ಗರ್ಭಿಣಿ ಮಹಿಳಾ ಅಧಿಕಾರಿಯ ವಿರುದ್ಧ ಅಸಭ್ಯವಾಗಿ ಮಾತನಾಡಿದ ಚನ್ನಗಿರಿ ಕ್ಷೇತ್ರದ ಕಾಂಗ್ರೆಸ್ ಶಾಸಕ ಶಿವಗಂಗಾ ಬಸವರಾಜ್ ಅವರ ಹೇಳಿಕೆಯು ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಆಕ್ರೋಶ ವ್ಯಕ್ತವಾಗುತ್ತಿದೆ. ಈ ಆಕ್ರೋಶದ ಮಧ್ಯೆ ಪಕ್ಷದ ಹಿರಿಯ ನಾಯಕಿಯರು ಶಾಸಕರು ಕ್ಷಮೆಯಾಚಿಸಬೇಕು ಎಂದು ಒತ್ತಾಯಿಸುತ್ತಿದ್ದಾರೆ.
ಚನ್ನಗಿರಿಯಲ್ಲಿ ಬುಧವಾರ ನಡೆದ ಕೆಡಿಪಿ ಸಭೆಯಲ್ಲಿ ಅರಣ್ಯ ವಲಯದ ಮಹಿಳಾ ಅಧಿಕಾರಿ ಶ್ವೇತಾ ಅವರು ಹಾಜರಾಗಿರಲಿಲ್ಲ. ಈ ವಿಷಯಕ್ಕೆ ಸಿಟ್ಟುಗೊಂದಾದ ಶಾಸಕರು, “ಮೀಟಿಂಗ್ಗೆ ಬನ್ನಿ ಎಂದರೆ ಪ್ರಗ್ನೆಂಟ್ ಎಂದು ಹೇಳುತ್ತಾರೆ. ಆದರೆ ಮಾಮೂಲು ಪಡೆಯುವಾಗ, ಕಲೆಕ್ಷನ್ ಮಾಡುವಾಗ ಪ್ರಗ್ನೆಂಟ್ ಇರುವುದಿಲ್ಲವೇ?” ಎಂದು ಅವಹೇಳನಕಾರಿಯಾಗಿ ಮಾತನಾಡಿದರು. ಮುಂದುವರೆದು, “ಪ್ರತಿ ಬಾರಿ ಚೆಕಪ್ಗೆ ಹೋಗಿದ್ದೇನೆ, ಇಲ್ಲಿಯೇ ಇದ್ದೇನೆ ಎಂದು ಹೇಳುತ್ತಾರೆ. ಗರ್ಭಿಣಿಯಾಗಿದ್ದರೆ ರಜೆ ತಗೊಳ್ಳಲು ಹೇಳಿ. ನಾಚಿಕೆ ಆಗದಿಲ್ಲವೇ ಹೀಗೆಲ್ಲ ಹೇಳೋಕೆ?” ಎಂದು ಆಕ್ರೋಶ ವ್ಯಕ್ತಪಡಿಸಿದರು. ಈ ಅವಹೇಳನಕಾರಿ ಹೇಳಿಕೆಗಳು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಹರಡಿ, ಮಹಿಳಾ ಹಕ್ಕುಗಳು ಮತ್ತು ಮಹಿಳೆಯರ ಘನತೆಗಳ ಕುರಿತು ಪ್ರಶ್ನೆಯನ್ನು ಮುಂದಿಟ್ಟಿದೆ.
ಈ ಘಟನೆಗೆ ಸಂಬಂಧಿಸಿದಂತೆ ಸಮಾಚಾರ.ಕಾಮ್ನೊಂದಿಗೆ ಮಾತನಾಡಿದ ಸಾಮಾಜಿಕ ಕಾರ್ಯಕರ್ತೆ ಕವಿತಾ ರೆಡ್ಡಿ ಅವರು, “ಗರ್ಭಿಣಿಯಾದ ಮಹಿಳೆಯ ಬಗ್ಗೆ ಅವಹೇಳನಕಾರಿಯಾಗಿ ಮಾತನಾಡಿರುವುದು ತಪ್ಪು. “ಅವರ ತಾಯಿ ಗರ್ಭಿಣಿ ಆಗಿರುವುದಕ್ಕೆ ಅಲ್ಲವೇ ಶಾಸಕರು ಹುಟ್ಟಿರುವುದು? ಬಸವಣ್ಣನವರ ಲಿಂಗಾಯತ ತತ್ವಗಳನ್ನು ಪಾಲಿಸುವ ಶಾಸಕರಿಗೆ ಮಾನವೀಯತೆ ಇಲ್ಲದಿದ್ದರೆ, ಅವರು ಯಾವ ರಾಜಕೀಯ ವ್ಯವಸ್ಥೆಯನ್ನು ಪ್ರತಿನಿಧಿಸುತ್ತಾರೆ?” ಎಂದು ಕವಿತಾ ರೆಡ್ಡಿ ತೀಕ್ಷ್ಣವಾಗಿ ಖಂಡಿಸಿದ್ದು ಚನ್ನಗಿರಿ ಕಾಂಗ್ರೆಸ್ ಶಾಸಕ ಶಿವಗಂಗಾ ಬಸವರಾಜ್ರ ಈ ಅವಹೇಳನಕಾರಿ ಹೇಳಿಕೆಗೆ ಶಾಸಕರು ಕ್ಷಮೆಯಾಚಿಸಬೇಕು ಎಂದು ಆಗ್ರಹಿಸಿದ್ದಾರೆ.
ಇದನ್ನೂ ಓದಿ | ಗ್ರೀನ್ ಕ್ರ್ಯಾಕರ್ ಅನುಮತಿ: ದೆಹಲಿ ದಿವಾಲಿ(ಳಿ) ಮಾಲಿನ್ಯದ ಕಾರ್ಮೋಡ
“ಮಹಿಳೆಯರಿಗೂ ಸಮಾನ ಅಧಿಕಾರ ಮತ್ತು ಘನತೆ ಇದೆ. ಮಹಿಳೆಯರ ಘನತೆಯನ್ನು ಮೀರಿ ಮಾತನಾಡಿದರೆ, ಅದನ್ನು ಪ್ರಶ್ನಿಸುವ ಹಕ್ಕು ಎಲ್ಲರಿಗೂ ಇದೆ, ಅದು ಶಾಸಕರಾಗಿರಲಿ ಅಥವಾ ಮುಖ್ಯಮಂತ್ರಿಯೇ ಆಗಿರಲಿ. ಇನ್ನೂ, ಈ ಜೈವಿಕ ಪ್ರಕ್ರಿಯೆಯನ್ನು ಅರ್ಥಮಾಡಿಕೊಳ್ಳದ ಶಾಸಕರು ಶಾಸಕರಾಗಿರಲು ಅನರ್ಹರು. ಸಂವಿಧಾನದ ಪ್ರತಿಜ್ಞೆಯಲ್ಲಿ ಎಲ್ಲರನ್ನೂ ಘನತೆಯಿಂದ ಕಾಣುವುದಾಗಿ ಶಪಥ ಮಾಡುತ್ತಾರೆ. ಅದರ ಹಾಗೆ ನಡೆದುಕೊಳ್ಳುವುದಿಲ್ಲ. ಇಂತಹ ಮನುವಾದಿ ಮತ್ತು ಪುರುಷಾಧಿಪತ್ಯದ ಮನೋಭಾವ ಎಲ್ಲ ಪಕ್ಷಗಳಲ್ಲೂ ಇದೆ; ಇದು ಮೊದಲು ಬದಲಾಗಬೇಕು” ಎಂದರು. ಬಸವಣ್ಣನವರಂತಹ ಮಹಾನ್ ವ್ಯಕ್ತಿಯ ತತ್ವಗಳನ್ನು ಅನುಸರಿಸುವವರು ಇಂತಹ ಮಾತುಗಳನ್ನು ಹೇಳುವುದು ಯೋಗ್ಯವಲ್ಲ ಎಂದು ಟೀಕಿಸಿ, “ಮಾನವೀಯತೆ ಇಲ್ಲದವರು ಜನರನ್ನು ಹೇಗೆ ಪ್ರತಿನಿಧಿಸುತ್ತಾರೆ? ಶಾಸಕರು ಕ್ಷಮೆ ಕೇಳಿ, ತಮ್ಮ ತಪ್ಪನ್ನು ಸರಿಪಡಿಸಿಕೊಳ್ಳಲಿ” ಎಂದು ಕವಿತಾ ಹೇಳಿದರು.
ಈ ಘಟನೆಯಿಂದಾಗಿ ಮಹಿಳೆಯರ ಘನತೆಯ ಕುರಿತು ಚರ್ಚೆಗಳು ಜೋರಾಗಿವೆ. ಶಾಸಕರ ವಿರುದ್ಧ ವ್ಯಾಪಕ ಟೀಕೆಗಳು ವ್ಯಕ್ತವಾಗುತ್ತಿದೆ. ಮಹಿಳಾ ಪರ ಹೋರಾಟಗಾರರು ಶಾಸಕರ ಕ್ಷಮೆಗೆ ಒತ್ತಾಯಿಸುತ್ತಿದ್ದಾರೆ.
