ಗುಜರಾತ್ನ ಜಾಮ್ನಗರದಲ್ಲಿ ರಿಲಯನ್ಸ್ ಫೌಂಡೇಶನ್ನಿಂದ ನಡೆಸಲಾಗುತ್ತಿರುವ ವಂತಾರಾ ಗ್ರೀನ್ಸ್ ವನ್ಯಜೀವಿ ಸಂರಕ್ಷಣೆ ಮತ್ತು ಪುನರ್ವಸತಿ ಕೇಂದ್ರದಲ್ಲಿ ಯಾವುದೇ ಅಕ್ರಮ ನಡೆದಿಲ್ಲ ಎಂದು ಸುಪ್ರೀಂ ಕೋರ್ಟ್ ನೇಮಿಸಿದ ವಿಶೇಷ ತನಿಖಾ ತಂಡ (ಎಸ್ಐಟಿ)ದ ವರದಿ ಸ್ಪಷ್ಟಪಡಿಸಿದೆ. ಈ ಕೇಂದ್ರವು ಎಲ್ಲ ಕಾನೂನುಗಳು ಮತ್ತು ನಿಯಮಗಳನ್ನು ಸಂಪೂರ್ಣವಾಗಿ ಪಾಲಿಸುತ್ತಿದೆ ಎಂದು ವರದಿ ದೃಢಪಡಿಸಿದೆ. ನ್ಯಾಯಮೂರ್ತಿಗಳಾದ ಪಂಕಜ್ ಮಿತ್ತಲ್ ಮತ್ತು ಪ್ರಸನ್ನ ಬಿ. ವರಾಳೆ ಅವರ ನೇತೃತ್ವದ ಪೀಠವು, ಮಾಧ್ಯಮಗಳಿಗೆ ವಂತಾರಾವನ್ನು ಕಳಂಕಗೊಳಿಸಲು ಅವಕಾಶ ನೀಡುವುದಿಲ್ಲ ಎಂದು ಹೇಳಿದೆ. ಈ ನಿರ್ಧಾರವು ವನ್ಯಜೀವಿ ಸಂರಕ್ಷಣೆಯಲ್ಲಿ ಖಾಸಗಿ ಸಂಸ್ಥೆಗಳ ಪಾತ್ರವನ್ನು ಬಲಪಡಿಸಿದೆ ಮತ್ತು ಆಧಾರರಹಿತ ಆರೋಪಗಳ ವಿರುದ್ಧ ಎಚ್ಚರಿಕೆಯ ಸಂದೇಶ ನೀಡಿದೆ.
ವಂತಾರಾ ಕೇಂದ್ರವು ರಿಲಯನ್ಸ್ ಫೌಂಡೇಶನ್ನ ಭಾಗವಾಗಿದ್ದು, ಅನಂತ್ ಅಂಬಾನಿ ಅವರ ಕಲ್ಪನೆಯಲ್ಲಿ ರೂಪುಗೊಂಡಿದೆ. ಇದು ವಿಶ್ವದ ಅತಿದೊಡ್ಡ ಖಾಸಗಿ ವನ್ಯಜೀವಿ ರಕ್ಷಣಾ ಕೇಂದ್ರಗಳಲ್ಲಿ ಒಂದಾಗಿದ್ದು, ಜಾಮ್ನಗರದ ರಿಲಯನ್ಸ್ ರಿಫೈನರಿ ಸಂಕೀರ್ಣದಲ್ಲಿ ಸ್ಥಾಪಿತವಾಗಿದೆ. ಇಲ್ಲಿ ಸಾವಿರಾರು ಪ್ರಾಣಿಗಳು ಮತ್ತು ಪಕ್ಷಿಗಳನ್ನು ರಕ್ಷಿಸಲಾಗುತ್ತಿದೆ, ಪುನರ್ವಸತಿ ಮಾಡಲಾಗುತ್ತಿದೆ. ಭಾರತ ಮತ್ತು ವಿದೇಶಗಳಿಂದ ಗಾಯಗೊಂಡ ಅಥವಾ ಅನಾಥ ಪ್ರಾಣಿಗಳನ್ನು ಇಲ್ಲಿಗೆ ತರಲಾಗುತ್ತದೆ. ಕೇಂದ್ರವು ವನ್ಯಜೀವಿ (ರಕ್ಷಣೆ) ಕಾಯಿದೆ 1972, ಸಿಟಿಸ್ (ಕಾನ್ವೆನ್ಷನ್ ಆನ್ ಇಂಟರ್ನ್ಯಾಷನಲ್ ಟ್ರೇಡ್ ಇನ್ ಎಂಡೇಂಜರ್ಡ್ ಸ್ಪೀಷೀಸ್) ಮುಂತಾದ ಅಂತಾರಾಷ್ಟ್ರೀಯ ನಿಯಮಗಳನ್ನು ಪಾಲಿಸುತ್ತದೆ ಎಂದು ವರದಿ ಹೇಳಿದೆ.
ಪ್ರಕರಣದ ಹಿನ್ನೆಲೆ:
ಕೊಲ್ಹಾಪುರದ ದೇವಸ್ಥಾನದಿಂದ ಮಹಾದೇವಿ ಎಂಬ ಆನೆಯನ್ನು ವಂತಾರಾಗೆ ಸ್ಥಳಾಂತರಿಸಿದ್ದು ಅಕ್ರಮ ಎಂದು ಆರೋಪಿಸಲಾಗಿತ್ತು. ಇದಲ್ಲದೆ, ದೇಶ-ವಿದೇಶಗಳಿಂದ ಪ್ರಾಣಿಗಳ ಕಳ್ಳಸಾಗಣೆ, ಪ್ರಾಣಿ ದೌರ್ಜನ್ಯ, ಆರ್ಥಿಕ ಅಕ್ರಮಗಳು ಮತ್ತು ಹಣ ಲಾಂಡರಿಂಗ್ ಆರೋಪಗಳಿದ್ದವು. ಇದರಿಂದಾಗಿ ಎರಡು ಪಿಐಎಲ್ಗಳು ಸಲ್ಲಿಕೆಯಾದವು. ಆದರೆ ಎಸ್ಐಟಿ ವರದಿ ಈ ಎಲ್ಲ ಆರೋಪಗಳನ್ನು ನಿರಾಕರಿಸಿದೆ. ಪ್ರಾಣಿಗಳ ಸ್ವಾಧೀನವು ನಿಯಮಾನುಸಾರವಾಗಿದ್ದು, ಯಾವುದೇ ಉಲ್ಲಂಘನೆಯಿಲ್ಲ ಎಂದು ತಿಳಿಸಿದೆ. ಕೈಗಾರಿಕಾ ಪ್ರದೇಶದ ಬಳಿ ಕೇಂದ್ರವಿದ್ದರೂ ಪರಿಸರ ಮಾಲಿನ್ಯದ ಆರೋಪಗಳನ್ನು ತಳ್ಳಿಹಾಕಿದೆ.
ಆಗಸ್ಟ್ 25ರಂದು ಸುಪ್ರೀಂ ಕೋರ್ಟ್ ಎಸ್ಐಟಿ ರಚಿಸಿತು. ನಿವೃತ್ತ ನ್ಯಾಯಮೂರ್ತಿ ಜಸ್ಟಿಸ್ ಜಸ್ತಿ ಚೆಲಮೇಶ್ವರ್ ನೇತೃತ್ವದ ತಂಡದಲ್ಲಿ ನಿವೃತ್ತ ಮುಖ್ಯ ನ್ಯಾಯಮೂರ್ತಿಗಳಾದ ರಘವೇಂದ್ರ ಚೌಹಾನ್, ಮಾಜಿ ಮುಂಬೈ ಪೊಲೀಸ್ ಕಮಿಷನರ್ ಹೇಮಂತ್ ನಾಗ್ರಾಲೆ ಮತ್ತು ಕಸ್ಟಮ್ಸ್ ಅಧಿಕಾರಿ ಅನಿಶ್ ಗುಪ್ತಾ ಸೇರಿದ್ದರು. ಈ ತಂಡವು ವಂತಾರಾ ಕೇಂದ್ರಕ್ಕೆ ಭೇಟಿ ನೀಡಿ, ಮೂರು ದಿನಗಳ ಕಾಲ ತನಿಖೆ ನಡೆಸಿತು. ಪ್ರಾಣಿಗಳ ಸ್ವಾಧೀನ, ಆರೈಕೆ, ಪಶುವೈದ್ಯಕೀಯ ಸೌಲಭ್ಯಗಳು, ಆರ್ಥಿಕ ವ್ಯವಹಾರಗಳು ಮತ್ತು ಹಣದ ವರ್ಗಾವಣೆಗಳನ್ನು ಪರಿಶೀಲಿಸಿತು. ಸೆಪ್ಟೆಂಬರ್ 12ರಂದು ಸೀಲ್ಡ್ ಕವರ್ನಲ್ಲಿ ವರದಿ ಸಲ್ಲಿಸಿತು.
ಇದನ್ನೂ ಓದಿ: ಅಂಬಾನಿ ‘ವಂತಾರಾ’ದಲ್ಲಿ ಅಕ್ರಮ ಪ್ರಾಣಿ ಸಂಗ್ರಹ ಆರೋಪ: SIT ತನಿಖೆ
ಸೆಪ್ಟೆಂಬರ್ 15ರಂದು ಸುಪ್ರೀಂ ಕೋರ್ಟ್ ವರದಿಯನ್ನು ಪರಿಶೀಲಿಸಿ, ವಂತಾರಾಗೆ ಕ್ಲೀನ್ ಚಿಟ್ ನೀಡಿತು. ನ್ಯಾಯಮೂರ್ತಿ ಮಿತ್ತಲ್ ಅವರು, “ಇದು ದೇಶದ ಹೆಮ್ಮೆಯ ವಿಷಯ. ಅನಗತ್ಯವಾಗಿ ಇಂತಹ ವಿಷಯಗಳನ್ನು ಎತ್ತಿ ಗಲಭೆ ಮಾಡಬೇಡಿ. ದೇಶಕ್ಕೆ ಒಳ್ಳೆಯದಾಗುತ್ತಿರುವ ಕೆಲಸಗಳನ್ನು ಬೆಂಬಲಿಸಿ” ಎಂದು ಹೇಳಿದರು. ವರದಿಯ ಸಾರಾಂಶವನ್ನು ಮಾತ್ರ ದಾಖಲಿಸಿ, ಸಂಪೂರ್ಣ ವರದಿಯನ್ನು ಗೌಪ್ಯವಾಗಿ ಇರಿಸಲು ನಿರ್ಧರಿಸಿತು. ಇದರಿಂದಾಗಿ ವ್ಯಾಪಾರ ರಹಸ್ಯಗಳು ಮತ್ತು ಸೂಕ್ಷ್ಮ ಮಾಹಿತಿ ರಕ್ಷಣೆಯಾಗುತ್ತದೆ ಎಂದು ಸಾಲಿಸಿಟರ್ ಜನರಲ್ ತುಷಾರ್ ಮೆಹ್ತಾ ಮತ್ತು ಹಿರಿಯ ವಕೀಲ ಹರೀಶ್ ಸಾಲ್ವೆ ತಿಳಿಸಿದರು.
ವಂತಾರಾ ತಂಡವು ಈ ನಿರ್ಧಾರವನ್ನು ಸ್ವಾಗತಿಸಿದೆ. “ಎಸ್ಐಟಿ ವರದಿ ನಮ್ಮನ್ನು ಬಲಪಡಿಸಿದೆ. ನಾವು ಪಾರದರ್ಶಕತೆ, ಕರುಣೆ ಮತ್ತು ಕಾನೂನು ಪಾಲನೆಗೆ ಬದ್ಧರಾಗಿದ್ದೇವೆ. ಮಾತನಾಡಲಾಗದ ಪ್ರಾಣಿಗಳ ಸೇವೆಗೆ ನಾವು ಮುಂದುವರಿಯುತ್ತೇವೆ” ಎಂದು ಹೇಳಿಕೆ ನೀಡಿದೆ.
