ರಾಜ್ಯದಲ್ಲಿ ದಿನೇ ದಿನೆ ಮಾದಕ ನಶೆಯ ವ್ಯಸನ ಹೆಚ್ಚಾಗುತ್ತಿದ್ದು, ಇತ್ತೀಚಿನ ಆರು ತಿಂಗಳ ಪೊಲೀಸ್ ವರದಿಯ ಪ್ರಕಾರ 257 ಗಾಂಜಾ ಪ್ರಕರಣಗಳು ದಾಖಲಾಗಿದ್ದು, 420 ಮಂದಿ ಬಂಧಿತರಾಗಿದ್ದಾರೆ. ಅವರಲ್ಲಿ ಶೇಕಡಾ 60ರಷ್ಟು ಜನರು 18 ರಿಂದ 30 ವರ್ಷದ ಯುವಕರಾಗಿದ್ದಾರೆ.
ಕರ್ನಾಟಕದಲ್ಲಿ ದಿನದಿಂದ ದಿನಕ್ಕೆ ಗಾಂಜಾ ಮಾರಾಟ ಮತ್ತು ಬಳಕೆ ಹೆಚ್ಚುತ್ತಿರುವುದು ರಾಜ್ಯದ ಯುವ ಪೀಳಿಗೆಯ ಭವಿಷ್ಯದ ಬಗ್ಗೆ ಗಂಭೀರ ಆತಂಕ ಉಂಟುಮಾಡಿದೆ. ನಗರ ಪ್ರದೇಶಗಳಿಂದ ಗ್ರಾಮೀಣ ಪ್ರದೇಶದವರೆಗೆ ನಶೆ ಜಾಲದ ವ್ಯಾಪ್ತಿ ವಿಸ್ತರಿಸುತ್ತಿದೆ. ಪೊಲೀಸ್ರ ನಿರಂತರ ಕ್ರಮಗಳ ಹೊರತಾಗಿಯೂ ಅದರ ಬೇರುಗಳು ಆಳವಾಗಿ ನೆಲೆಯೂರಿವೆ.
ಮಾದಕ ವಸ್ತುಗಳ ಮೇಲೆ ನಡೆಸಿದ ದಾಳಿಗಳು
ಇತ್ತೀಚಿನ ವರ್ಷಗಳಲ್ಲಿ ನಡೆಸಿದ ಅತಿದೊಡ್ಡ ಕಾರ್ಯಾಚರಣೆಗಳಲ್ಲಿ ಒಂದಾದ ಬೆಳಗಾವಿಯಲ್ಲಿ ಪೊಲೀಸರು 43 ಕಿಲೋಗ್ರಾಂಗಳಷ್ಟು ಗಾಂಜಾವನ್ನು ವಶಪಡಿಸಿಕೊಂಡಿದ್ದರು. ಈ ಗಾಂಜಾ ಮಾರಾಟ ಮಾಡುವ ಕಿಂಗ್ಪಿನ್ ಸೇರಿದಂತೆ ಆರು ಜನರನ್ನು ಬಂಧಿಸಲಾಗಿತ್ತು ಎಂದು ದಿ ನ್ಯೂ ಇಂಡಿಯನ್ ಎಕ್ಸ್ಪ್ರೇಸ್ ವರದಿ ಮಾಡಿತ್ತು.
ಇದೇ ರೀತಿ ಕೇಂದ್ರ ಅಪರಾಧ ವಿಭಾಗ, ಈಶಾನ್ಯ ವಿಭಾಗ, ಶ್ವಾನ ದಳ ಸೇರಿದಂತೆ ಇತರ ಸಿಬ್ಬಂದಿಗಳು ಬೆಂಗಳೂರು ನಗರದಲ್ಲಿ 23.84 ಕೋಟಿ ರೂ. ಮೌಲ್ಯದ 15.244 ಕೆಜಿ ಎಂಡಿಎಂಎ, ಹೈಡೋ ಗಾಂಜಾ, ಹಶಿಶ್ ಎಣ್ಣೆ ಮತ್ತು ಅಫೀಮು ವಶಪಡಿಸಿಕೊಂಡಿದ್ದರು. ವಸ್ತುಗಳ ಜೊತೆಗೆ ಇಬ್ಬರು ವಿದೇಶಿ ಪ್ರಜೆಗಳು ಸೇರಿದಂತೆ 6 ಜನರನ್ನು ಪೊಲೀಸರು ಬಂಧಿಸಿದ್ದರು.
ಬೆಳಗಾವಿ ಕಾರ್ಯಚರಣೆಯನ್ನೂ ಮೀರಿಸಿದಂತಹ ಘಟನೆ ಮಂಗಳೂರಿನಲ್ಲಿ ನಡೆದಿದೆ. ಕರ್ನಾಟಕ ಕೇಂದ್ರ ಅಪರಾಧ ವಿಭಾಗದ ಕಾರ್ಯಾಚರಣೆಯಲ್ಲಿ ಇಬ್ಬರು ದಕ್ಷಿಣ ಆಫ್ರಿಕಾದ ಯುವತಿಯರಾದ ಬಾಂಬಾ ಫ್ಯಾಂಟಾ ಮತ್ತು ಅಬಿಗೈಲ್ ಅಡೋನಿಸ್ ಅವರನ್ನು ಮಂಗಳೂರಿನಲ್ಲಿ ಬಂಧಿಸಲಾಯಿತು, ಸುಮಾರು 38 ಕೆಜಿ ಎಂಡಿಎಂಎ ಜೊತೆಗೆ, ಕಾಳಸಂತೆಯಲ್ಲಿ 75 ಕೋಟಿ ರೂ. ಮೌಲ್ಯದ ಈ????? ವಶಪಡಿಸಿಕೊಂಡಿದ್ದು, ಇದು ಕರ್ನಾಟಕದ ಇತಿಹಾಸದಲ್ಲಿಯೇ ಅತಿ ದೊಡ್ಡದಾಗಿದೆ.
ಪೊಲೀಸರು ಮಂಗಳೂರಿನ ಮೂಲಕ ದಕ್ಷಿಣ ಭಾರತದ ರಾಜ್ಯಗಳಿಗೆ ಮಾದಕವಸ್ತು ಕಳ್ಳಸಾಗಣೆ ಮಾಡುವ ಮಾರ್ಗವನ್ನು ಈ ಕಾರ್ಯಾಚರಣೆಯಿಂದ ಬಹಿರಂಗಪಡಿಸಿದರು. ದಕ್ಷಿಣ ಭಾರತದಲ್ಲಿ ಮಾದಕವಸ್ತುಗಳಿಗೆ ಪ್ರಮುಖ ಪ್ರವೇಶ ಬಿಂದುವಾಗಿ ಮಂಗಳೂರು ಉದಯೋನ್ಮುಖ ಪಾತ್ರವಹಿಸಿದೆ ಎಂದು ಈ ಕಾರ್ಯಾಚರಣೆಯಿಂದ ತಿಳಿದು ಬಂದಿದೆ.
ಈ ವರ್ಷದ ಜನವರಿಯಿಂದ ಅಕ್ಟೋಬರ್ 8 ರವರೆಗೆ ಬೆಂಗಳೂರು ಪೊಲೀಸರು 81.21 ಕೋಟಿ ರೂ. ಮೌಲ್ಯದ ಸುಮಾರು 1,483.30 ಕೆಜಿ ಎಂಡಿಎಂಎಯನ್ನು ವಶಪಡಿಸಿಕೊಂಡಿದ್ದಾರೆ ಮತ್ತು ಬೆಂಗಳೂರು ನಗರದಲ್ಲಿ ಮಾದಕವಸ್ತು ಮಾರಾಟಕ್ಕೆ ಸಂಬಂಧಿಸಿದಂತೆ 711 ಪ್ರಕರಣಗಳು ದಾಖಲಾಗಿವೆ ಎಂದು ಡೆಕ್ಕನ್ ಕ್ರಾನಿಕಲ್ ವರದಿ ಮಾಡಿದೆ.
ಕಾಲೇಜು ಹಾಸ್ಟೆಲ್ಗಳಿಂದ ಪಾರ್ಕ್ಗಳವರೆಗೆ ವ್ಯಾಪಿಸಿರುವ ನಶೆ ಜಾಲ
ಮಂಗಳೂರು, ಕಲಬುರಗಿ, ದಾವಣಗೆರೆ ಮತ್ತು ಬೆಂಗಳೂರಿನಲ್ಲಿ ನಡೆದ ಇತ್ತೀಚಿನ ದಾಳಿಗಳಲ್ಲಿ ವಿದ್ಯಾರ್ಥಿಗಳೇ ಪ್ರಮುಖ ಆರೋಪಿಗಳಾಗಿರುವುದು ಸ್ಪಷ್ಟವಾಗಿದೆ. ಹಾಸ್ಟೆಲ್ಗಳು, ಪಿಜಿ ರೂಂಗಳು, ಹೋಟೆಲ್ಗಳು ಮತ್ತು ಪಾರ್ಕ್ಗಳು ಗಾಂಜಾ ಸೇವನೆಯ ಕೇಂದ್ರಗಳಾಗಿವೆ. ಕಲಬುರಗಿಯಲ್ಲಿ ವಶಕ್ಕೆ ತೆಗೆದುಕೊಂಡ 503 ಗ್ರಾಂ ಗಾಂಜಾ, ಮಂಗಳೂರಿನಲ್ಲಿ ಪತ್ತೆಯಾದ ಅಂತರ್ಜಾಲ ವಹಿವಾಟು ಪ್ರಕರಣಗಳು ನಶೆ ವ್ಯಾಪಾರದ ಹೊಸ ರೂಪವನ್ನೇ ತೋರಿಸಿದೆ.
ಇದನ್ನೂ ಓದಿ | ಕಲಬುರಗಿ ಡ್ರಗ್ಸ್ ಪ್ರಕರಣ: ಲಿಂಗರಾಜ್ ಕಣ್ಣಿ ಕಾಂಗ್ರೆಸ್ನಿಂದ ಉಚ್ಚಾಟನೆ
ಪೊಲೀಸರು “ಆಪರೇಷನ್ ಕ್ಲೀನ್ ಕ್ಯಾಂಪಸ್” ಹೆಸರಿನ ವಿಶೇಷ ಅಭಿಯಾನ ಪ್ರಾರಂಭಿಸಿ ಕಾಲೇಜುಗಳಲ್ಲಿ ಅಚಾನಕ್ಕಾಗಿ ತಪಾಸಣೆ ನಡೆಸುತ್ತಿದ್ದಾರೆ. ಪ್ರತಿ ಜಿಲ್ಲೆಯಲ್ಲಿ ನಶೆ ವಿರೋಧಿ ಘಟಕಗಳು ಸ್ಥಳೀಯ ಮಟ್ಟದಲ್ಲಿ ಮಾಹಿತಿ ಸಂಗ್ರಹಣೆ ಮಾಡುತ್ತಿವೆ. ಆದರೆ ತನಿಖಾ ಮೂಲಗಳ ಪ್ರಕಾರ, ಈ ಜಾಲದ ಹಿಂದಿನ ದೊಡ್ಡ ಸರಬರಾಜುದಾರರು ಇನ್ನೂ ಪತ್ತೆಯಾಗಿಲ್ಲ. ಸಾಮಾಜಿಕ ಮಾಧ್ಯಮ ಆ್ಯಪ್ಗಳ ಮೂಲಕ ಗಾಂಜಾ ಆರ್ಡರ್ ಮತ್ತು ಪಾವತಿಗಳು ಕ್ರಿಪ್ಟೋ ಚಾನೆಲ್ಗಳಲ್ಲಿ ನಡೆಯುತ್ತಿವೆ ಎಂಬುದೂ ಬೆಳಕಿಗೆ ಬಂದಿದೆ.
