ಬೆಂಗಳೂರು ನಗರದ ಟ್ರಾಫಿಕ್ ಸಮಸ್ಯೆ ದಿನದಿಂದ ದಿನಕ್ಕೆ ತೀವ್ರಗೊಳ್ಳುತ್ತಿದೆ. ನಗರದ ಜನರು ದಟ್ಟಣೆಯ ಕಿರಿಕಿರಿಯಿಂದ ಬೇಸತ್ತುಹೋಗಿದ್ದಾರೆ. ಪ್ರತಿದಿನ ಲಕ್ಷಾಂತರ ವಾಹನಗಳು ರಸ್ತೆಗಳನ್ನು ತುಂಬಿಕೊಂಡು, ಪ್ರಯಾಣ ಸಮಯ ಹೆಚ್ಚಾಗುತ್ತಿದೆ. ಇದರಿಂದ ಆರ್ಥಿಕ ನಷ್ಟ ಮತ್ತು ಮಾನಸಿಕ ಒತ್ತಡ ಹೆಚ್ಚುತ್ತಿದೆ. ಸರ್ಕಾರದ ಹಲವು ಯೋಜನೆಗಳ ಹೊರತಾಗಿಯೂ, ಟ್ರಾಫಿಕ್ ನಿಯಂತ್ರಣ ದೊಡ್ಡ ಸವಾಲಾಗಿದೆ. ಇತ್ತೀಚಿನ ಮಾಹಿತಿಗಳ ಪ್ರಕಾರ, ಕರ್ನಾಟಕ ಸರ್ಕಾರ ಬೆಂಗಳೂರಿನ ಟ್ರಾಫಿಕ್ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳಲು ಭಾರೀ ಯೋಜನೆಗಳನ್ನು ರೂಪಿಸಿದೆ.
ಬೆಂಗಳೂರು ಸ್ಮಾರ್ಟ್ ಮೊಬಿಲಿಟಿ ಇನ್ಫ್ರಾಸ್ಟ್ರಕ್ಚರ್ ಲಿಮಿಟೆಡ್ (ಬಿ-ಸ್ಮೈಲ್) ಸಂಸ್ಥೆಯು 13 ಎಲಿವೇಟೆಡ್ ಕಾರಿಡಾರ್ಗಳ ಯೋಜನೆಗೆ ವಿಸ್ತೃತ ಯೋಜನಾ ವರದಿ (ಡಿಪಿಆರ್) ತಯಾರಿಸಿದೆ. ಇದರ ಒಟ್ಟು ವೆಚ್ಚ ಸುಮಾರು ರೂ. 18,000 ಕೋಟಿ. ಈ ಯೋಜನೆಯಡಿ ಸುಮಾರು 110ಕಿಲೋಮೀಟರ್ ಉದ್ದದ ಎಲಿವೇಟೆಡ್ ಕಾರಿಡಾರ್ಗಳು ನಿರ್ಮಾಣವಾಗಲಿವೆ. ಇದರಲ್ಲಿ ಫ್ಲೈಓವರ್ಗಳು, ಡಬಲ್ ಡೆಕ್ಕರ್ ರಸ್ತೆಗಳು ಮತ್ತು ಟನಲ್ ಯೋಜನೆಗಳು ಸೇರಿವೆ. ಉತ್ತರ-ದಕ್ಷಿಣ ಕಾರಿಡಾರ್ ಎಸ್ಟೀಮ್ ಮಾಲ್ ಬಳಿಯ ಏರ್ಪೋರ್ಟ್ ಫ್ಲೈಓವರ್ನಿಂದ ಸಿಲ್ಕ್ ಬೋರ್ಡ್ ಜಂಕ್ಷನ್ವರೆಗೆ ವಿಸ್ತರಿಸಲಿದೆ. ಇದು ನಗರದ ಪ್ರಮುಖ ದಟ್ಟಣೆ ಪ್ರದೇಶಗಳನ್ನು ಸಂಪರ್ಕಿಸಿ, ಪ್ರಯಾಣವನ್ನು ಸುಗಮಗೊಳಿಸಲಿದೆ.
ಸರ್ಕಾರದ ಮೂಲಗಳ ಪ್ರಕಾರ, ಈ ಯೋಜನೆಯನ್ನು ಬೂಟ್ (ಬಿಲ್ಡ್-ಓನ್-ಓಪರೇಟ್-ಟ್ರಾನ್ಸ್ಫರ್) ಮಾದರಿಯಲ್ಲಿ ಕೈಗೊಳ್ಳಲಾಗುತ್ತದೆ. ಹೀಗಾಗಿ, ಹೊಸ ಎಲಿವೇಟೆಡ್ ಕಾರಿಡಾರ್ಗಳು ಮತ್ತು ಡಬಲ್ ಡೆಕ್ಕರ್ ರಸ್ತೆಗಳಲ್ಲಿ ಟೋಲ್ ವ್ಯವಸ್ಥೆ ಜಾರಿಗೆ ಬರಲಿದೆ. ಭೂಸ್ವಾಧೀನಕ್ಕಾಗಿ ರೂ. 3,000 ಕೋಟಿ ಮೀಸಲಿಡಲಾಗಿದೆ. ಕೆಆರ್ಡಿಸಿಎಲ್ (ಕರ್ನಾಟಕ ರೋಡ್ ಡೆವಲಪ್ಮೆಂಟ್ ಕಾರ್ಪೊರೇಷನ್ ಲಿಮಿಟೆಡ್) ಮತ್ತು ಜಿಬಿಎ ಸಹಯೋಗದೊಂದಿಗೆ ಈ ಕೆಲಸ ನಡೆಯಲಿದೆ. ಸಲಹೆಗಾರರ ಮೂಲಕ ಮಾಹಿತಿ ಸಂಗ್ರಹಿಸಿ, ಡಿಸೆಂಬರ್ನೊಳಗೆ ಕೆಲಸ ಆರಂಭಿಸುವ ಯೋಜನೆಯಿದೆ.
ಇದನ್ನೂ ಓದಿ | ಶರಾವತಿ ಯೋಜನೆ| ಸಾಗರದಲ್ಲಿ ಜನಾಕ್ರೋಶ: ಪರಿಸರ-ರೈತರ ಸತ್ಯಾಗ್ರಹ
ಈ ಯೋಜನೆಯಿಂದ ಬೆಂಗಳೂರು ನಗರದ ಟ್ರಾಫಿಕ್ ದಟ್ಟಣೆ ಕಡಿಮೆಯಾಗಿ, ಪ್ರಯಾಣ ಸಮಯ ಉಳಿತಾಯವಾಗಲಿದೆ. ಆದರೆ, ಪರಿಸರ ಪ್ರಭಾವ ಮತ್ತು ಟೋಲ್ ವ್ಯವಸ್ಥೆಯಿಂದ ಜನರಲ್ಲಿ ಕೆಲವು ಆತಂಕಗಳಿವೆ. ಸರ್ಕಾರ ಇದನ್ನು ಪರಿಗಣಿಸಿ, ಸಾರ್ವಜನಿಕ ಸಹಭಾಗಿತ್ವದೊಂದಿಗೆ ಮುಂದುವರಿಯಬೇಕು.
