸಿದರು. ಯಾವ ಶ್ರೀಮಂತನೂ ಬ್ಯಾಂಕ್ ಸಾಲಿನಲ್ಲಿ ನಿಂಲ್ಲಲಿಲ್ಲ, ಸರ್ಕಾರ ಈ ನೀತಿಯನ್ನು ರಾಜಕೀಯ ಲಾಭಕ್ಕಾಗಿ ಬಳಸಿಕೊಂಡಿತು, ಆದರೆ ಜನರ ಬದುಕನ್ನು ಹಾಳುಮಾಡಿತು.
